ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಉರ್ದು ಕವಿ ಅಲಿ ಸರ್ದಾರ್ ಜಾಫ್ರಿಯವರ ಕವನವನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಎಚ್‌ ಭಾಗ್ಯ .
ಕತ್ತಲ ಗವಿಯೊಳಗಿಂದ
ರೆಕ್ಕೆಗಳು ಫಡಫಡಿಸುವ ಸದ್ದು ಕೇಳುವುದು.
ನಿರ್ದಯಿ ಗಾಳಿಯು
ಮಂಜಿನ ಮೇಲೆ ಮಸೆದ
ಕತ್ತಿಯನ್ನು ಝಳಪಿಸುವುದು.
ಮಬ್ಬು ಮಬ್ಬಾದ
ಬೆಳಕಿರದ ಒಂದು ಗಬ್ಬು ಅಂಗಡಿ,
ದೀಪದ ಶಿಖೆ ಹಾಗೂ ಒಬ್ಬಳು ಹುಡುಗಿ.
ಅದು ತುಯ್ದಾಡುವುದು, ಅವಳು ಮಂಕಾಗಿ ಕುಗ್ಗಿಹೋಗುವಳು.
ಚಳಿಗಾಲದ ಸುದೀರ್ಘ ರಾತ್ರಿಯಿಡೀ
ಅವರು ಕತ್ತಲು ಹಾಗೂ ಗಾಳಿಯೊಡನೆ ಸೆಣಸುವರು.
ಕಪ್ಪು ಮೋಡದ ಸೈನಿಕರಂತೆ
ಕತ್ತಲು ಬಯಲೊಳಗಿಂದ ಪುಟಿದೇಳುವುದು,
ಗಾಳಿಯ ಹೇಯ ಕೈಗಳು
ಕೋಮಲ ದೀಪದ ಕುಡಿಯ
ಬೆನ್ನೆಲುಬನ್ನು ಮುರಿಯಲೆತ್ನಿಸುವುದು,
ಮತ್ತು ಹುಡುಗಿಯ ಕೊಳಕು ಬಟ್ಟೆಯನ್ನು ಸೆಳೆಯುವುದು.
ಅವಳದನ್ನು ಗಟ್ಟಿಯಾಗಿ ಅವುಚಿಕೊಳ್ಳುವಳು.
ದೀಪದ ಕುಡಿ ಮತ್ತೆ ಮತ್ತೆ ಅಲುಗಾಡುವುದು.
ಪುರಾತನ ಬೆತ್ತಲ ಬುವಿ ನಡುಗುವುದು.
ಕತ್ತಲೀಗ ಕಳವಳಿಸುವುದು.
ಕಪ್ಪು ಸಮುದ್ರ,
ಹುಚ್ಚು ಗಾಳಿ.
ಒಂದೋ,
ಈ ಎರಡು ದೀಪಗಳು ನಂದಿಹೋಗಬೇಕು,
ಇಲ್ಲವೇ,
ಕತ್ತಲ ದರ್ಪವನ್ನು ಮೆಟ್ಟಿ
ದೀಪದ ಕುಡಿ ಜ್ವಾಲೆಯಾಗಬೇಕು.
ಆದರೂ ನನಗವುಗಳಲ್ಲಿ ನಂಬಿಕೆ ಇದೆ.
ದುರ್ಬಲ, ಮೂಕವಾದರೂ
ಅವು ಶಿಖೆಯೇ
ಅವು ಬೆಳಕಿನ ಪಂಗಡಕ್ಕೆ ಸೇರಿವೆ.
