Instagram ನಲ್ಲಿರುವ ಕೆಲವು ಫೀಚರ್ಗಳನ್ನು ಬಳಸಿಕೊಂಡು ಮೂಲ ಕಂಟೆಂಟ್ಗಳ ಕಾಪಿರೈಟ್ ಉಲ್ಲಂಘನೆ ಮಾಡಬಹುದೇ ಎಂಬ ಕುರಿತು ದೆಹಲಿ ಹೈಕೋರ್ಟ್ ಮೆಟಾ ಸಂಸ್ಥೆಯನ್ನು ಪ್ರಶ್ನಿಸಿದೆ. ಬೇರೆಯವರು ಅಪ್ಲೋಡ್ ಮಾಡಿದ ರೀಲ್ಸ್ಗಳನ್ನು ಪಡೆದು ಅದರಲ್ಲಿ ಬದಲಾವಣೆ ಮಾಡಿ ತಮ್ಮದೇ ಖಾತೆಯಲ್ಲಿ ಮರುಅಪ್ಲೋಡ್ ಮಾಡಲು ಅವಕಾಶ ನೀಡುವ ಫೀಚರ್ ದುರ್ಬಳಕೆಯಾಗುವ ಸಾಧ್ಯತೆಯ ಬಗ್ಗೆ ನ್ಯಾಯಮೂರ್ತಿ ಅನೂಪ್ ಜೈರಾಮ್ ಭಂಭಾನಿ ಆತಂಕ ವ್ಯಕ್ತಪಡಿಸಿದ್ದಾರೆ.
ಡಾ. ವಿಕಾಸ್ ದಿವ್ಯಕೀರ್ತಿ Vs ಮೆಟಾ ಪ್ಲಾಟ್ಫಾರ್ಮ್ಸ್ ಪ್ರಕರಣದ ವಿಚಾರಣೆ ವೇಳೆ ನ್ಯಾಯಾಲಯ ಈ ಪ್ರಶ್ನೆಗಳನ್ನು ಎತ್ತಿದೆ. ಇನ್ಸ್ಟಾಗ್ರಾಂನ ‘ರೀಮಿಕ್ಸ್’ ಫೀಚರ್ ಅನ್ನು ಉಲ್ಲೇಖಿಸಿದ ನ್ಯಾಯಾಲಯ, ಸಾರ್ವಜನಿಕವಾಗಿ ಲಭ್ಯವಿರುವ ರೀಲ್ ಅಥವಾ ವಿಡಿಯೊವನ್ನು ಬಳಸಿ ಅದಕ್ಕೆ ಸ್ವಂತ ವಿಡಿಯೊ ಸೇರಿಸಿ ಹೊಸ ರೀಲ್ ಸೃಷ್ಟಿಸಿ ಅಪ್ಲೋಡ್ ಮಾಡಬಹುದಾದ ವ್ಯವಸ್ಥೆಯ ದುರ್ಬಳಕೆಯ ಸಾಧ್ಯತೆಯನ್ನು ಪ್ರಶ್ನಿಸಿದೆ.
ಮೆಟಾ ಪರ ವಕೀಲ ವರುಣ್ ಪಾಠಕ್ ಅವರನ್ನು ಉದ್ದೇಶಿಸಿ ನ್ಯಾಯಮೂರ್ತಿ ಭಂಭಾನಿ, ಬೇರೊಬ್ಬರು ಸಿದ್ಧಪಡಿಸಿದ ವಿಡಿಯೊವನ್ನು ತೆಗೆದುಕೊಂಡು ಅದನ್ನು ತಮ್ಮದೇ ವಿಡಿಯೊದಂತೆ ಬಳಸಿಕೊಳ್ಳುವ ಅವಕಾಶವಿರುವುದನ್ನು ಪ್ರಶ್ನಿಸಿದರು. ಇಂತಹ ಫೀಚರ್ಗಳು ಕಾಪಿರೈಟ್ ಉಲ್ಲಂಘನೆಗೆ ಸಾಧನವಾಗಬಹುದೇ ಎಂಬ ಬಗ್ಗೆ ಮೆಟಾ ಸ್ಪಷ್ಟನೆ ನೀಡಬೇಕು ಎಂದು ನ್ಯಾಯಾಲಯ ಸೂಚಿಸಿತು. ಮೆಟಾ ಪರ ವಕೀಲರು ನ್ಯಾಯಾಲಯದ ಆತಂಕವನ್ನು ಪರಿಶೀಲಿಸುವುದಾಗಿ ತಿಳಿಸಿದರು.
