ನೇಪಾಳ–ಟಿಬೆಟ್ ಗಡಿಯ ಹಿಮಾಲಯ ಪ್ರದೇಶದಲ್ಲಿ ಸಂಭವಿಸಿದ ಭಾರೀ ಹಿಮ ಕುಸಿತ ಮತ್ತು ಭೋಟೆಕೊಶಿ, ತ್ರಿಶೂಲಿ ನದಿಗಳಲ್ಲಿ ಎದ್ದ ಹಠಾತ್ ಪ್ರವಾಹ ನೇಪಾಳವನ್ನು ತೀವ್ರ ಮಾನವೀಯ ದುರಂತಕ್ಕೆ ತಳ್ಳಿದೆ. ಭಾನುವಾರ ಬೆಳಗಿನ ವೇಳೆಗೆ ಬರೋಬ್ಬರಿ 734 ಮೃತದೇಹಗಳು ಪತ್ತೆಯಾಗಿವೆ. ಇನ್ನೂ 2,498ಕ್ಕೂ ಹೆಚ್ಚು ಜನರು ನಾಪತ್ತೆಯಾಗಿದ್ದಾರೆ. ಅವರಲ್ಲಿ 275 ಮಂದಿ ಭಾರತೀಯರಿದ್ದಾರೆ ಎಂದು ನೇಪಾಳದ ರಾಷ್ಟ್ರೀಯ ವಿಪತ್ತು ಅಪಾಯ ಕಡಿತ ಮತ್ತು ನಿರ್ವಹಣಾ ಪ್ರಾಧಿಕಾರ (NDRRMA) ತಿಳಿಸಿದೆ.
ಚೀನಾ ಭಾಗದಲ್ಲಿ 900ಕ್ಕೂ ಹೆಚ್ಚು ಭಾರತೀಯರು ಸುರಕ್ಷಿತರಾಗಿದ್ದು, ಕಳೆದ ಎರಡು ದಿನಗಳಲ್ಲಿ 598 ಭಾರತೀಯರು ಟಿಬೆಟ್ ಮಾರ್ಗವಾಗಿ ನೇಪಾಳದ ಸುರಕ್ಷಿತ ಜಾಗಕ್ಕೆ ತಲುಪಿದ್ದಾರೆ. ಈವರೆಗೆ 108 ಭಾರತೀಯರನ್ನು ಭಾರತಕ್ಕೆ ಕರೆತರಲಾಗಿದೆ ಎಂದು ವರದಿಯಾಗಿದೆ.
ಹಿಮ ಕುಸಿತದ ಪರಿಣಾಮವಾಗಿ ಭೋಟೆಕೊಶಿ ನದಿ ಉಕ್ಕಿ ಹರಿದಿದ್ದು ರಸ್ತೆಗಳು, ಸೇತುವೆಗಳು, ವಿದ್ಯುತ್ ಯೋಜನೆಗಳು ಮತ್ತು ಇಡೀ ಗ್ರಾಮಗಳನ್ನೇ ಕೊಚ್ಚಿಕೊಂಡು ಹೋಗಿದೆ. ಟಿಬೆಟ್‌ನ ಗ್ಯಿರೋಂಗ್‌ನಲ್ಲೂ 16 ಮಂದಿ ಮೃತಪಟ್ಟಿದ್ದು, 546 ಮಂದಿ ನಾಪತ್ತೆಯಾಗಿದ್ದಾರೆ. ಟಿಬೆಟ್ ಮತ್ತು ನೇಪಾಳ – ಎರಡೂ ದೇಶಗಳು ಸೇರಿ ಮೃತರ ಸಂಖ್ಯೆ 750 ದಾಟಿದ್ದು, ನಾಪತ್ತೆಯಾದವರ ಸಂಖ್ಯೆ 3,000ರ ಸಮೀಪದಲ್ಲಿದೆ.
