ಇತರೆ ಹಿಂದುಳಿದ ವರ್ಗಗಳ (ಒಬಿಸಿ) ‘ಕೆನೆಪದರ’ (Creamy Layer) ನಿರ್ಧಾರಕ್ಕೆ ಸಂಬಂಧಿಸಿದಂತೆ ತನ್ನ 2026ರ ಮಾರ್ಚ್ 11ರ ತೀರ್ಪಿನ ಕುರಿತು ಸುಪ್ರೀಂ ಕೋರ್ಟ್ ಅತ್ಯಂತ ಪ್ರಮುಖ ಸ್ಪಷ್ಟನೆಯೊಂದನ್ನು ನೀಡಿದೆ. ಈಗಾಗಲೇ ಪೂರ್ಣಗೊಂಡಿರುವ ನೇಮಕಾತಿಗಳು, ಹುದ್ದೆಗಳ ಹಂಚಿಕೆ ಮತ್ತು ಹಿರಿತನದ ಪಟ್ಟಿಗಳನ್ನು ಪುನಃ ತೆರೆಯಲು ಅಥವಾ ಪರಿಶೀಲಿಸಲು ಈ ತೀರ್ಪು ಪೂರ್ವಾನ್ವಯವಾಗಿ ಅನ್ವಯಿಸುವುದಿಲ್ಲ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ಮಾರ್ಚ್ 11ರ ತೀರ್ಪಿನಲ್ಲಿ, ಒಬಿಸಿ ಅಭ್ಯರ್ಥಿಗಳ ಪೋಷಕರ ಕೇವಲ ‘ಸಂಬಳದ ಆದಾಯವನ್ನು’ ಯಾಂತ್ರಿಕವಾಗಿ ಒಟ್ಟುಗೂಡಿಸಿ ಕೆನೆಪದರಕ್ಕೆ ಸೇರಿಸುವುದು ಸರಿಯಲ್ಲ ಎಂದು ನ್ಯಾಯಾಲಯ ಹೇಳಿತ್ತು. ಈ ತೀರ್ಪಿನಿಂದಾಗಿ 2012ರಿಂದ ನಡೆದಿದ್ದ ಲಕ್ಷಾಂತರ ಯೂನಿಯನ್ ಪಬ್ಲಿಕ್ ಸರ್ವಿಸ್ ಕಮಿಷನ್ (UPSC), ರೈಲ್ವೆ, ಬ್ಯಾಂಕಿಂಗ್ ಮತ್ತು ಇತರೆ ಕೇಂದ್ರ-ರಾಜ್ಯ ಸರ್ಕಾರಿ ನೇಮಕಾತಿಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು, ಕೋರ್ಟ್ ಮೆಟ್ಟಿಲೇರುವ ಪ್ರಕರಣಗಳ ಸಂಖ್ಯೆ ಹೆಚ್ಚಾಗಬಹುದು ಎಂದು ಆತಂಕ ವ್ಯಕ್ತಪಡಿಸಿದ್ದ ಕೇಂದ್ರ ಸರ್ಕಾರ, ತೀರ್ಪಿಗೆ ತಿದ್ದುಪಡಿ ಕೋರಿ ಹಾಗೂ ಪೂರ್ವಾನ್ವಯ ಜಾರಿಗೆ ವಿರೋಧ ವ್ಯಕ್ತಪಡಿಸಿ ಅರ್ಜಿ ಸಲ್ಲಿಸಿತ್ತು.
