ಪ್ರತಿ ಸೀಸನ್‌ನ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಕೇವಲ ಕ್ರಿಕೆಟ್ ಅಭಿಮಾನಿಗಳನ್ನು ಆಕರ್ಷಿಸುವುದಲ್ಲ. ಈ ಸಂದರ್ಭದಲ್ಲಿ ಸಾಕಷ್ಟು ಸೈಬರ್ ಅಪರಾಧಗಳು, ಬೆಟ್ಟಿಂಗ್ ಹಾವಳಿ ಹೆಚ್ಚಳವಾಗುತ್ತದೆ. ಈ ಬಾರಿಯೂ ಐಪಿಎಲ್ ಫೈನಲ್‌ಗೂ ಮುನ್ನ ಬೆಟ್ಟಿಂಗ್ ದಂದೆ ವಿಸ್ತರಿಸುತ್ತಿದೆ. ಲಕ್ಷಾಂತರ ಭಾರತೀಯರ ಹಣವನ್ನೇ ಗುರಿಯಾಗಿಸಿಕೊಂಡ ನಕಲಿ ವೆಬ್‌ಸೈಟ್‌ಗಳು ತಲೆ ಎತ್ತಿವೆ.
ಐಪಿಎಲ್ 2026ರ ಮಹತ್ವದ ಫೈನಲ್ ಪಂದ್ಯವು ಮೇ 31ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮತ್ತು ಗುಜರಾತ್ ಟೈಟನ್ಸ್ (GT) ತಂಡಗಳ ನಡುವೆ ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲಿದೆ. ಈ ನಡುವೆ ಬೆಟ್ಟಿಂಗ್ ದಂದೆ ಬಿರುಸಿನಲ್ಲಿ ಸಾಗುತ್ತಿದೆ.
ಇದನ್ನು ಓದಿದ್ದೀರಾ? ರಾಜ್ಯದಲ್ಲಿ ಆನ್ಲೈನ್ ಬೆಟ್ಟಿಂಗ್, ಗೇಮಿಂಗ್ ಆ್ಯಪ್ಗೆ ಕಡಿವಾಣ: ಶೀಘ್ರವೇ ಹೊಸ ಮಾನದಂಡ
ವೇಗವಾಗಿ ಮತ್ತು ಸುಲಭವಾಗಿ ಹಣ ಗಳಿಸಬಹುದೆಂಬ ಆಸೆಯಿಂದಾಗಿ ಜನರು ಬೆಟ್ಟಿಂಗ್ ಹಾವಳಿಯಲ್ಲಿ ಸಿಲುಕುತ್ತಿದ್ದಾರೆ. ತಮ್ಮ ಕಷ್ಟದ ದುಡಿಮೆಯನ್ನು ಇದರಲ್ಲಿ ತೊಡಗಿಸಿ ಬೀದಿಗೆ ಬೀಳುತ್ತಿದ್ದಾರೆ. ಇಂತಹ ಜನರನ್ನೇ ಗುರಿಯಾಗಿಸಿಕೊಂಡು ಈಗ ಬೆಟ್ಟಿಂಗ್ ಜಾಲ ವಿಸ್ತರಿಸಿಕೊಳ್ಳುತ್ತಿದೆ.
ಇನ್ನು ಇತ್ತೀಚೆಗೆ ಕ್ಲೌಡ್‌ಸೆಕ್ ಬಿಡುಗಡೆ ಮಾಡಿದ ವರದಿ ಪ್ರಕಾರ ಪ್ರತಿ ಐಪಿಎಲ್ ಸೀಸನ್‌ನಲ್ಲಿ ಬಳಕೆದಾರರನ್ನು ಅಕ್ರಮ ಬೆಟ್ಟಿಂಗ್ ಸೈಟ್‌ಗಳಿಗೆ ಆಕರ್ಷಿತರಾಗಿ ಹಣ ಕಳೆದುಕೊಳ್ಳುವುದು ಸಾಮಾನ್ಯವಾಗುತ್ತಿದೆ. ಬೆಟ್ಟಿಂಗ್ ಮಾಡಲೆಂದು ಸೈಟ್ ತೆರೆದವರು ಬಳಿಕ ಬೆದರಿಕೆಗೆ, ಬ್ಲ್ಯಾಕ್‌ಮೇಲ್‌ಗೆ ಗುರಿಯಾಗುತ್ತಿದ್ದಾರೆ.
