ಭಾರತದಲ್ಲಿಂದು ಉದ್ಯೋಗ ಸಿಗದ ಕಾರಣ ಪದವಿ ಪ್ರಮಾಣಪತ್ರಗಳಿಗೆ ಯಾವುದೇ ಬೆಲೆಯಿಲ್ಲ ಎಂದು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ಇಂದು(ಆ.8) ಉತ್ತರ ಪ್ರದೇಶದ ಪ್ರಯಾಗ್‌ರಾಜ್‌ನಲ್ಲಿ ಆಯೋಜಿಸಲಾಗಿದ್ದ ವಿದ್ಯಾರ್ಥಿಗಳ ‘ಛಾತ್ರೋನ್ ಕಿ ಗೂಂಜ್’ (ವಿದ್ಯಾರ್ಥಿಗಳ ಧ್ವನಿ) ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.
ದೇಶದ 40 ಕೋಟಿ ಯುವಜನತೆ ಭಾರತದ ಅತಿದೊಡ್ಡ ಶಕ್ತಿ. ಅಮೆರಿಕ, ಚೀನಾ ಮತ್ತು ರಷ್ಯಾದ ಬಗ್ಗೆ ಜಾಗತಿಕವಾಗಿ ಸಾಕಷ್ಟು ಚರ್ಚೆಗಳಾಗುತ್ತವೆ. ಆದರೆ ಭಾರತದ ಯುವಜನತೆಗೆ ಜಗತ್ತಿನಲ್ಲಿ ಯಾರೂ ಸಾಟಿಯಿಲ್ಲ ಎಂದು ರಾಹುಲ್ ಬಣ್ಣಿಸಿದರು. “ಇಂದು ನಾನು ನಿಮ್ಮೊಂದಿಗೆ ದರ್ದ್ (ನೋವು), ಡೇಟಾ ಮತ್ತು ದೌಲತ್ (ಸಂಪತ್ತು) ಬಗ್ಗೆ ಮಾತನಾಡಲು ಬಯಸುತ್ತೇನೆ. ಡೇಟಾ ನಿಮ್ಮದು, ನೋವು ನಿಮ್ಮದು, ಆದರೆ ಸಂಪತ್ತು ಮಾತ್ರ ದೊಡ್ಡವರದು (ಕಾರ್ಪೊರೇಟ್‌ಗಳದ್ದು)” ಎಂದು ಪರೋಕ್ಷವಾಗಿ ವಾಗ್ದಾಳಿ ನಡೆಸಿದರು.
ದೇಶದಲ್ಲಿ ಶಿಕ್ಷಣದ ಮೌಲ್ಯ ಕುಸಿಯುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಅವರು, ಭಾರತದಲ್ಲಿಂದು ಉದ್ಯೋಗದ ಎಲ್ಲಾ ಬಾಗಿಲುಗಳು ಮುಚ್ಚಿವೆ. ಹೀಗಾಗಿ ಪದವಿ ಪ್ರಮಾಣಪತ್ರಗಳಿಗೆ ಯಾವುದೇ ಬೆಲೆಯಿಲ್ಲದಂತಾಗಿದೆ. ಜನರ ಡೇಟಾವನ್ನು ಕಸಿದುಕೊಂಡು ದೊಡ್ಡ ಕಂಪನಿಗಳ ಪಾಲು ಮಾಡಲಾಗುತ್ತಿದೆ. ಯುವಕರಿಗೆ ಕೇವಲ ಕಂಟೆಂಟ್ ಹಾಗೂ ‘ರೀಲ್ಸ್’ ಮಾಡಲು ಹೇಳಲಾಗುತ್ತಿದೆ. ರೀಲ್ಸ್ ಎಂಬುದು 21ನೇ ಶತಮಾನದ ಹೊಸ ಚಟವಾಗಿದೆ ಎಂದು ಅವರು ಎಚ್ಚರಿಸಿದರು.
