ಅಸ್ಸಾಂನ ನಗಾಂವ್ ಲೋಕಸಭಾ ಕ್ಷೇತ್ರಕ್ಕೆ ನಡೆಯಲಿರುವ ಉಪಚುನಾವಣೆಯ ಪ್ರಚಾರ ಕಣದಲ್ಲಿ ರಾಜಕೀಯ ಆರೋಪ-ಪ್ರತ್ಯಾರೋಪಗಳು ವಿಚಿತ್ರ ರೂಪ ಪಡೆದುಕೊಂಡಿವೆ. ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಮತ್ತು ಧುಬ್ರಿ ಕ್ಷೇತ್ರದ ಕಾಂಗ್ರೆಸ್ ಸಂಸದ ರಕಿಬುಲ್ ಹುಸೇನ್ ನಡುವಿನ ವಾಕ್ಸಮರ ಈಗ ‘ಬಿರಿಯಾನಿ’ ಹಾಗೂ ‘ರಸ್ಕ್’ ಚರ್ಚೆಯಾಗಿ ಬದಲಾಗಿದೆ.
ಪ್ರಚಾರ ಭಾಷಣದ ವೇಳೆ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ, ಕಾಂಗ್ರೆಸ್ ನಾಯಕ ರಕಿಬುಲ್ ಹುಸೇನ್ ಅವರನ್ನು ಪೌರಾಣಿಕ ಕಥೆಯ ರಾಕ್ಷಸ ‘ಬಕಾಸುರ’ನಿಗೆ ಹೋಲಿಸಿದ್ದರು. ಹುಸೇನ್ ಅವರು ಸರ್ಕಾರಿ ಯೋಜನೆಗಳ ಹಣವನ್ನು ನುಂಗಿ ಹಾಕುತ್ತಿದ್ದಾರೆ ಎಂದು ಶರ್ಮಾ ಟೀಕಿಸಿದ್ದರು.
ಇದನ್ನೂ ಓದಿ: ಉಪಚುನಾವಣೆಗಳಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ ನಿರೀಕ್ಷೆ ಮೀರಿ ಜನಬೆಂಬಲ: ಸಿಎಂ ಸಿದ್ದರಾಮಯ್ಯ
ಇದಕ್ಕೆ ವ್ಯಂಗ್ಯವಾಗಿ ತಿರುಗೇಟು ನೀಡಿದ್ದ ಸಂಸದ ರಕಿಬುಲ್ ಹುಸೇನ್, “ದೇವರು ನನ್ನನ್ನು ಬಿರಿಯಾನಿ ತಿನ್ನಲೆಂದೇ ಭೂಮಿಗೆ ಕಳುಹಿಸಿದ್ದಾನೆ. ಬಿರಿಯಾನಿ ತಿನ್ನಲು ಅಗತ್ಯವಿರುವಷ್ಟು ಹಣವನ್ನೂ ಕೊಟ್ಟಿದ್ದಾನೆ” ಎಂದು ಹೇಳಿದ್ದರು. ಮಗು ಹುಟ್ಟಿದಾಗ ತಾಯಿಯ ಹಾಲು ಕುಡಿಯುತ್ತದೆ, ಆದರೆ ನಾನು ಹುಟ್ಟುತ್ತಲೇ ಚಿಕನ್ ಬಿರಿಯಾನಿ ತಿಂದವನು. ಅಲ್ಲದೆ, ಸಾಮಾನ್ಯ ಚಹಾ ಜೊತೆ ತಿನ್ನುವ ‘ರಸ್ಕ್’ ತಿನ್ನುವವರಿಗೆ ಬಿರಿಯಾನಿ ಮತ್ತು ಪುಲಾವ್ ನಡುವಿನ ವ್ಯತ್ಯಾಸ ತಿಳಿಯುವುದಿಲ್ಲ ಎಂದು ವ್ಯಂಗ್ಯವಾಡಿದ್ದರು.
ಹುಸೇನ್ ಹೇಳಿಕೆಗೆ ನಗಾಂವ್‌ನ ಪ್ರಚಾರ ಸಭೆಯಲ್ಲಿ ತೀವ್ರವಾಗಿ ಪ್ರತಿಕ್ರಿಯಿಸಿದ ಸಿಎಂ ಹಿಮಂತ ಶರ್ಮಾ, “ತಾಯಿಯ ಹಾಲು ಕುಡಿಯಲು ಹುಟ್ಟಿದವರು ಮನುಷ್ಯರು, ಬಿರಿಯಾನಿ ತಿನ್ನಲೆಂದೇ ಹುಟ್ಟಿದೆ ಎನ್ನುವವರು ಪ್ರಾಣಿಗಳು” ಎಂದು ಕಟುವಾಗಿ ವಾಗ್ದಾಳಿ ನಡೆಸಿದರು. ಈ ಹೇಳಿಕೆಯು ಅಸ್ಸಾಂ ರಾಜಕೀಯ ವಲಯದಲ್ಲಿ ದೊಡ್ಡ ವಿವಾದವನ್ನೇ ಸೃಷ್ಟಿಸಿದೆ.
ಈ ಇಬ್ಬರ ವಾಕ್ಸಮರದ ನಡುವೆ ಎಐಯುಡಿಎಫ್ ಮುಖ್ಯಸ್ಥ ಬದ್ರುದ್ದೀನ್ ಅಜ್ಮಲ್ ಕೂಡ ಜಿಗಿದಿದ್ದು, ರಕಿಬುಲ್ ಹುಸೇನ್ ಬಡತನದಿಂದ ಬಂದವರು, ಅವರು ಬಿರಿಯಾನಿ ತಿಂದಲ್ಲ, ಒಣ ಮೀನು ತಿಂದು ಬೆಳೆದವರು ಎಂದು ಲೇವಡಿ ಮಾಡಿದ್ದಾರೆ.
ನಗಾಂವ್ ಕ್ಷೇತ್ರದ ಸಂಸದರಾಗಿದ್ದ ಪ್ರದ್ಯುತ್ ಬೋರ್ಡೋಲೋಯ್ ಅವರು ರಾಜೀನಾಮೆ ನೀಡಿ ಬಿಜೆಪಿ ಸೇರಿದ ನಂತರ ಈ ಸ್ಥಾನ ತೆರವಾಗಿದೆ. ಅಕ್ಟೋಬರ್ 6ರಂದು ನಗಾಂವ್ ಕ್ಷೇತ್ರದ ಉಪಚುನಾವಣೆಗೆ ಮತದಾನ ನಡೆಯಲಿದ್ದು, ಅಕ್ಟೋಬರ್ 9ರಂದು ಫಲಿತಾಂಶ ಹೊರಬೀಳಲಿದೆ. ಬಿಜೆಪಿ, ಕಾಂಗ್ರೆಸ್ ಹಾಗೂ ಎಐಯುಡಿಎಫ್ ನಡುವೆ ಇಲ್ಲಿ ತ್ರಿಕೋನ ಸ್ಪರ್ಧೆ ಏರ್ಪಟ್ಟಿದೆ.
