ಅಮೆರಿಕದ ನ್ಯೂಯಾರ್ಕ್‌ನಲ್ಲಿ ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ಭಾರತದ ವೈವಿಧ್ಯತೆ ಹಾಗೂ ಏಕತೆಯ ಕುರಿತು ನೀಡಿರುವ ಹೇಳಿಕೆಗೆ ಹಿರಿಯ ನ್ಯಾಯವಾದಿ ಹಾಗೂ ರಾಜ್ಯಸಭಾ ಸಂಸದ ಕಪಿಲ್ ಸಿಬಲ್ ತೀವ್ರ ವ್ಯಂಗ್ಯವಾಡಿದ್ದಾರೆ. “ವಿದೇಶದಲ್ಲಿ ಜ್ಞಾನದ ಮಾತುಗಳು, ದೇಶದಲ್ಲಿ ಮೌನ” ಎಂದು ಹೇಳುವ ಮೂಲಕ ಕಪಿಲ್ ಸಿಬಲ್, ಭಾಗವತ್ ಅವರ ನಿಲುವನ್ನು ಕಟುವಾಗಿ ವಿಮರ್ಶಿಸಿದ್ದಾರೆ. ಹಾಗೆಯೇ ಭಾರತದಲ್ಲಿ ಕೋಮು ಗಲಭೆಗಳಾದ ಸಂದರ್ಭದಲ್ಲಿ ಮೋಹನ್ ಭಾಗವತ್ ಅವರ ಮೌನವನ್ನು ಕಪಿಲ್ ಸಿಬಲ್ ಪ್ರಶ್ನಿಸಿದ್ದಾರೆ.
ಅಮೆರಿಕ ಪ್ರವಾಸದಲ್ಲಿರುವ ಆರ್‌ಎಸ್‌ಎಸ್ ಸರಸಂಘಚಾಲಕ ಮೋಹನ್ ಭಾಗವತ್ ಅವರು ನ್ಯೂಯಾರ್ಕ್‌ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಾ, “ವೈವಿಧ್ಯತೆಯು ನಮ್ಮ ಭಾರತದ ಅಂತರ್ಗತ ಏಕತೆಯ ಶೃಂಗಾರ. ಇದನ್ನು ಪ್ರತಿಯೊಬ್ಬರೂ ರಕ್ಷಿಸಬೇಕು” ಎಂದಿದ್ದರು.
ಇದನ್ನೂ ಓದಿ: ಬಹುಮತವಿಲ್ಲದ ರಾಜ್ಯಗಳಲ್ಲಿ ಅಧಿಕಾರ ಪಡೆಯುವ ಬಿಜೆಪಿ ತಂತ್ರವನ್ನು ವಿವರಿಸಿದ ಕಪಿಲ್ ಸಿಬಲ್
ಹಾಗೆಯೇ, “ಭಾರತದ ಡಿಎನ್‌ಎಯಲ್ಲೇ ಏಕತೆ ಮತ್ತು ವೈವಿಧ್ಯತೆ ಅಡಗಿದೆ. ಭಾರತದಲ್ಲಿ ಮುಸ್ಲಿಮರು ಇರಬಾರದು ಎಂದು ಯಾವುದೇ ಹಿಂದು ಭಾವಿಸಿದರೆ, ಅವರು ಹಿಂದುವಾಗಿಯೇ ಉಳಿಯುವುದಿಲ್ಲ” ಎಂದು ಪ್ರತಿಪಾದಿಸಿದ್ದರು.
ಭಾಗವತ್ ಅವರ ಈ ಹೇಳಿಕೆಯನ್ನು ಉಲ್ಲೇಖಿಸಿ ‘ಎಕ್ಸ್’ (ಟ್ವಿಟರ್) ಖಾತೆಯಲ್ಲಿ ಪೋಸ್ಟ್ ಮಾಡಿರುವ ಕಪಿಲ್ ಸಿಬಲ್, “ವಿದೇಶಕ್ಕೆ ಹೋದಾಗ ಜ್ಞಾನದ ಮಾತುಗಳನ್ನಾಡುವ ಭಾಗವತ್, ಸ್ವದೇಶದಲ್ಲಿ ನಡೆಯುವ ಘಟನೆಗಳ ಬಗ್ಗೆ ಮೌನ ವಹಿಸುತ್ತಾರೆ. ಕೇವಲ ಮಾತುಗಳು ಮುಖ್ಯವಲ್ಲ, ನಡೆ-ನುಡಿಗಳಲ್ಲಿ ಅದು ಕಾಣಿಸಬೇಕು” ಎಂದು ಟೀಕಿಸಿದ್ದಾರೆ.
ದೇಶದಲ್ಲಿ ವೈವಿಧ್ಯತೆ ಮತ್ತು ಏಕತೆಗೆ ಧಕ್ಕೆಯಾಗುವ ಘಟನೆಗಳು ಸಂಭವಿಸಿದಾಗ ಮೌನ ವಹಿಸಿ, ವಿದೇಶದ ವೇದಿಕೆಗಳಲ್ಲಿ ಮಾತ್ರ ಜ್ಞಾನೋಪದೇಶ ಮಾಡುವುದು ವಿಪರ್ಯಾಸ ಎಂದು ಸಿಬಲ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
