ರಾಮಮಂದಿರ ದೇಣಿಗೆ ಲೂಟಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರ್ಎಸ್ಎಸ್ ನಿಲುವನ್ನು ಕಾಂಗ್ರೆಸ್ ತೀವ್ರವಾಗಿ ಟೀಕಿಸಿದ್ದು, “ಬಾಯಲ್ಲಿ ರಾಮನಾಮ, ಬಗಲಲ್ಲಿ ಚೂರಿ” ಎಂದು ಜರೆದಿದೆ. ರಾಮಮಂದಿರದ ದೇಣಿಗೆ ಹಣ ದುರುಪಯೋಗವಾಗಿರುವ ವಿಷಯದಲ್ಲಿ ಆರ್‌ಎಸ್‌ಎಸ್‌ನ ನಿಜವಾದ ಮುಖವಾಡ ಕಳಚಿಬಿದ್ದಿದೆ ಎಂದು ಕಾಂಗ್ರೆಸ್ ಹೇಳಿದೆ.
ರಾಮಮಂದಿರದಲ್ಲಿ ದೇಣಿಗೆ ಕಳ್ಳತನ ಪ್ರಕರಣವು ಬಹಿರಂಗವಾಗಿ ಹಲವು ದಿನಗಳ ನಂತರ ಆರ್ಎಸ್ಎಸ್ ಮೌನ ಮುರಿದಿದೆ. ಆರ್ಎಸ್ಎಸ್ ಪ್ರಧಾನ ಕಾರ್ಯದರ್ಶಿ ದತ್ತಾತ್ರೇಯ ಹೊಸಬಾಳೆ ಅವರು ಈ ಘಟನೆಗೆ ತೀವ್ರ ಅಸಮಾಧಾನ ಮತ್ತು ಆಕ್ರೋಶ ವ್ಯಕ್ತಪಡಿಸಿ ಪ್ರಕಟಣೆ ಹೊರಡಿಸಿದ್ದಾರೆ.
ಇದನ್ನೂ ಓದಿ: ರಾಮಮಂದಿರ ಕಾಣಿಕೆ ಕಳವು ಪ್ರಕರಣ: ತೀವ್ರ ನೋವು ತಂದಿದೆ ಎಂದ ಆರೆಸ್ಸೆಸ್
“ಆದರೆ, ಈ ಹೇಳಿಕೆಯು ಸತ್ಯವನ್ನು ಹೊರತರುವುದಕ್ಕಲ್ಲ, ಬದಲಿಗೆ ಕೋಟ್ಯಂತರ ರೂಪಾಯಿ ದೇಣಿಗೆ ಲೂಟಿಯ ಸತ್ಯವನ್ನು ಮುಚ್ಚಿಹಾಕಲು ಮತ್ತು ಸಂಘದ ಇಮೇಜ್ ಅನ್ನು ರಕ್ಷಿಸಲು ಮಾಡಿದ ಕುತಂತ್ರದ ಪ್ರಯತ್ನ” ಎಂದು ಕಾಂಗ್ರೆಸ್ ದೂರಿದೆ
ಈ ಬಗ್ಗೆ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ ಕಾಂಗ್ರೆಸ್ ರಾಜ್ಯಸಭೆ ಸದಸ್ಯ ಪವನ್ ಖೇರಾ, “ಆರ್ಎಸ್ಎಸ್ ಕುರಿವೇಷದಲ್ಲಿರುವ ತೋಳ. ದತ್ತಾತ್ರೇಯ ಹೊಸಬಾಳೆ ಅವರ ಪ್ರದರ್ಶನಾತ್ಮಕ ಖಂಡನೆ ರಾಮ ಮಂದಿರ ನಿಧಿಯ ಲೂಟಿಯನ್ನು ಬಹಿರಂಗಪಡಿಸುವುದರ ನಿಟ್ಟಿನಲ್ಲಿ ನೀಡಿರುವುದಲ್ಲ. ಬದಲಾಗಿ ತಮ್ಮ ಘನತೆ ಉಳಿಸಿಕೊಳ್ಳುವ ಹತಾಶ ಪ್ರಯತ್ನವಾಗಿದೆ” ಎಂದು ಹೇಳಿದ್ದಾರೆ.
