ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್‌) ಮುಖವಾಣಿ ‘ಆರ್ಗನೈಸರ್’ (Organiser) ನಿಯತಕಾಲಿಕೆಯಲ್ಲಿ ಪ್ರಕಟವಾದ ಸಂಪಾದಕೀಯ ಲೇಖನದಲ್ಲಿ ಸಾಹಿತಿಗಳು, ಪತ್ರಕರ್ತರು, ವಕೀಲರು ಹಾಗೂ ಮಾನವಹಕ್ಕು ಕಾರ್ಯಕರ್ತರನ್ನು ‘ದಿಮಾಗಿ ನಕ್ಸಲ್’ ಎಂದು ಕರೆದು ಸಮರ್ಥಿಸಿಕೊಂಡಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ (X, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್) ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಸರ್ಕಾರದ ನೀತಿಗಳನ್ನು ಪ್ರಶ್ನಿಸುವವರನ್ನು ಮತ್ತು ಸ್ವತಂತ್ರ ಚಿಂತಕರನ್ನು ‘ದೇಶವಿರೋಧಿ’ಗಳಂತೆ ಚಿತ್ರಿಸಲು ಹೊಸ ಪದಗಳನ್ನು ಸೃಷ್ಟಿಸಲಾಗುತ್ತಿದೆ ಎಂದು ನೆಟ್ಟಿಗರು ಹಾಗೂ ವಿಪಕ್ಷಗಳ ನಾಯಕರು ತೀವ್ರವಾಗಿ ಟೀಕಿಸಿದ್ದಾರೆ.
ಸಂವಿಧಾನ ನೀಡಿರುವ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಹತೋಟಿ ಮಾಡಲು ಈ ರೀತಿಯ ಪದಬಳಕೆ ಮಾಡಲಾಗುತ್ತಿದೆ ಎಂದು ಹಲವು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಸರ್ಕಾರದ ಲೋಪಗಳನ್ನು ಬೆರಳು ಮಾಡಿ ತೋರಿಸುವ ಪತ್ರಕರ್ತರು ಮತ್ತು ಸಾಹಿತಿಗಳನ್ನು ‘ದಿಮಾಗಿ ನಕ್ಸಲ್’ ಎನ್ನುವುದಾದರೆ, ಪ್ರಜಾಪ್ರಭುತ್ವದಲ್ಲಿ ವಿರೋಧ ವ್ಯಕ್ತಪಡಿಸುವುದೇ ಅಪರಾಧವೇ?” ಎಂದು X (ಟ್ವಿಟರ್) ನ ಬಳಕೆದಾರರು ಪ್ರಶ್ನಿಸಿದ್ದಾರೆ.
ಇದನ್ನೂ ಓದಿ: ‘ದಿಮಾಗಿ ನಕ್ಸಲ್’ ಆಗಿರುವುದಕ್ಕೆ ಹೆಮ್ಮೆ ಇದೆ; ಮೋದಿ ವಿರುದ್ಧ ಪಿ. ಚಿದಂಬರಂ ಕಿಡಿ
ಸಾಮಾಜಿಕ ಕಾರ್ಯಕರ್ತರು ಹಾಗೂ ಅಂಕಣಕಾರರು ಜಾಲತಾಣಗಳಲ್ಲಿ ಬರೆದುಕೊಂಡಿದ್ದು, “ಅರ್ಬನ್ ನಕ್ಸಲ್ ಎಂಬ ಪದದ ನಂತರ ಈಗ ‘ದಿಮಾಗಿ ನಕ್ಸಲ್’ ಮೂಲಕ ಜನರ ಆಲೋಚನೆ ಮತ್ತು ಚಿಂತನೆಗಳನ್ನೇ ಸಂಶಯದ ಕಣ್ಣಿನಿಂದ ನೋಡುವ ಪ್ರಯತ್ನ ನಡೆಯುತ್ತಿದೆ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ವಿಪಕ್ಷದ ಹಿರಿಯ ನಾಯಕರು ಹಾಗೂ ನೆಟ್ಟಿಗರು ‘ಆಂಡೋಲನ್‌ಜೀವಿ’, ‘ಅರ್ಬನ್ ನಕ್ಸಲ್’ ನಂತರ ‘ದಿಮಾಗಿ ನಕ್ಸಲ್’ ಎನ್ನುವ ಲೇಬಲ್ ಹಚ್ಚುವುದರ ವಿರುದ್ಧ ಕಿಡಿಕಾರಿದ್ದಾರೆ. “ಜನಸಾಮಾನ್ಯರ, ರೈತರ, ಪರಿಸರದ ಮತ್ತು ಮಾನವ ಹಕ್ಕುಗಳ ಪರವಾಗಿ ಧ್ವನಿ ಎತ್ತುವುದೇ ನಕ್ಸಲಿಸಂ ಎಂದಾದರೆ, ದೇಶದ ಸಂವಿಧಾನಾತ್ಮಕ ಹಕ್ಕುಗಳಿಗಾಗಿ ಹೋರಾಡುವ ಪ್ರತಿಯೊಬ್ಬ ನಾಗರಿಕನೂ ಈ ಪಟ್ಟಿಗೆ ಸೇರುತ್ತಾನೆ” ಎಂದು ನೆಟ್ಟಿಗರು ವ್ಯಂಗ್ಯವಾಡಿದ್ದಾರೆ.
ಕಾನೂನು ತಜ್ಞರು, ಇತಿಹಾಸಕಾರರು ಹಾಗೂ ಶಿಕ್ಷಣ ತಜ್ಞರನ್ನು ಈ ರೀತಿ ಗುರಿಮಾಡುವುದು ದೇಶದ ಶೈಕ್ಷಣಿಕ ಮತ್ತು ಸಾಂಸ್ಥಿಕ ಭದ್ರ ಬುನಾದಿಯನ್ನು ಸಡಿಲಗೊಳಿಸುವ ಹುನ್ನಾರ ಎಂದು ಹಲವು ಡಿಜಿಟಲ್ ಮಾಧ್ಯಮ ವಿಶ್ಲೇಷಕರು ಬರೆದುಕೊಂಡಿದ್ದಾರೆ.