ವಿಚಾರಣೆ ವೇಳೆ ನ್ಯಾಯಮೂರ್ತಿ ಭಂಭಾನಿ, ಇಂತಹ ಶಕ್ತಿಶಾಲಿ ಡಿಜಿಟಲ್ ಸಾಧನಗಳ ದುರ್ಬಳಕೆಯ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದರು. ಯಾವುದೇ ವ್ಯಕ್ತಿ ತಂತ್ರಜ್ಞಾನವನ್ನು ಹೇಗೆ ಬಳಸುತ್ತಾರೆ ಎಂಬುದನ್ನು ವೇದಿಕೆಗಳು ಸಂಪೂರ್ಣವಾಗಿ ನಿಯಂತ್ರಿಸಲು ಸಾಧ್ಯವಾಗದಿದ್ದರೂ, ದುರ್ಬಳಕೆಯನ್ನು ತಡೆಯಲು ಅಗತ್ಯ ಸುರಕ್ಷತಾ ಕ್ರಮಗಳ ಅಗತ್ಯವಿದೆ ಎಂಬ ವಿಚಾರ ಚರ್ಚೆಗೆ ಬಂತು.
This video cannot be played in your browser. Open the video directly
ದೃಷ್ಟಿ ಐಎಎಸ್ ಸಂಸ್ಥೆಯ ಸ್ಥಾಪಕ ಹಾಗೂ ಶಿಕ್ಷಣತಜ್ಞ ವಿಕಾಸ್ ದಿವ್ಯಕೀರ್ತಿ, ತಮ್ಮ ವ್ಯಕ್ತಿತ್ವ ಹಕ್ಕುಗಳ ರಕ್ಷಣೆ ಕೋರಿ ದೆಹಲಿ ಹೈಕೋರ್ಟ್ನಲ್ಲಿ ಮೊಕದ್ದಮೆ ಹೂಡಿದ್ದಾರೆ. ತಮ್ಮ ಹೆಸರಿನಲ್ಲಿ ನಕಲಿ ಸಾಮಾಜಿಕ ಮಾಧ್ಯಮ ಖಾತೆಗಳನ್ನು ಸೃಷ್ಟಿಸುವುದು, ಡೀಪ್ಫೇಕ್ ವಿಡಿಯೊಗಳನ್ನು ತಯಾರಿಸುವುದು, ನಕಲಿ ಜಾಹೀರಾತುಗಳಲ್ಲಿ ತಮ್ಮ ಚಿತ್ರ ಬಳಸುವುದು ಹಾಗೂ ತಮ್ಮ ಉಪನ್ಯಾಸಗಳ ಕೆಲವು ಭಾಗಗಳನ್ನು ಅನುಮತಿಯಿಲ್ಲದೆ ಬಳಸಿರುವುದಾಗಿ ಅವರು ಆರೋಪಿಸಿದ್ದಾರೆ.
ದಿವ್ಯಕೀರ್ತಿ ಪರ ಹಿರಿಯ ವಕೀಲೆ ದಿಯಾ ಕಪೂರ್, ಅವರ ಉಪನ್ಯಾಸಗಳ ಕೆಲವು ಭಾಗಗಳನ್ನು ಆಯ್ದು ಬಳಸಿ ಅವರನ್ನು ಹಿಂದೂ ವಿರೋಧಿ ಹಾಗೂ ಬ್ರಾಹ್ಮಣ ವಿರೋಧಿ ಎಂದು ಬಿಂಬಿಸುವ ಪ್ರಯತ್ನ ನಡೆದಿದೆ ಎಂದು ನ್ಯಾಯಾಲಯದ ಗಮನಕ್ಕೆ ತಂದರು. ಬೆಟ್ಟಿಂಗ್ ಜಾಹೀರಾತಿನಲ್ಲೂ ದಿವ್ಯಕೀರ್ತಿಯ ಚಿತ್ರವನ್ನು ಡೀಪ್ಫೇಕ್ ಮೂಲಕ ಬಳಸಲಾಗಿದೆ ಎಂದು ಅವರು ಆರೋಪಿಸಿದರು.
ಮೆಟಾ ಪರ ವಕೀಲರು, ಇಂತಹ ಸಮಸ್ಯೆಗಳಿಗೆ ಮಾಹಿತಿ ತಂತ್ರಜ್ಞಾನ ಕಾಯ್ದೆ ಮತ್ತು ನಿಯಮಗಳ ಅಡಿಯಲ್ಲಿ ಲಭ್ಯವಿರುವ ಪರಿಹಾರಗಳನ್ನು ಬಳಸಬಹುದು ಎಂದು ವಾದಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ದಿವ್ಯಕೀರ್ತಿ ಪರ ವಕೀಲೆ, ಆ ವ್ಯವಸ್ಥೆಗಳು ಹೆಚ್ಚು ಒತ್ತಡದಲ್ಲಿದ್ದು ಪರಿಣಾಮಕಾರಿ ಪರಿಹಾರ ಸಿಗಲು ಸಮಯ ಹಿಡಿಯುತ್ತದೆ ಎಂದು ವಾದಿಸಿದರು.
