ಯುವಜನರ ಮತ್ತು ವಿದ್ಯಾರ್ಥಿಗಳ ಹಕ್ಕುಗಳಿಗಾಗಿ ಧ್ವನಿ ಎತ್ತುತ್ತಿರುವ ಕಾರ್ಯಕರ್ತರು, ಬೆಂಬಲಿಗರು ಮತ್ತು ಸ್ವಯಂಸೇವಕರಿಗೆ ಉಚಿತವಾಗಿ ಕಾನೂನು ನೆರವು ನೀಡುವ ಉದ್ದೇಶದಿಂದ ‘ಕಾಕ್ರೋಚ್ ಜನತಾ ಪಾರ್ಟಿ’ (ಸಿಜೆಪಿ) ದೇಶಾದ್ಯಂತ ಹೊಸ ಡಿಜಿಟಲ್ ಕಾನೂನು ನೆರವು ವೇದಿಕೆಯನ್ನು (Legal Aid Platform) ಚಾಲನೆಗೊಳಿಸಿದೆ.
ಪ್ರತಿಭಟನೆ ಅಥವಾ ಸಾಮಾಜಿಕ ಹೋರಾಟಗಳ ಸಂದರ್ಭದಲ್ಲಿ ಕಾರ್ಯಕರ್ತರು ಎದುರಿಸುವ ಕಿರುಕುಳ, ದೌರ್ಜನ್ಯ ಹಾಗೂ ಕಾನೂನು ತೊಡಕುಗಳನ್ನು ಎದುರಿಸಲು ಈ ವೇದಿಕೆಯನ್ನು ವಿನ್ಯಾಸಗೊಳಿಸಲಾಗಿದೆ. ಈ ಸೇವೆ ಸಂಪೂರ್ಣವಾಗಿ ಉಚಿತವಾಗಿರಲಿದೆ ಎಂದು ಸಂಘಟನೆ ತಿಳಿಸಿದೆ.
ಇದನ್ನೂ ಓದಿ: ಸಿಜೆಪಿ ಚಳವಳಿ: ಭಾರತೀಯ ಮುಸ್ಲಿಂ ಸಮಾಜ ಕಲಿಯಬೇಕಾದ ಪಾಠವೇನು?
ಈ ಕುರಿತು ಮಾಹಿತಿ ನೀಡಿರುವ ಸಿಜೆಪಿಯ ಕಾನೂನು ವ್ಯವಹಾರಗಳ ಮುಖ್ಯಸ್ಥೆ ರತ್ನಾ ಸಿಂಗ್, “ನಮ್ಮ ಯಾವುದೇ ಕಾರ್ಯಕರ್ತರು ಅಥವಾ ಬೆಂಬಲಿಗರು ಕಾನೂನು ಹೋರಾಟದಲ್ಲಿ ಒಂಟಿಯಾಗಬಾರದು ಎನ್ನುವ ಉದ್ದೇಶದಿಂದ ಈ ದೇಶವ್ಯಾಪಿ ನೆಟ್‌ವರ್ಕ್ ರೂಪಿಸಲಾಗಿದೆ” ಎಂದು ಹೇಳಿದ್ದಾರೆ.
ಹೋರಾಟಗಾರರಿಗೆ ಮತ್ತು ವಿದ್ಯಾರ್ಥಿಗಳಿಗೆ ಕಾನೂನು ಸಹಾಯ ಒದಗಿಸಲು ವಕೀಲರನ್ನು ಈ ವೇದಿಕೆಗೆ ಉಚಿತವಾಗಿ ಸೇರ್ಪಡೆಗೊಳ್ಳುವಂತೆ ಸಂಘಟನೆ ಆಹ್ವಾನಿಸಿದೆ.
ಸಂಕಷ್ಟದಲ್ಲಿರುವ ಬೆಂಬಲಿಗರು ತಮ್ಮ ಹೆಸರು, ಸಮಸ್ಯೆಯ ವಿವರ ಹಾಗೂ ಸ್ಥಳವನ್ನು ದಾಖಲಿಸುವ ಮೂಲಕ ವೇದಿಕೆಯಲ್ಲಿ ಸಲ್ಲಿಕೆ ಮಾಡಬಹುದು. ಆಯಾ ಪ್ರದೇಶದ ಪರಿಶೀಲಿತ ವಕೀಲರನ್ನು ಈ ವ್ಯವಸ್ಥೆಯ ಮೂಲಕ ನೇರವಾಗಿ ಸಂಪರ್ಕಿಸಲಾಗುತ್ತದೆ.
ಕಾರ್ಯಕರ್ತರನ್ನು ಬಂಧಿಸಿದಾಗ ಅಥವಾ ವಶಕ್ಕೆ ಪಡೆದಾಗ ತಕ್ಷಣ ನೆರವು ನೀಡಲು ‘ಎಮರ್ಜೆನ್ಸಿ ಆಪ್ಷನ್’ ಹಾಗೂ ವಾಟ್ಸಾಪ್ ಸಹಾಯವಾಣಿ ವ್ಯವಸ್ಥೆ ಮಾಡಲಾಗಿದೆ. ಈ ಆಯ್ಕೆ ಬಳಸಿದ ತಕ್ಷಣ ಸಿಜೆಪಿಯ ಕಾನೂನು ತಂಡ ಮತ್ತು ಲಭ್ಯವಿರುವ ವಕೀಲರಿಗೆ ಸಂದೇಶ ರವಾನೆಯಾಗುತ್ತದೆ.
ಬಳಕೆದಾರರು ಬಯಸುವವರೆಗೆ ಅವರ ಗುರುತು ಗೌಪ್ಯವಾಗಿರುತ್ತದೆ. ಸಂವಹನ ಹಾಗೂ ದಾಖಲೆಗಳನ್ನು ಎನ್‌ಕ್ರಿಪ್ಟ್ ಮಾಡಲಾದ ಸುರಕ್ಷಿತ ವ್ಯವಸ್ಥೆಯಲ್ಲಿ ಸಂಗ್ರಹಿಸಲಾಗುತ್ತದೆ. ದೇಶದ ವಿವಿಧ ಭಾಗಗಳ ಜನರು ಇದನ್ನು ಸುಲಭವಾಗಿ ಬಳಸಲು ಹಲವು ಭಾರತೀಯ ಭಾಷೆಗಳಲ್ಲಿ ಈ ಸೇವೆ ಲಭ್ಯವಿದೆ.
