‘ನಿಜವಾದ ಶಿವಸೇನೆ’ಯನ್ನು ಗುರುತಿಸುವ ವಿಚಾರದಲ್ಲಿ ಚುನಾವಣಾ ಆಯೋಗ ಅನುಸರಿಸಿದ ‘ಸಂಘಟನಾ ಬಹುಮತ’ ಪರೀಕ್ಷೆಯನ್ನು ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ ಶಿಂಧೆ ನೇತೃತ್ವದ ಬಣ ಸುಪ್ರೀಂ ಕೋರ್ಟ್‌ನಲ್ಲಿ ಸಮರ್ಥಿಸಿದೆ.
ಮಹಾರಾಷ್ಟ್ರ ವಿಧಾನಸಭೆ ಸ್ಪೀಕರ್‌ ಅವರು ಶಿಂಧೆ ಬಣದ ಶಾಸಕರನ್ನು ಅನರ್ಹಗೊಳಿಸಲು ನಿರಾಕರಿಸಿರುವುದನ್ನು ಪ್ರಶ್ನಿಸಿ ಸಲ್ಲಿಸಲಾದ ಅರ್ಜಿಗಳ ಅಂತಿಮ ವಿಚಾರಣೆ ಮಂಗಳವಾರ (ಸೆ.15) ನಡೆದಿತ್ತು. ಇದೇ ವೇಳೆ, 2023ರ ಫೆಬ್ರವರಿ 17ರಂದು ಶಿವಸೇನೆ ಹೆಸರು ಹಾಗೂ ‘ಬಿಲ್ಲು-ಬಾಣ’ ಚಿಹ್ನೆಯನ್ನು ಶಿಂಧೆ ಬಣಕ್ಕೆ ನೀಡಿದ ಚುನಾವಣಾ ಆಯೋಗದ ಆದೇಶವನ್ನು ಪ್ರಶ್ನಿಸಿರುವ ಉದ್ಧವ್‌ ಠಾಕ್ರೆ ಬಣದ ಅರ್ಜಿಯನ್ನೂ ನ್ಯಾಯಾಲಯ ವಿಚಾರಣೆ ನಡೆಸುತ್ತಿದೆ.
ಭಾರತದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್‌ ನೇತೃತ್ವದ, ನ್ಯಾಯಮೂರ್ತಿಗಳಾದ ಜಾಯ್‌ಮಲ್ಯ ಬಾಗ್ಚಿ ಹಾಗೂ ವಿ. ಮೋಹನಾ ಅವರನ್ನೊಳಗೊಂಡ ತ್ರಿಸದಸ್ಯ ಪೀಠ ವಿಚಾರಣೆ ನಡೆಸುತ್ತಿದೆ.
ಶಿಂಧೆ ಬಣದ ಪರ ವಾದ ಮಂಡಿಸಿದ ಹಿರಿಯ ವಕೀಲ ನೀರಜ್‌ ಕಿಶನ್‌ ಕೌಲ್‌, ಸಂವಿಧಾನದ 324ನೇ ವಿಧಿಯಡಿ ಚುನಾವಣಾ ಆಯೋಗಕ್ಕೆ ಪಕ್ಷದ ಸಂವಿಧಾನ ಹಾಗೂ ಸಂಘಟನಾ ರಚನೆಯನ್ನು ಪರಿಶೀಲಿಸುವ ಅಧಿಕಾರವಿದೆ ಎಂದು ವಾದಿಸಿದರು. “ಸಂಪೂರ್ಣ ದಾಖಲೆಗಳನ್ನು ನ್ಯಾಯಾಲಯ ಪರಿಶೀಲಿಸಬೇಕು. ಪಕ್ಷದ ಸಂವಿಧಾನ ಚುನಾವಣಾ ಆಯೋಗದ ಬಳಿ ಇತ್ತೇ ಎಂಬುದು ಪ್ರಶ್ನೆ” ಎಂದು ಅವರು ಹೇಳಿದರು.
ಠಾಕ್ರೆ ಬಣ ಅವಲಂಬಿಸಿರುವ ಪಕ್ಷದ ಸಂವಿಧಾನವು ಚುನಾವಣಾ ಆಯೋಗದಲ್ಲಿ ನೋಂದಣಿಯಾಗಿರಲಿಲ್ಲ. ಆದರೆ, 1999ರ ಸಂವಿಧಾನವನ್ನು ಆಯೋಗದೊಂದಿಗೆ ಸುದೀರ್ಘ ತ್ರವ್ಯವಹಾರದ ಬಳಿಕ ಸಲ್ಲಿಸಲಾಗಿತ್ತು ಎಂದು ಕೌಲ್‌ ತಿಳಿಸಿದರು. ಚುನಾವಣಾ ಆಯೋಗವು ಸಂವಿಧಾನಕ್ಕೆ ಯಾವ ತಿದ್ದುಪಡಿಗಳನ್ನು ಮಾಡಬಹುದು ಎಂಬುದನ್ನು ನಿರ್ಧರಿಸುತ್ತಿರಲಿಲ್ಲ. ಬದಲಿಗೆ, ಪಕ್ಷದ ಸಂಘಟನಾ ರಚನೆಯು ಕಾರ್ಯಕರ್ತರ ಅಭಿಪ್ರಾಯವನ್ನು ಪ್ರತಿಬಿಂಬಿಸುತ್ತದೆಯೇ ಎಂಬುದನ್ನು ಪರಿಶೀಲಿಸುತ್ತಿತ್ತು ಎಂದು ಅವರು ವಾದಿಸಿದರು.