ವಿದೇಶಿ ಮೂಲದ ಮತ್ತು ಅಕ್ರಮ ಬೆಟ್ಟಿಂಗ್ ಆ್ಯಪ್‌ಗಳು, ವೆಬ್‌ಸೈಟ್‌ಗಳು ಯಾವುದೇ ಅಡೆತಡೆಯಿಲ್ಲದೆ ಲಭ್ಯವಿರುವುದರಿಂದ ಜನರು ಸುಲಭವಾಗಿ ಮೊಬೈಲ್ ಮೂಲಕವೇ ಹಣ ಪಣಕ್ಕಿಡುತ್ತಿದ್ದಾರೆ. ಟೆಲಿಗ್ರಾಮ್, ವಾಟ್ಸಾಪ್ ಗ್ರೂಪ್‌ಗಳು ಮತ್ತು ಇನ್‌ಸ್ಟಾಗ್ರಾಮ್‌ಗಳಲ್ಲಿ “ಫಿಕ್ಸ್ಡ್ ಬೆಟ್ಟಿಂಗ್ ಟಿಪ್ಸ್” ನೀಡುವುದಾಗಿ ನಂಬಿಸಿ ಜನರನ್ನು ವಂಚಿಸುವ ದೊಡ್ಡ ಜಾಲವೇ ಸೃಷ್ಟಿಯಾಗಿದೆ. ಕೆಲವು ಗೇಮಿಂಗ್ ಆ್ಯಪ್‌ಗಳಿಗೆ ಪ್ರಮುಖ ವ್ಯಕ್ತಿಗಳು ಪ್ರಚಾರ ನೀಡುವುದರಿಂದ, ಅದು ಕಾನೂನುಬದ್ಧ ಇರಬಹುದೆಂದು ಸಾಮಾನ್ಯ ಜನರು ಭ್ರಮಿಸುತ್ತಿದ್ದಾರೆ.
ಆದರೆ ಬೆಟ್ಟಿಂಗ್ ಜಾಲದಲ್ಲಿ ಸಿಲುಕುವ ಮುನ್ನ ಎಚ್ಚರವಾಗಿರಿ. ಆರಂಭದಲ್ಲಿ ಸಣ್ಣ ಮೊತ್ತ ಗೆದ್ದಂತೆ ಅನಿಸಿದರೂ, ಕೊನೆಗೆ ಲಕ್ಷಾಂತರ ರೂಪಾಯಿ ಸಾಲದ ಸುಳಿಗೆ ನೀವು ಸಿಲುಕಬಹುದು. ಇಂತಹ ಆನ್ಲೈನ್ ಆಮಿಷಗಳಿಗೆ ಬಲಿಯಾಗದಿರುವುದೇ ಇದಕ್ಕೆ ಏಕೈಕ ಪರಿಹಾರ. ಕ್ರಿಕೆಟ್ ಅನ್ನು ಕೇವಲ ಒಂದು ಕ್ರೀಡೆಯಾಗಿ ನೋಡಿ ಆನಂದಿಸಿ, ಜೀವನದ ದುಡಿಮೆಯನ್ನು ಪಣಕ್ಕಿಡಬೇಡಿ. ಆಮಿಷಕ್ಕೆ ಬಲಿಯಾಗಿ ಕೈ ಸುಟ್ಟುಕೊಳ್ಳಬೇಡಿ!