ಇದನ್ನೂ ಓದಿ: OBC ಕೆನೆಪದರ ನೀತಿ ರೂಪಿಸಲು ಕಾಲಾವಕಾಶ ಕೇಳಿದ ಕೇಂದ್ರ; ತೀರ್ಪು ಕಾಯ್ದಿರಿಸಿ ಸುಪ್ರೀಂ
ಅರ್ಜಿ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್, ಈಗಾಗಲೇ ಮುಕ್ತಾಯಗೊಂಡಿರುವ ಪ್ರಕ್ರಿಯೆಗಳು, ಪ್ರಕಟಗೊಂಡ ಆಯ್ಕೆ ಪಟ್ಟಿಗಳು ಮತ್ತು ಸೇವೆಯಲ್ಲಿರುವ ಅಧಿಕಾರಿಗಳ ಹಿರಿತನದ ಪಟ್ಟಿಯನ್ನು ಮರುಪರಿಶೀಲಿಸುವಂತೆ ಕೇಂದ್ರ ಸರ್ಕಾರಕ್ಕೆ ಯಾವುದೇ ನಿರ್ದೇಶನ ನೀಡಲಾಗಿಲ್ಲ. ಮಾರ್ಚ್ 11ರ ತೀರ್ಪಿನ ಆದೇಶದ ನೇರ ಲಾಭವು ಆ ಪ್ರಕರಣದಲ್ಲಿದ್ದ ಅರ್ಜಿದಾರರು/ಪಕ್ಷಗಾರರಿಗೆ ಮಾತ್ರ ಸೀಮಿತವಾಗಿದ್ದು, ಪ್ರಕರಣದಲ್ಲಿ ಭಾಗಿಯಾಗದ ಇತರ ಅಭ್ಯರ್ಥಿಗಳಿಗೆ ಇದು ಸ್ವಯಂಚಾಲಿತವಾಗಿ ಅನ್ವಯಿಸುವುದಿಲ್ಲ ಎಂದು ಹೇಳಿದೆ.
ಈಗಾಗಲೇ ವಿವಿಧ ಹೈಕೋರ್ಟ್‌ಗಳು ಅಥವಾ ನ್ಯಾಯಮಂಡಳಿಗಳಲ್ಲಿ ಬಾಕಿ ಇರುವ ಪ್ರಕರಣಗಳನ್ನು ಆಯಾ ಪ್ರಕರಣದ ಗುಣಾವಗುಣಗಳ ಮೇಲೆ ಸಂಬಂಧಪಟ್ಟ ಪ್ರಾಧಿಕಾರಗಳು ವಿಚಾರಣೆ ನಡೆಸಬಹುದು. ಖಾಸಗಿ ವಲಯ ಮತ್ತು ಸರ್ಕಾರಿ ಹುದ್ದೆಗಳ ನಡುವೆ ಕೆನೆಪದರ ನಿರ್ಧರಿಸುವ ಸಮಾನ ಮಾನದಂಡಗಳನ್ನು ರೂಪಿಸಲು ಕಾಲಾವಕಾಶ ಬೇಕೆಂಬ ಕೇಂದ್ರ ಸರ್ಕಾರದ ಮನವಿಗೆ ಸ್ಪಂದಿಸಿದ ಪೀಠ, ನೀತಿ ನಿರೂಪಣೆಯು ಕಾರ್ಯಾಂಗ ಹಾಗೂ ಶಾಸಕಾಂಗದ ವ್ಯಾಪ್ತಿಗೆ ಸೇರಿದ್ದಾಗಿದೆ ಎಂದಿದೆ.
ನ್ಯಾಯಮೂರ್ತಿಗಳನ್ನೊಳಗೊಂಡ ಪೀಠವು, ಮಾರ್ಚ್ 11ರ ತೀರ್ಪಿನ ಕಾನೂನಾತ್ಮಕ ತತ್ವಗಳು ಭವಿಷ್ಯದ ನೇಮಕಾತಿಗಳಿಗೆ (ಉದಾಹರಣೆಗೆ UPSC CSE 2025/2026 ಇತ್ಯಾದಿ) ಅನ್ವಯಿಸುತ್ತವೆಯಾದರೂ, ಗತಕಾಲದಲ್ಲಿ ಪೂರ್ಣಗೊಂಡ ನೇಮಕಾತಿಗಳಿಗೆ ಧಕ್ಕೆ ತರುವುದಿಲ್ಲ ಎಂದು ಸ್ಪಷ್ಟಪಡಿಸಿ ಗೊಂದಲಕ್ಕೆ ತೆರೆ ಎಳೆದಿದೆ.