ವಿವಾದವು ಕೇವಲ ಶಾಸಕಾಂಗ ಪಕ್ಷದ ವಿಭಜನೆಗೆ ಸೀಮಿತವಾಗಿದೆ ಎಂಬ ವಾದವನ್ನು ತಿರಸ್ಕರಿಸಿದ ಕೌಲ್‌, “ನಮ್ಮ ವಾದವು ಶಾಸಕಾಂಗ ಪಕ್ಷದಲ್ಲಿ ಮಾತ್ರ ವಿಭಜನೆಯಾಗಿದೆ ಎಂಬುದಲ್ಲ. ರಾಜಕೀಯ ಪಕ್ಷದಲ್ಲೇ ವಿಭಜನೆಯಾಗಿದೆ ಎಂಬುದು ನಮ್ಮ ವಾದ” ಎಂದು ಹೇಳಿದರು.
ಪ್ರತಿ ಪ್ರಾಥಮಿಕ ಸದಸ್ಯನಿಂದಲೂ ಅಭಿಪ್ರಾಯ ಸಂಗ್ರಹಿಸಿ ಜನಮತಗಣನೆ ನಡೆಸಲು ಚುನಾವಣಾ ಆಯೋಗಕ್ಕೆ ಸಾಧ್ಯವಿಲ್ಲ. ಪಕ್ಷದ ಕಾರ್ಯಕರ್ತರು ಹಾಗೂ ತಳಮಟ್ಟದ ಸಂಘಟನೆಯೇ ರಾಜಕೀಯ ಪಕ್ಷದ ಜೀವಾಳ. ಅವರು ನೇರವಾಗಿ ಮತದಾರರೊಂದಿಗೆ ಸಂಪರ್ಕ ಹೊಂದಿರುತ್ತಾರೆ ಎಂದು ಕೌಲ್‌ ಹೇಳಿದರು. ವಿಚಾರಣೆ ನಾಳೆ (ಸೆ.16)ಗೆ ಮುಂದೂಡಲ್ಪಟ್ಟಿದೆ.
ಇದನ್ನೂ ಓದಿ: ಶೇಖ್‌ ಹಸೀನಾ ಪಕ್ಷದ 7 ನಾಯಕರಿಗೆ ಮರಣದಂಡನೆ
ಶಿವಸೇನೆ ಪಕ್ಷದ ಹೆಸರು ಮತ್ತು ‘ಬಿಲ್ಲು-ಬಾಣ’ ಚಿಹ್ನೆ ಯಾರಿಗೆ ಸೇರಬೇಕು ಎಂಬ ವಿವಾದವೇ ಪ್ರಕರಣದ ಹಿನ್ನೆಲೆ. 2022ರಲ್ಲಿ ಏಕನಾಥ ಶಿಂಧೆ ನೇತೃತ್ವದ ಶಾಸಕರ ಬಣವು ಉದ್ಧವ್‌ ಠಾಕ್ರೆ ಸರ್ಕಾರದ ವಿರುದ್ಧ ಬಂಡಾಯ ಎದ್ದ ಬಳಿಕ ಪಕ್ಷದಲ್ಲಿ ಎರಡು ಬಣಗಳಾದವು. 2023ರ ಫೆಬ್ರುವರಿ 17ರಂದು ಚುನಾವಣಾ ಆಯೋಗವು ಶಿಂಧೆ ಬಣವೇ ನಿಜವಾದ ಶಿವಸೇನೆ ಎಂದು ಗುರುತಿಸಿ, ಪಕ್ಷದ ಹೆಸರು ಮತ್ತು ಚಿಹ್ನೆಯನ್ನು ಆ ಬಣಕ್ಕೆ ನೀಡಿತು. ಈ ನಿರ್ಧಾರವನ್ನು ಠಾಕ್ರೆ ಬಣ ಪ್ರಶ್ನಿಸಿದ್ದು, ಶಿಂಧೆ ಬಣದ ಶಾಸಕರನ್ನು ಅನರ್ಹಗೊಳಿಸಲು ಸ್ಪೀಕರ್‌ ನಿರಾಕರಿಸಿರುವುದನ್ನೂ ಪ್ರಶ್ನಿಸಿ ಅರ್ಜಿ ಸಲ್ಲಿಸಲಾಗಿದೆ. ಇದೀಗ ಸುಪ್ರೀಂ ಕೋರ್ಟ್‌ನಲ್ಲಿ ಈ ಅರ್ಜಿಗಳ ವಿಚಾರಣೆ ನಡೆಯುತ್ತಿದ್ದು, ಪಕ್ಷದ ನಿಜವಾದ ಪ್ರತಿನಿಧಿತ್ವ ನಿರ್ಧರಿಸಲು ಚುನಾವಣಾ ಆಯೋಗವು ಸಂಘಟನಾ ರಚನೆ ಮತ್ತು ಕಾರ್ಯಕರ್ತರ ಬೆಂಬಲವನ್ನು ಪರಿಗಣಿಸಬಹುದೇ ಎಂಬುದನ್ನು ಪ್ರಮುಖ ಅಂಶವನ್ನಾಗಿ ಪರಿಗಣಿಸಿದೆ.