ಸಾಮಾಜಿಕ ಮಾಧ್ಯಮ ಖಾತೆಗಳಿಗೆ ಕಾಪಿರೈಟ್ ಸ್ಟ್ರೈಕ್ ನೀಡುವ ವ್ಯವಸ್ಥೆಯ ದುರ್ಬಳಕೆಯ ಬಗ್ಗೆಯೂ ವಿಚಾರಣೆ ವೇಳೆ ಚರ್ಚೆ ನಡೆಯಿತು. ಕಾಪಿರೈಟ್ ಉಲ್ಲಂಘನೆಯ ಬಗ್ಗೆ ಸುಳ್ಳು ದೂರು ನೀಡಿದ ವ್ಯಕ್ತಿಯ ಕ್ರಮ ತಕ್ಷಣ ಪರಿಣಾಮ ಬೀರುತ್ತದೆ. ಆದರೆ ಆ ಸ್ಟ್ರೈಕ್ಗೆ ಒಳಗಾದ ಮೂಲ ಕಂಟೆಂಟ್ ಸೃಷ್ಟಿಕರ್ತರು ತಮ್ಮ ಖಾತೆ ಅಥವಾ ಕಂಟೆಂಟ್ ಮರುಸ್ಥಾಪಿಸಿಕೊಳ್ಳಲು ದೀರ್ಘ ಪ್ರಕ್ರಿಯೆ ಎದುರಿಸಬೇಕಾಗುತ್ತದೆ ಎಂದು ನ್ಯಾಯಾಲಯ ಗಮನಿಸಿತು.
ಇದನ್ನೂ ಓದಿ: ಮೆಟಾ ವೇದಿಕೆಯಲ್ಲೇ ಕರಾಳ ದಂಧೆ: ಇನ್ಸ್ಟಾ ಜಾಹೀರಾತಿನಲ್ಲೇ ಮಕ್ಕಳ ದೌರ್ಜನ್ಯದ ಕಂಟೆಂಟ್ ಮಾರಾಟ
ಸಾಮಾಜಿಕ ಮಾಧ್ಯಮ ವೇದಿಕೆಗಳು ಕಾಪಿರೈಟ್ ದೂರುಗಳ ಆಧಾರದ ಮೇಲೆ ಖಾತೆಗಳನ್ನು ಅಮಾನತುಗೊಳಿಸುವಾಗ ಸೂಕ್ತ ಪರಿಶೀಲನೆ ನಡೆಸಬೇಕು ಎಂಬ ವಾದವೂ ವಿಚಾರಣೆಯಲ್ಲಿ ಕೇಳಿಬಂತು. ಮೆಟಾ ಪರ ವಕೀಲರು, ಪ್ರತಿಯೊಂದು ಪ್ರಕರಣವನ್ನೂ ಮಾನವೀಯವಾಗಿ ನಿರಂತರವಾಗಿ ಪರಿಶೀಲಿಸುವುದು ಕಾರ್ಯಸಾಧ್ಯವಲ್ಲ; ಹಲವು ಕ್ರಮಗಳು ಸ್ವಯಂಚಾಲಿತ ವ್ಯವಸ್ಥೆಯ ಮೂಲಕ ನಡೆಯುತ್ತವೆ ಎಂದು ವಾದಿಸಿದರು.
ವಿಚಾರಣೆಯ ಸಂದರ್ಭದಲ್ಲಿ ದಿವ್ಯಕೀರ್ತಿಗೆ ಮಧ್ಯಂತರ ಪರಿಹಾರ ನೀಡಿದ ನ್ಯಾಯಾಲಯ, ಕೆಲವು ಡೀಪ್ಫೇಕ್ ವಿಡಿಯೊಗಳು ಮತ್ತು ಸಂಬಂಧಿತ ವೆಬ್ಲಿಂಕ್ಗಳನ್ನು ತೆಗೆದುಹಾಕುವಂತೆ ಸಾಮಾಜಿಕ ಮಾಧ್ಯಮ ಮಧ್ಯವರ್ತಿ ಸಂಸ್ಥೆಗಳಿಗೆ ನಿರ್ದೇಶನ ನೀಡಿದೆ. ಅಲ್ಲದೆ, ಕಾಪಿರೈಟ್ ಉಲ್ಲಂಘನೆ ಮಾಡಿರುವ ಕಂಟೆಂಟ್ಗಳನ್ನು ಅಪ್ಲೋಡ್ ಮಾಡಿದವರ ಮೂಲಭೂತ ಚಂದಾದಾರರ ಮಾಹಿತಿ ಮತ್ತು ಐಪಿ ಲಾಗ್ಗಳನ್ನು ಹಂಚಿಕೊಳ್ಳುವಂತೆ ಸಾಮಾಜಿಕ ಮಾಧ್ಯಮ ಮಧ್ಯವರ್ತಿಗಳಿಗೆ ಸೂಚಿಸಿದೆ.