ಏನಿದು ಹಿಂದುಳಿದ ವರ್ಗಗಳ (ಒಬಿಸಿ) ‘ಕೆನೆಪದರ’?
ಕೆನೆಪದರ (Creamy Layer) ಎಂಬುದು ಇತರ ಹಿಂದುಳಿದ ವರ್ಗಗಳ (OBC) ಮೀಸಲಾತಿಗೆ ಸಂಬಂಧಿಸಿದ ಒಂದು ಪ್ರಮುಖ ಕಾನೂನಾತ್ಮಕ ಮತ್ತು ಸಾಮಾಜಿಕ ಮಾನದಂಡವಾಗಿದೆ. ಸರಳವಾಗಿ ಹೇಳುವುದಾದರೆ, ಒಬಿಸಿ ವರ್ಗದಲ್ಲಿದ್ದರೂ ಆರ್ಥಿಕವಾಗಿ ಮತ್ತು ಸಾಮಾಜಿಕವಾಗಿ ಹೆಚ್ಚು ಸಬಲರಾಗಿರುವ (ಉನ್ನತ ಮಟ್ಟದಲ್ಲಿರುವ) ಕುಟುಂಬಗಳನ್ನು ಗುರುತಿಸಿ, ಅವರಿಗೆ ಮೀಸಲಾತಿ ಸೌಲಭ್ಯ ದೊರೆಯದಂತೆ ಹೊರಗಿಡುವ ವ್ಯವಸ್ಥೆಯನ್ನೇ ‘ಕೆನೆಪದರ’ ಎನ್ನಲಾಗುತ್ತದೆ.
ಇದನ್ನೂ ಓದಿ: ಒಬಿಸಿ ‘ಕೆನೆಪದರ’ ನಿಯಮ: ಸಿಎಸ್‌ಇ 2025ರ ಕುರಿತು ಸುಪ್ರೀಂ ಸ್ಪಷ್ಟನೆ ಕೋರಿದ ಕೇಂದ್ರ
ಹಾಲಿನ ಮೇಲೆ ಕೆನೆ ಹೇಗೆ ಮೇಲ್ಭಾಗದಲ್ಲಿ ಸಂಗ್ರಹವಾಗುತ್ತದೆಯೋ, ಹಾಗೆಯೇ ಒಂದು ಹಿಂದುಳಿದ ಸಮುದಾಯದಲ್ಲಿ ಆರ್ಥಿಕವಾಗಿ ಮತ್ತು ಸಾಮಾಜಿಕವಾಗಿ ಮುನ್ನಡೆದು “ಮೇಲ್ಪದರ”ಕ್ಕೆ ಸೇರಿದವರನ್ನು ಮೀಸಲಾತಿಯಿಂದ ಹೊರಗಿಟ್ಟು, ನಿಜವಾದ ಅರ್ಹ ಮತ್ತು ಬಡ ಹಿಂದುಳಿದ ಅಭ್ಯರ್ಥಿಗಳಿಗೆ ಮೀಸಲಾತಿಯ ಲಾಭ ಸಿಗಲಿ ಎಂಬುದು ಇದರ ಮೂಲ ಉದ್ದೇಶ.
1992ರಲ್ಲಿ ಸುಪ್ರೀಂ ಕೋರ್ಟ್‌ನ ಪ್ರಸಿದ್ಧ ‘ಇಂದಿರಾ ಸಾಹ್ನಿ’ (Mandal Case) ತೀರ್ಪಿನಲ್ಲಿ ಒಬಿಸಿ ಮೀಸಲಾತಿಗೆ ಶೇ. 27 ರಷ್ಟು ಅನುಮೋದನೆ ನೀಡುವಾಗ, “ಒಬಿಸಿ ವರ್ಗದಲ್ಲಿರುವ ಶಿಕ್ಷಣ ಹಾಗೂ ಆರ್ಥಿಕವಾಗಿ ಮುಂದುವರಿದವರನ್ನು (Creamy Layer) ಮೀಸಲಾತಿಯಿಂದ ಹೊರಗಿಡಬೇಕು” ಎಂದು ಸ್ಪಷ್ಟ ನಿರ್ದೇಶನ ನೀಡಿತು.