”ಯುವಜನತೆಗೆ ಬ್ಲಿಂಕಿಟ್ ಹಾಗೂ ಉಬರ್‌ನಂತಹ ಸಂಸ್ಥೆಗಳಲ್ಲಿ ಕೆಲಸ ಮಾಡಲು, ಕೂಲಿ ಮಾಡಲು ಮತ್ತು ರೀಲ್ಸ್ ಮಾಡಲು ಹೇಳಲಾಗುತ್ತಿದೆಯೇ ಹೊರತು, ಈ ದೇಶದಲ್ಲಿ ಅವರಿಗೆ ಸೂಕ್ತ ಉದ್ಯೋಗವಂತೂ ಸಿಗುತ್ತಿಲ್ಲ” ಎಂದು ಅವರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು.
ಶುಕ್ರವಾರ ರಾತ್ರಿ ಸುರಿದ ನಿರಂತರ ಮಳೆಯಿಂದಾಗಿ ಕಾರ್ಯಕ್ರಮ ನಡೆದ ಕಾಯಸ್ಥ ಪಾಠಶಾಲೆ (ಕೆಪಿ) ಮೈದಾನ ಸಂಪೂರ್ಣ ಜಲಾವೃತವಾಗಿ ಕೆಸರುಮಯವಾಗಿತ್ತು. ಆದರೂ ಅಪಾರ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಮತ್ತು ಸ್ಪರ್ಧಾತ್ಮಕ ಪರೀಕ್ಷಾ ಆಕಾಂಕ್ಷಿಗಳು ಜಮಾಯಿಸಿದ್ದರು. ಕಾರ್ಯಕ್ರಮಕ್ಕೂ ಮುನ್ನ ಕಾಂಗ್ರೆಸ್ ಕಾರ್ಯಕರ್ತರು ಬಕೆಟ್, ಜೆಸಿಬಿ ಹಾಗೂ ರೋಡ್ ರೋಲರ್ ಬಳಸಿ ಮೈದಾನದ ನೀರನ್ನು ಹೊರಹಾಕಿ ಕಾರ್ಯಕ್ರಮಕ್ಕೆ ಅನುವು ಮಾಡಿಕೊಟ್ಟರು.
ನಿರುದ್ಯೋಗ, ನೇಮಕಾತಿ ಪ್ರಕ್ರಿಯೆಗಳಲ್ಲಿನ ವಿಳಂಬ, ಪರೀಕ್ಷಾ ಪತ್ರಿಕೆ ಸೋರಿಕೆ (ಪೇಪರ್ ಲೀಕ್) ಮತ್ತು ವ್ಯವಸ್ಥೆಯಲ್ಲಿನ ಹೊಣೆಗಾರಿಕೆಯ ಕೊರತೆಯಿಂದ ಬೇಸತ್ತಿರುವ ವಿದ್ಯಾರ್ಥಿಗಳ ಸಮಸ್ಯೆಗಳಿಗೆ ಧ್ವನಿಯಾಗುವ ಉದ್ದೇಶದಿಂದ ರಾಹುಲ್ ಗಾಂಧಿ ಈ ಭೇಟಿ ಕೈಗೊಂಡಿದ್ದರು. ತಮ್ಮ ಭವಿಷ್ಯವನ್ನು ರೂಪಿಸಿಕೊಳ್ಳಲು ಯುವಕರು ಕಷ್ಟಪಟ್ಟು ಓದುತ್ತಿದ್ದಾರೆ, ಆದರೆ ದೋಷಪೂರಿತ ವ್ಯವಸ್ಥೆ ಅವರನ್ನು ಕೈಬಿಡುತ್ತಿದೆ ಎಂದು ರಾಹುಲ್ ಕಿಡಿಕಾರಿದರು. ಇದಕ್ಕೂ ಮುನ್ನ ಪ್ರಯಾಗ್‌ರಾಜ್ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ ರಾಹುಲ್ ಗಾಂಧಿ ಅವರನ್ನು ಸಂಸದ ಉಜ್ವಲ್ ರಮಣ್ ಸಿಂಗ್ ಸೇರಿದಂತೆ ಸ್ಥಳೀಯ ಕಾಂಗ್ರೆಸ್ ನಾಯಕರು ಆತ್ಮೀಯವಾಗಿ ಬರಮಾಡಿಕೊಂಡರು.
