ಮತದಾರರ ಪಟ್ಟಿಯಲ್ಲಿ ಕಂಡುಬಂದ ವಿಚಿತ್ರ ದೋಷಗಳ ಕುರಿತು ವ್ಯಕ್ತವಾದ ಟೀಕೆಗಳಿಗೆ ಸಾಮಾಜಿಕ ಜಾಲತಾಣದಲ್ಲಿ ನೀಡಿದ್ದ ವಿವಾದಾತ್ಮಕ ಪ್ರತಿಕ್ರಿಯೆಗೆ ಉತ್ತರ ಪ್ರದೇಶದ ಮುಖ್ಯ ಚುನಾವಣಾಧಿಕಾರಿ (CEO) ಅವರ ಕಚೇರಿ ಕ್ಷಮೆಯಾಚಿಸಿದೆ. ಅಧಿಕೃತ ಎಕ್ಸ್ ಖಾತೆಯಲ್ಲಿ ಬಳಸಲಾದ ಭಾಷೆ ಮತ್ತು ಶೈಲಿ ಸೂಕ್ತವಾಗಿರಲಿಲ್ಲ ಎಂದು ಒಪ್ಪಿಕೊಂಡಿರುವ ಆಯೋಗ, ಇನ್ಮುಂದೆ ತನ್ನ ಸಂವಹನವು ಗೌರವಾನ್ವಿತ ಹಾಗೂ ಅಧಿಕೃತವಾಗಿರಲಿದೆ ಎಂದು ಸ್ಪಷ್ಟಪಡಿಸಿದೆ.
ಏನಿದು ವಿವಾದ?
ಉತ್ತರ ಪ್ರದೇಶದ ವಿಧಾನ ಪರಿಷತ್ (MLC) ಚುನಾವಣೆಯ ಮತದಾರರ ಪಟ್ಟಿಯಲ್ಲಿ “ರಾಮ್ ನೇ ಯಾದವ್ ಕೋ ಮಾರಾ” (ರಾಮ್ ಯಾದವ್‌ಗೆ ಹೊಡೆದನು) ಎಂಬ ವಿಚಿತ್ರ ಹೆಸರು ಕಾಣಿಸಿಕೊಂಡಿತ್ತು. ಇದು ಪ್ರತಿಪಕ್ಷಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು. ಆಪ್ (AAP) ರಾಜ್ಯಸಭಾ ಸಂಸದ ಸಂಜಯ್ ಸಿಂಗ್ ಅವರು ಸೋಶಿಯಲ್ ಮೀಡಿಯಾದಲ್ಲಿ ಈ ವಿಚಾರಕ್ಕೆ ಪ್ರತಿಕ್ರಿಯಿಸಿ, “ರಾಮ್ ಕೇವಲ ಯಾದವ್‌ಗೆ ಮಾತ್ರ ಏಕೆ ಹೊಡೆದರು? ಯಾವುದೇ ಸಿಂಗ್, ಪಾಠಕ್, ಶರ್ಮಾ ಅಥವಾ ರೈ ಅವರಿಗೆ ಏಕೆ ಹೊಡೆಯಲಿಲ್ಲ? ನಿಮ್ಮ ಕಂಪ್ಯೂಟರ್ ಜಾತಿವಾದಿಯೇ?” ಎಂದು ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಜ್ಞಾನೇಶ್ ಕುಮಾರ್ ಅವರನ್ನು ಪ್ರಶ್ನಿಸಿದ್ದರು.
ಆಪ್ ಸೇರಿದಂತೆ ಪ್ರತಿಪಕ್ಷಗಳ ಟೀಕೆಗೆ ಪ್ರತಿಕ್ರಿಯಿಸಿದ್ದ ಯುಪಿ ಸಿಇಒ ಅಧಿಕೃತ ಖಾತೆಯು, “ಕಂಪ್ಯೂಟರ್ ಅಥವಾ ತಂತ್ರಾಂಶಗಳು ಜಾತಿವಾದಿಯಲ್ಲ. ತಪ್ಪು ನಡೆದಿರುವುದನ್ನು ನಾವು ಒಪ್ಪಿಕೊಳ್ಳುತ್ತೇವೆ, ಆದರೆ ಅದೃಷ್ಟವಶಾತ್ ತಪ್ಪು ಮಾಡುವಾಗಲೂ ಯಾವುದೇ ಜಾತಿ ತಾರತಮ್ಯವಾಗಿಲ್ಲ. ರಾಮ್ ಯಾವುದೇ ಅಲ್ಪಸಂಖ್ಯಾತ ಸಮುದಾಯದ ವ್ಯಕ್ತಿಯನ್ನು ಕೊಲ್ಲಲಿಲ್ಲ ಎಂದು ದೇವರಿಗೆ ಧನ್ಯವಾದ ಹೇಳಬೇಕು, ಇಲ್ಲದಿದ್ದರೆ ಜಾತಿವಾದದ ಜೊತೆಗೆ ಕೋಮುವಾದದ ಆರೋಪವನ್ನೂ ಹೊರಿಸಲಾಗುತ್ತಿತ್ತು” ಎಂದು ವ್ಯಂಗ್ಯಾತ್ಮಕವಾಗಿ ಪೋಸ್ಟ್ ಮಾಡಿತ್ತು.