ಪ್ರಸ್ತುತ ನಿಯಮಗಳ ಪ್ರಕಾರ, ಕುಟುಂಬದ ವಾರ್ಷಿಕ ಆದಾಯ (ಕೃಷಿ ಆದಾಯ ಮತ್ತು ವೇತನದ ಹೊರತಾಗಿ ಮೂಲಗಳಿಂದ ಬರುವ ಆದಾಯ) ₹8 ಲಕ್ಷಕ್ಕಿಂತ ಹೆಚ್ಚಿದ್ದರೆ ಅವರನ್ನು ಕೆನೆಪದರಕ್ಕೆ ಸೇರಿಸಲಾಗುತ್ತದೆ. ಇವರಿಗೆ ಒಬಿಸಿ ಮೀಸಲಾತಿ ಸಿಗುವುದಿಲ್ಲ. ವಾರ್ಷಿಕ ಆದಾಯ ₹8 ಲಕ್ಷಕ್ಕಿಂತ ಕಡಿಮೆಯಿದ್ದಲ್ಲಿ ಅವರನ್ನು ‘Non-Creamy Layer’ (NCL) ಎಂದು ಪರಿಗಣಿಸಲಾಗುತ್ತದೆ. ಇವರಿಗೆ ಒಬಿಸಿ ಮೀಸಲಾತಿ ಸೌಲಭ್ಯ ದೊರೆಯುತ್ತದೆ.
ಪೋಷಕರು ರಾಷ್ಟ್ರಪತಿ, ಉಪರಾಷ್ಟ್ರಪತಿ, ಸುಪ್ರೀಂ ಕೋರ್ಟ್/ಹೈಕೋರ್ಟ್ ನ್ಯಾಯಮೂರ್ತಿಗಳು, ಯುಪಿಎಸ್‌ಸಿ ಅಧ್ಯಕ್ಷರು ಮುಂತಾದ ಉನ್ನತ ಸಂವಿಧಾನಾತ್ಮಕ ಹುದ್ದೆಗಳಲ್ಲಿದ್ದರೆ ಅವರ ಮಕ್ಕಳು ಕೆನೆಪದರಕ್ಕೆ ಸೇರುತ್ತಾರೆ. ಪೋಷಕರು ನೇರವಾಗಿ ಗ್ರೂಪ್ ‘ಎ’ (Group A / Class I) ಅಧಿಕಾರಿಯಾಗಿದ್ದರೆ, ಅಥವಾ 40 ವರ್ಷ ವಯಸ್ಸಿಗೆ ಮುನ್ನ ಗ್ರೂಪ್ ‘ಬಿ’ (Group B / Class II) ಹುದ್ದೆಗೆ ಬಡ್ತಿ ಪಡೆದಿದ್ದರೆ ಅವರ ಮಕ್ಕಳು ಕೆನೆಪದರಕ್ಕೆ ಬರುತ್ತವೆ. ಸಶಸ್ತ್ರ ಪಡೆಗಳಲ್ಲಿ ಕರ್ನಲ್ ಅಥವಾ ಅದಕ್ಕಿಂತ ಹೆಚ್ಚಿನ ಶ್ರೇಣಿಯ ಹುದ್ದೆಯಲ್ಲಿರುವವರ ಮಕ್ಕಳಿಗೆ ಇದು ಅನ್ವಯಿಸುತ್ತದೆ. ನಿಗದಿತ ಮಿತಿಗಿಂತ ಹೆಚ್ಚು ಕೃಷಿ ಭೂಮಿ ಅಥವಾ ನಗರ ಪ್ರದೇಶಗಳಲ್ಲಿ ದೊಡ್ಡ ಪ್ರಮಾಣದ ಆಸ್ತಿ/ಕಟ್ಟಡಗಳನ್ನು ಹೊಂದಿರುವ ಕುಟುಂಬಗಳು ಕೆನೆಪದರಕ್ಕೆ ಸೇರುತ್ತದೆ.
