2027ರ ಮಾರ್ಚ್ ತಿಂಗಳಿನಿಂದ ದೇಶದ ಎಲ್ಲಾ ಸರ್ಕಾರಿ, ಕಾನೂನು, ವಾಣಿಜ್ಯ ಹಾಗೂ ಡಿಜಿಟಲ್ ಸಂಸ್ಥೆಗಳಿಗೆ ‘ಭಾರತೀಯ ಪ್ರಮಾಣಿತ ಸಮಯ’ವನ್ನು (Indian Standard Time – IST) ಬಳಸುವುದು ಕಡ್ಡಾಯವಾಗಲಿದೆ. ದೇಶದ್ಯಾಂತ ಏಕರೂಪದ ಕಾಲಮಾನ ಹಾಗೂ ಡಿಜಿಟಲ್ ಮೂಲಸೌಕರ್ಯಗಳ ಭದ್ರತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಈ ನಿರ್ಧಾರ ಮಾಡಲಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯವು ಲೀಗಲ್ ಮೆಟ್ರಾಲಜಿ (ಇಂಡಿಯನ್ ಸ್ಟ್ಯಾಂಡರ್ಡ್ ಟೈಮ್) ನಿಯಮಗಳು, 2026 ಅನ್ನು ಅಧಿಸೂಚಿಸಿದ್ದು, ಈ ನಿಯಮಗಳು ಗೆಜೆಟ್‌ನಲ್ಲಿ ಪ್ರಕಟಗೊಂಡ 180 ದಿನಗಳ ನಂತರ ಅಂದರೆ 2027ರ ಮಾರ್ಚ್ ವೇಳೆಗೆ ಅಧಿಕೃತವಾಗಿ ಜಾರಿಗೆ ಬರಲಿವೆ.
ಇದನ್ನೂ ಓದಿ: ಕಾಲಮಾನ | ಇರಾನ್‌ ಮೇಲಿನ ಇಸ್ರೇಲ್, ಅಮೆರಿಕ ಯುದ್ಧ- ಈ ಮೌನ ಭಾರತಕ್ಕೆ ಶೋಭೆಯಲ್ಲ
ಪ್ರಸ್ತುತ ದೇಶದ ಹಲವು ಟೆಲಿಕಾಂ ಸಂಸ್ಥೆಗಳು, ಇಂಟರ್ನೆಟ್ ಸೇವಾದಾತರು, ಬ್ಯಾಂಕಿಂಗ್ ಜಾಲಗಳು ಮತ್ತು ಡೇಟಾ ಸೆಂಟರ್‌ಗಳು ಜಿಪಿಎಸ್ (GPS) ನಂತಹ ವಿದೇಶಿ ಸಮಯ ಮೂಲಗಳನ್ನು ಅವಲಂಬಿಸಿವೆ. ಹೊಸ ನಿಯಮ ಜಾರಿಯಾದ ನಂತರ ಎಲ್ಲಾ ಸಂಸ್ಥೆಗಳ ಸಿಸ್ಟಮ್ ಹಾಗೂ ನೆಟ್‌ವರ್ಕ್‌ಗಳು ಕಡ್ಡಾಯವಾಗಿ ಐಎಸ್‌ಟಿ ಸಮಯಕ್ಕೇ ಸಿಂಕ್ ಆಗಬೇಕಾಗುತ್ತದೆ ಎಂದು ಸರ್ಕಾರ ಹೇಳಿದೆ.
ಆನ್‌ಲೈನ್ ಪಾವತಿಗಳು, ಷೇರು ಮಾರುಕಟ್ಟೆ ವಹಿವಾಟು, 5G ನೆಟ್‌ವರ್ಕ್ ಮತ್ತು ಪವರ್ ಗ್ರಿಡ್‌ಗಳಲ್ಲಿ ಮೈಕ್ರೋಸೆಕೆಂಡ್ ಮಟ್ಟದ ಸಮಯದ ವ್ಯತ್ಯಾಸವೂ ಸೈಬರ್ ದಾಳಿ ಅಥವಾ ತಾಂತ್ರಿಕ ದೋಷಗಳಿಗೆ ಕಾರಣವಾಗಬಹುದು. ಕಡ್ಡಾಯ ಐಎಸ್‌ಟಿ ಬಳಕೆಯಿಂದ ಸಮಯದ ವ್ಯತ್ಯಾಸ (Time Discrepancy) ಇಲ್ಲವಾಗಿ ಆನ್‌ಲೈನ್ ವಂಚನೆಗಳನ್ನು ತಡೆಯಲು ಮತ್ತು ಡಿಜಿಟಲ್ ಭದ್ರತೆ ಹೆಚ್ಚಿಸಲು ನೆರವಾಗಲಿದೆ ಎಂದು ಸರ್ಕಾರ ತಿಳಿಸಿದೆ.
ಕೌನ್ಸಿಲ್ ಆಫ್ ಸೈಂಟಿಫಿಕ್ ಆಂಡ್ ಇಂಡಸ್ಟ್ರಿಯಲ್ ರಿಸರ್ಚ್ – ನ್ಯಾಷನಲ್ ಫಿಜಿಕಲ್ ಲ್ಯಾಬೊರೇಟರಿ (CSIR-NPL) ನಿರ್ವಹಿಸುವ UTC(NPLI) ಸಮಯ ಶ್ರೇಣಿ ಮತ್ತು ಇಸ್ರೋದ ‘ನಾವಿಕ್’ (NavIC) ಉಪಗ್ರಹ ವ್ಯವಸ್ಥೆಗಳ ಮೂಲಕ ಅಧಿಕೃತ ಐಎಸ್‌ಟಿ ಸಮಯವನ್ನು ಪ್ರಸಾರ ಮಾಡಲಾಗುತ್ತದೆ.
ಅಧಿಕೃತ ಉದ್ದೇಶಗಳಿಗೆ ಐಎಸ್‌ಟಿ ಹೊರತುಪಡಿಸಿ ಬೇರೆ ಯಾವುದೇ ಸಮಯದ ಮೂಲಗಳನ್ನು ಬಳಸುವುದು, ದಾಖಲಿಸುವುದು ಅಥವಾ ಪ್ರದರ್ಶಿಸುವುದನ್ನು ನಿಷೇಧಿಸಲಾಗಿದೆ (ವಿದೇಶಿ ಸಮಯದ ವಲಯಗಳನ್ನು ಸ್ಪಷ್ಟವಾಗಿ ನಮೂದಿಸುವ ಹಾಗೂ ವೈಜ್ಞಾನಿಕ ಸಂಶೋಧನೆಗಳಿಗೆ ವಿನಾಯಿತಿ ನೀಡಲಾಗಿದೆ). ನಿಯಮ ಉಲ್ಲಂಘಿಸುವ ಸಂಸ್ಥೆಗಳಿಗೆ ‘ಲೀಗಲ್ ಮೆಟ್ರಾಲಜಿ ಕಾಯ್ದೆ’ಯಡಿ ದಂಡ ವಿಧಿಸಲಾಗುತ್ತದೆ.