ಹಾಗೆಯೇ, “ವಿಡಿಯೋ ಮಾಡಿದ ನಿಜವಾದ ಉದ್ದೇಶ ಯುಪಿ ಸರ್ಕಾರದ ಎಸ್‌ಐಟಿಯನ್ನು ಸಮರ್ಥಿಸುವುದಾಗಿದೆ. ಈ ಎಸ್‌ಐಟಿ ಎಫ್‌ಐಆರ್ ದಾಖಲಾಗುವ ಮೊದಲೇ ರಚಿಸಲಾಗಿದೆ. ಈವರೆಗೆ ಸಾರ್ವಜನಿಕ ವರದಿ ನೀಡಿಲ್ಲ. ಮೊಸಳೆಯನ್ನು ರಕ್ಷಿಸಲು ಕೆಲವು ಕಾಲಾಳುಗಳನ್ನು ಬಲಿಕೊಡಲಾಗುತ್ತಿದೆ” ಎಂದು ಟೀಕಿಸಿದ್ದಾರೆ.
“ರಾಮಮಂದಿರ ನಿಧಿಯ ಲೂಟಿ ದೇಶಾದ್ಯಂತ ಹಿಂದೂಗಳ ನಂಬಿಕೆಯನ್ನು ತೀವ್ರವಾಗಿ ಘಾಸಿಗೊಳಿಸಿದೆ. ಆದರೆ ರಾಮ ಮಂದಿರ ದೇಣಿಗೆಗಳ ಕಳ್ಳತನದ ಆರೋಪದ ಬಗ್ಗೆ ಆರ್‌ಎಸ್‌ಎಸ್‌ನ ಹಠಾತ್ ಆಕ್ರೋಶ ಈ ಗಾಯಕ್ಕೆ ಉಪ್ಪು ಸವರಿದೆ. ಭಕ್ತರ ದೇಣಿಗೆಗಳನ್ನು ಕಾಪಾಡುವ ವಿಚಾರದಲ್ಲಿ ಆರ್ಎಸ್ಎಸ್ ಪ್ರಾಮಾಣಿಕವಾಗಿ ಬದ್ಧವಾಗಿದ್ದರೆ, ತನ್ನದೇ ಕಣ್ಗಾವಲಿನಲ್ಲಿ ಇರುವ ದೇವಾಲಯದಲ್ಲಿ ಇಷ್ಟೊಂದು ಪ್ರಮಾಣದಲ್ಲಿ ದುರುಪಯೋಗ ಎಂದಿಗೂ ನಡೆಯುತ್ತಿರಲಿಲ್ಲ. ಇದು ಆರ್‌ಎಸ್‌ಎಸ್‌ನ ನಿಜವಾದ ಮುಖ. ಧರ್ಮನಿಷ್ಠೆ ಒಂದು ಪ್ರದರ್ಶನ; ಲೂಟಿಯೇ ವೃತ್ತಿ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇನ್ನು ಕಾಂಗ್ರೆಸ್ ವಕ್ತಾರ ಜೈರಾಮ್‌ ರಮೇಶ್ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದು, “ಆರ್ಎಸ್ಎಸ್ ನೀಡಿದ ಕ್ಲೀನ್ ಚಿಟ್ ಅವಮಾನಕರ ಮತ್ತು ನಾಚಿಕೆಗೇಡಿನ ಸಂಗತಿ. ವಾಸ್ತವವೆಂದರೆ ಅದರ ಜಾಲದ ಬಹುಪಾಲು ಜನರು ದೊಡ್ಡ ಪ್ರಮಾಣದಲ್ಲಿ ದೇಣಿಗೆ ಕಳ್ಳತನ ನಡೆಸುತ್ತಿದ್ದಾರೆ. ಅದು ಕಪಟ ಸಂಘಟನೆ” ಎಂದು ಟೀಕಿಸಿದ್ದಾರೆ.