ಸಂಸ್ಥೆಯ ಅಧಿಕೃತ ಖಾತೆಯಿಂದ ಬಂದ ಈ ಬೇಜವಾಬ್ದಾರಿ ಪೋಸ್ಟ್ ಸಾರ್ವಜನಿಕವಾಗಿ ಮತ್ತು ರಾಜಕೀಯ ವಲಯದಲ್ಲಿ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಯಿತು. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಸಿಇಒ ಕಚೇರಿ, ತಕ್ಷಣವೇ ಪೋಸ್ಟ್ ಹಿಂಪಡೆದು ಕ್ಷಮೆಯಾಚಿಸಿದೆ.
“ಹಿಂದಿನ ಪೋಸ್ಟ್‌ನಲ್ಲಿ ಬಳಸಲಾದ ಭಾಷೆ, ಶೈಲಿ ಮತ್ತು ತೀಕ್ಷ್ಣತೆ ಅಧಿಕೃತ ಖಾತೆಗೆ ಶೋಭೆ ತರುವಂತಿರಲಿಲ್ಲ. ಪೋಸ್ಟ್‌ನಿಂದ ಸಾರ್ವಜನಿಕರಲ್ಲಿ ಉಂಟಾದ ಆಕ್ರೋಶವನ್ನು ಗಮನಿಸಲಾಗಿದೆ. ಇದರಿಂದ ಅಸಮಾಧಾನಗೊಂಡ ಪ್ರತಿಯೊಬ್ಬರಲ್ಲೂ ಪ್ರಾಮಾಣಿಕವಾಗಿ ಕ್ಷಮೆಯಾಚಿಸುತ್ತೇವೆ. ಇನ್ಮುಂದೆ ನಮ್ಮ ಸಂವಹನವು ಶಾಂತ, ಗೌರವಾನ್ವಿತ ಮತ್ತು Formal ಆಗಿರಲಿದೆ” ಎಂದು ಸಿಇಒ ಕಚೇರಿ ತಿಳಿಸಿದೆ.
ಇದನ್ನೂ ಓದಿ: ಕರ್ನಾಟಕದ ಅಂತಿಮ ಮತದಾರರ ಪಟ್ಟಿ ಪ್ರಕಟ; 99.32 ಲಕ್ಷ ಹೆಸರುಗಳು ಔಟ್‌!
ಈ ಯಡವಟ್ಟಿನ ಕುರಿತು ವಿವರಣೆ ನೀಡಿರುವ ಯುಪಿ ಸಿಇಒ ನವದೀಪ್ ರಿನ್ವಾ, ಅನುವಾದ ತಂತ್ರಾಂಶದ ದೋಷ ಮತ್ತು ಮಾನವ ಸಹಜ ನಿರ್ಲಕ್ಷ್ಯದಿಂದ ಹೀಗಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. “ರಾಮ್‌ಹಿತ್ ಯಾದವ್” ಎಂಬ ಹೆಸರನ್ನು ತಂತ್ರಾಂಶವು ತಪ್ಪಾಗಿ ಅನುವಾದಿಸಿದ್ದರಿಂದ ಈ ಸಮಸ್ಯೆ ಎದುರಾಗಿತ್ತು.
ಒಟ್ಟು 14.81 ಲಕ್ಷ ನೋಂದಾಯಿತ ಮತದಾರರ ಪೈಕಿ 158 ಹೆಸರುಗಳಲ್ಲಿ ಇಂತಹ ದೋಷಗಳು ಕಂಡುಬಂದಿದ್ದು, ಇದಕ್ಕೆ ಕಾರಣರಾದ ಸಂಬಂಧಪಟ್ಟ ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ನೊಟೀಸ್ ಜಾರಿಗೊಳಿಸಿ ವಿವರಣೆ ಕೇಳಲಾಗಿದೆ.