ವಿವಿಧ ಪ್ರದೇಶಗಳಿಂದ ಈವರೆಗೆ 8,186 ಜನರನ್ನು ರಕ್ಷಿಸಲಾಗಿದೆ. ತ್ರಿಶೂಲಿ 3A ಜಲವಿದ್ಯುತ್ ಯೋಜನೆಯ ಸುರಂಗದಲ್ಲಿ ನೂರಾರು ಕಾರ್ಮಿಕರು ಸಿಲುಕಿರುವ ಶಂಕೆ ಇದ್ದು, ಅವರಿಗೆ ಗಾಳಿ ತಲುಪಿಸಲು ಪೈಪ್ ಅಳವಡಿಸಿ ರಕ್ಷಣಾ ಕಾರ್ಯಾಚರಣೆ ನಡೆಸಲಾಗುತ್ತಿದೆ. ನದಿತೀರಗಳಲ್ಲಿ ಹಲವು ಅಡಿ ಕೆಸರು ತುಂಬಿರುವುದರಿಂದ ಮತ್ತು ಸೇತುವೆಗಳು ಕೊಚ್ಚಿಹೋಗಿರುವುದರಿಂದ ಹೆಲಿಕಾಪ್ಟರ್‌ಗಳ ಮೂಲಕವೇ ಕಾರ್ಯಾಚರಣೆ ನಡೆಸಲಾಗುತ್ತಿದೆ.
ನದಿಯ ಮೇಲ್ಭಾಗದಲ್ಲಿ ಮತ್ತೆ ನೀರಿನ ಮಟ್ಟ ಏರುತ್ತಿದ್ದು, ಚೀನಾ ನೀಡಿದ ಎಚ್ಚರಿಕೆಯ ಬೆನ್ನಲ್ಲೇ ನೇಪಾಳ ಸರ್ಕಾರ ನದಿತೀರದ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಸೂಚಿಸಿದೆ. ಭೂಕುಸಿತದಿಂದಾಗಿ ನದಿಗೆ ಅಡ್ಡಲಾಗಿ ನಿರ್ಮಾಣವಾಗಿರುವ ತಾತ್ಕಾಲಿಕ ಕಟ್ಟೆಗಳು ಒಡೆದರೆ ಮತ್ತೊಂದು ಭೀಕರ ಪ್ರವಾಹ ಸಂಭವಿಸುವ ಆತಂಕ ಎದುರಾಗಿದೆ.
ಅಂತರರಾಷ್ಟ್ರೀಯ ರೆಡ್ ಕ್ರಾಸ್ ಪ್ರಕಾರ 93,000ಕ್ಕೂ ಹೆಚ್ಚು ಜನರು ಪ್ರವಾಹದಿಂದ ಸಂಕಷ್ಟಕ್ಕೀಡಾಗಿದ್ದಾರೆ. ಯುನಿಸೆಫ್ ಪ್ರಕಾರ 17,000 ಮಕ್ಕಳಿಗೆ ತುರ್ತು ನೆರವಿನ ಅಗತ್ಯವಿದ್ದು, ತುರ್ತು ಪರಿಹಾರಕ್ಕಾಗಿ 17.2 ಮಿಲಿಯನ್ ಡಾಲರ್ ನೆರವು ಕೋರಿದೆ.
ಹಿಮಾಲಯ ಭಾಗದಲ್ಲಿ ತಾಪಮಾನ ಏರಿಕೆಯಿಂದ ಹಿಮನದಿಗಳು ಕರಗುತ್ತಿರುವುದೇ ಇಂತಹ ದುರಂತಗಳಿಗೆ ಕಾರಣ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಮೃತದೇಹಗಳು ನೂರಾರು ಕಿಲೋಮೀಟರ್ ಕೊಚ್ಚಿಹೋಗಿ ಭಾರತದ ಗಡಿಯನ್ನೂ ತಲುಪುತ್ತಿದ್ದು, ಡಿಎನ್‌ಎ ಪರೀಕ್ಷೆಗೆ ಭಾರತ ಸರ್ಕಾರ ಸಂಪೂರ್ಣ ನೆರವು ನೀಡುವುದಾಗಿ ಭರವಸೆ ನೀಡಿದೆ. ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದ್ದು, ಸಾವಿನ ಸಂಖ್ಯೆ ಇನ್ನಷ್ಟು ಏರುವ ಭೀತಿಯಿದೆ.
