ಸುಪ್ರೀಂ ಕೋರ್ಟ್ನಲ್ಲಿ ನಡೆದ ಅತ್ಯಂತ ಅಸಾಧಾರಣ ಮತ್ತು ಗಂಭೀರ ಬೆಳವಣಿಗೆಯೊಂದು ನಡೆದಿದೆ. ಮುಖ್ಯ ನ್ಯಾಯಮೂರ್ತಿ (ಸಿಜೆಐ) ಸೂರ್ಯಕಾಂತ್ ಅವರ ವಿರುದ್ಧ ವಕೀಲರೊಬ್ಬರು ಆಕ್ರೋಶಗೊಂಡು, ಆಕ್ಷೇಪಾರ್ಹ ಟೀಕೆಗಳನ್ನು ಮಾಡಿದ್ದಾರೆ. “ನೀವು ಆ ಕುರ್ಚಿಗೆ ಅರ್ಹರಲ್ಲ” ಎಂದು ಸಿಜೆಐ ವಿರುದ್ದ ವಾಗ್ದಾಳಿ ನಡೆಸಿದ್ದಾರೆ.
ಸುಪ್ರೀಂ ಕೋರ್ಟ್ನಲ್ಲಿ ಕಲಾಪ ನಡೆಯುತ್ತಿದ್ದ ವೇಳೆ, ವಕೀಲರೊಬ್ಬರು ತಮ್ಮ ಮೇಲಿನ ನ್ಯಾಯಾಂಗ ನಿಂದನೆ ಪ್ರಕರಣಕ್ಕೆ ಸಂಬಂಧಿಸಿದ ಅರ್ಜಿಯನ್ನು ತುರ್ತಾಗಿ ವಿಚಾರಣೆಗೆ ಪರಿಗಣಿಸುವಂತೆ ಪಟ್ಟು ಹಿಡಿದರು. “ಈ ವಿಷಯವನ್ನು ನವೆಂಬರ್ 2ರಂದೇ ನ್ಯಾಯಮೂರ್ತಿಗಳ (ಸಿಜೆಇ) ಕಚೇರಿಗೆ ಸಲ್ಲಿಸಲಾಗಿತ್ತು. 15 ದಿನಗಳು ಕಳೆದರೂ ಯಾವುದೇ ಪ್ರತಿಕ್ರಿಯೆ ಸಿಕ್ಕಿಲ್ಲ, ಹಾಗಾಗಿ ನಾನು ಅನಿವಾರ್ಯವಾಗಿ ನ್ಯಾಯಾಲಯದ ಮುಂದೆ ಬರಬೇಕಾಯಿತು” ಎಂದು ಆ ವಕೀಲರು ವಾದಿಸಿದರು.
ಇದನ್ನೂ ಓದಿ: ಸಿಇಸಿ ವಿರುದ್ಧದ ಕಾದಾಟಕ್ಕೆ ಸುಪ್ರೀಂ ಕೋರ್ಟ್ಅನ್ನು ಎಳೆಯಬೇಡಿ: ಸಿಜೆಐ ಸೂರ್ಯಕಾಂತ್
ಆಗ ಪೀಠದಲ್ಲಿದ್ದ ನ್ಯಾಯಮೂರ್ತಿ ವಿ. ಮೊಹನಾ ಅವರು, “ಈ ರೀತಿಯಲ್ಲಿ ಯಾವುದೇ ವಿಷಯವನ್ನು ಪ್ರಸ್ತಾಪಿಸಲು ಬರುವುದಿಲ್ಲ” ಎಂದು ಎಚ್ಚರಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ವಕೀಲರು, ತುರ್ತು ಪರಿಸ್ಥಿತಿಯಿರುವ ಕಾರಣ ತಾವು ಬಂದಿರುವುದಾಗಿ ಸಮರ್ಥಿಸಿಕೊಂಡರು.
ಸ್ಥಿತಿಯ ಗಂಭೀರತೆಯನ್ನು ಗಮನಿಸಿದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರು, ವಕೀಲರಿಗೆ ಶಾಂತವಾಗಿರಲು ಸೂಚಿಸಿ, “ನಾವು ಪರಿಶೀಲಿಸುತ್ತೇವೆ, ನೀವು ಸ್ವಲ್ಪ ಕಾಯಿರಿ” ಎಂದು ತಿಳಿಸಿದರು. ಆದರೆ, ಸಿಜೆಇ ಸೂಚನೆಯನ್ನು ದಿಕ್ಕರಿಸಿದ ಆ ವಕೀಲರು ಮಾತನಾಡಿ, “ನಾನು ಕಾಯುವುದಿಲ್ಲ. ನೀವು ಆ ಕುರ್ಚಿಯಲ್ಲಿ ಕೂರಲು ಅರ್ಹರಲ್ಲ. ನಿಮಗೆ ಅದಕ್ಕೆ ತಕ್ಕ ಸಮಗ್ರತೆ (ಇಂಟೆಗ್ರಿಟಿ) ಇಲ್ಲ!” ಎಂದು ನೇರವಾಗಿ ಮುಖ್ಯ ನ್ಯಾಯಮೂರ್ತಿಯವರನ್ನು ಉದ್ದೇಶಿಸಿ ಏಕವಚನದಲ್ಲಿ ಆಕ್ರೋಶ ಹೊರಹಾಕಿದರು.
ವಕೀಲರಿಂದ ಈ ರೀತಿಯ ಅನಿರೀಕ್ಷಿತ ವರ್ತನೆ ಮತ್ತು ವೈಯಕ್ತಿಕ ಟೀಕೆಗಳು ಬಂದ ತಕ್ಷಣವೇ ಸುಪ್ರೀಂ ಕೋರ್ಟ್ ಆಡಳಿತ ಮಂಡಳಿಯು, ನ್ಯಾಯಾಲಯದ ಕಲಾಪದ ಲೈವ್ ಪ್ರಸ್ರಾರದ ಆಡಿಯೋ ಮತ್ತು ವಿಡಿಯೋ ಫೀಡ್ ಅನ್ನು ತಕ್ಷಣವೇ ಕಟ್/ಮ್ಯೂಟ್ ಮಾಡಿತು.
ಇದರ ಬೆನ್ನಲ್ಲೇ, ಕೋರ್ಟ್ರೂಮ್ನಲ್ಲಿದ್ದ ಭದ್ರತಾ ಸಿಬ್ಬಂದಿ ಮತ್ತು ಇತರೆ ವಕೀಲರ ಆಗ್ರಹದ ಮೇರೆಗೆ ಆ ವಕೀಲರನ್ನು ಬಲವಂತವಾಗಿ ಕೋರ್ಟ್ ರೂಮ್ನಿಂದ ಹೊರಲುವಂತೆ ಕಳುಹಿಸಲಾಯಿತು. ಕಲಾಪದಲ್ಲಿ ಹಾಜರಿದ್ದ ಇತರ ವಕೀಲರು ಸಹ ಈ ವರ್ತನೆಯನ್ನು ತೀವ್ರವಾಗಿ ಖಂಡಿಸಿ, ವಕೀಲರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಸಿಜೆಇ ಅವರನ್ನು ಒತ್ತಾಯಿಸಿದರು.



