ನಟಿ ಹಾಗೂ ಬಿಜೆಪಿ ಸಂಸದೆ ಕಂಗನಾ ರಣಾವತ್ ಮತ್ತು ಬಾಬಾ ರಾಮ್‌ದೇವ್ ನಡುವೆ ವಾಕ್ಸಮರ ತೀವ್ರಗೊಂಡಿದೆ. ಯುವಜನರ ಕುರಿತು ಕಂಗನಾ ನೀಡಿದ್ದ ಹೇಳಿಕೆಯನ್ನು ರಾಮ್‌ದೇವ್ ವಿರೋಧಿಸಿದ ಬೆನ್ನಲ್ಲೇ, ಕಂಗನಾ ಇನ್‌ಸ್ಟಾಗ್ರಾಮ್‌ ಸ್ಟೋರಿಯಲ್ಲಿ ರಾಮ್‌ದೇವ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ನನ್ನ ಬೆಡ್‌ರೂಮ್ ಕನಸು ಕಾಣಬೇಡಿ” ಎಂದು ಬಾಬಾ ರಾಮ್‌ದೇವ್‌ಗೆ ಕಂಗನಾ ತಿರುಗೇಟು ನೀಡಿದ್ದಾರೆ.
ಇತ್ತೀಚೆಗೆ ಪ್ರತಿಭಟನೆಯಲ್ಲಿ ನಿರತರಾಗಿದ್ದ ಯುವಜನರನ್ನು (Gen Z) ಕಂಗನಾ ರಣಾವತ್ ‘ಜನರೇಷನ್ ಗಟರ್’ (Gutter Generation) ಎಂದು ಕರೆದಿದ್ದರು. ಈ ಹೇಳಿಕೆಗೆ ಮಾಧ್ಯಮವೊಂದರ ಕಾರ್ಯಕ್ರಮದಲ್ಲಿ ಪ್ರತಿಕ್ರಿಯಿಸಿದ್ದ ಬಾಬಾ ರಾಮ್‌ದೇವ್, “ದೇಶದ ಯುವಕರನ್ನು ಗಟರ್ ಎಂದು ಕರೆಯುವುದು ಹಾಳಾದ ಮಾನಸಿಕತೆಯ ಸಂಕೇತ. ಅವರ ಬಾಲ್ಯ, ಹರೆಯ ಹೇಗಿತ್ತು? ಈ ಹಿಂದಿನ ಸಾಧನೆಗಳು ಹೇಗಿದ್ದವು? ಅವರ ರಾಜಕೀಯ ಪಕ್ಷವೇ ಈ ಹೇಳಿಕೆಯನ್ನು ಗಂಭೀರವಾಗಿ ಪರಿಗಣಿಸಬೇಕು” ಎಂದು ಟೀಕಿಸಿದ್ದರು. ಇದೇ ವೇಳೆ, ಕಂಗನಾ ಪ್ರತಿನಿಧಿಸುವ ಬಿಜೆಪಿ ಪಕ್ಷವು ಅವರ ಈ ಹೇಳಿಕೆಯ ಕುರಿತು ಗಮನ ಹರಿಸಿ ಕ್ರಮ ಕೈಗೊಳ್ಳಬೇಕು ಎಂದು ಸಲಹೆ ನೀಡಿದ್ದರು.
ಇದನ್ನೂ ಓದಿ: ‘ಎಮರ್ಜೆನ್ಸಿ’ ವೀಕ್ಷಿಸಲು ಕಂಗನಾ ಆಹ್ವಾನ: ಪ್ರಿಯಾಂಕಾ ಕೊಟ್ಟ ಉತ್ತರವೇನು?
ಇನ್ನು ಮಾಧ್ಯಮದವರು ಕಂಗನಾ ಅವರು ನಿಮ್ಮ ಯೋಗವನ್ನು ಬೆಂಬಲಿಸುತ್ತಾರೆ ಮತ್ತು ಸನಾತನಿ ಎಂದು ಹೇಳಿಕೊಳ್ಳುತ್ತಾರಲ್ಲವೇ ಎಂದಾಗ, “ಯಾರಾದರೂ ನನ್ನ ಯೋಗವನ್ನು ಹೊಗಳಿದರೆಂದ ಮಾತ್ರಕ್ಕೆ ನಾನು ಅವರ ತಪ್ಪುಗಳನ್ನು ಅಥವಾ ಪಾಪಗಳನ್ನು ಮುಚ್ಚಿಹಾಕಲು ಸಾಧ್ಯವೇ?” ಎಂದು ಮರುಪ್ರಶ್ನಿಸಿದ್ದರು.
ಇದೀಗ ಬಾಬಾ ರಾಮ್‌ದೇವ್ ಅವರ ಈ ಹೇಳಿಕೆಗಳಿಗೆ ತಿರುಗೇಟು ನೀಡಿರುವ ಕಂಗನಾ ರಣಾವತ್, ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಸ್ಟೋರಿ ಹಾಕಿಕೊಂಡಿದ್ದಾರೆ. “ಬಾಬಾ ಜಿ, ನನ್ನ ಹರೆಯ ಅಥವಾ ಬೆಡ್‌ರೂಮ್ ಬಗ್ಗೆ ನೀವು ಹಗಲುಗನಸು ಕಾಣಬೇಡಿ. ವದಂತಿ ಮತ್ತು ಗಾಸಿಪ್‌ಗಳ ಆಧಾರದ ಮೇಲಷ್ಟೇ ಯಾರನ್ನಾದರೂ ಅಳೆಯಲು ಸಾಧ್ಯ” ಎಂದು ಬರೆದುಕೊಂಡಿದ್ದಾರೆ.
ಹಾಗೆಯೇ ಬಾಬಾ ರಾಮ್‌ದೇವ್ ಅವರ ಪತಂಜಲಿ ಸಂಸ್ಥೆಯ ವಿರುದ್ಧ ಇರುವ ಪ್ರಕರಣಗಳತ್ತವೂ ಕಂಗನಾ ಬೊಟ್ಟು ಮಾಡಿದ್ದಾರೆ. 2024ರಲ್ಲಿ ಪತಂಜಲಿ ಸಂಸ್ಥೆಯ ದಾರಿ ತಪ್ಪಿಸುವ ಜಾಹೀರಾತುಗಳ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌ನಿಂದ ಬಾಬಾ ರಾಮ್‌ದೇವ್ ಅವರು ಎದುರಿಸಿದ್ದ ಕಾನೂನು ತಗಾದೆಯನ್ನು ಕಂಗನಾ ನೆನಪಿಸಿದ್ದಾರೆ. “ಕನಿಷ್ಠ ಸುಳ್ಳು ಹಾಗೂ ವಂಚನೆಯ ಔಷಧೀಯ ಕ್ಲೇಮ್‌ಗಳಿಗಾಗಿ ಸುಪ್ರೀಂ ಕೋರ್ಟ್‌ನಿಂದ ನನಗೆ ಎಂದೂ ಛೀಮಾರಿ ಸಿಕ್ಕಿಲ್ಲ. ಆದ್ದರಿಂದ ನನಗೆ ಚಾರಿತ್ರ್ಯದ ಪಾಠ ಕಲಿಸಲು ಬರಬೇಡಿ. ನನ್ನ ಚಾರಿತ್ರ್ಯ ನಿಮ್ಮಗಿಂತ ಎಷ್ಟೋ ಉತ್ತಮವಾಗಿದೆ” ಎಂದು ಹೇಳಿದ್ದಾರೆ.
