ಉತ್ತರ ಪ್ರದೇಶದಿಂದ ಅಕ್ಟೋಬರ್ 16ರಂದು ನಡೆಯಲಿರುವ 10 ರಾಜ್ಯಸಭಾ ಸ್ಥಾನಗಳ ಚುನಾವಣೆಗೆ ಬಿಜೆಪಿ ರಾಜ್ಯ ಘಟಕವು ಕೇಂದ್ರ ನಾಯಕತ್ವದ ಪರಿಗಣನೆಗಾಗಿ 25 ಸಂಭಾವ್ಯ ಅಭ್ಯರ್ಥಿಗಳ ಹೆಸರನ್ನು ಕಳುಹಿಸಿದೆ. ಕೇಂದ್ರ ಸಚಿವ ಹರ್ದೀಪ್ ಸಿಂಗ್ ಪುರಿ, ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸ್ಮೃತಿ ಇರಾನಿ, ಹರೀಶ್ ದ್ವಿವೇದಿ ಹಾಗೂ ಮಾಜಿ ಆಪ್ ನಾಯಕ, ಕವಿ ಕುಮಾರ್ ವಿಶ್ವಾಸ್ ಸೇರಿದಂತೆ ಹಲವು ಪ್ರಮುಖರ ಹೆಸರು ಪಟ್ಟಿಯಲ್ಲಿದೆ.
ಇತ್ತೀಚಿನ ಚುನಾವಣೆಗಳಲ್ಲಿ ಸೋತಿರುವ ಕೆಲವು ಮಾಜಿ ಸಂಸದರು ಮತ್ತು ಪಕ್ಷದ ಸಂಘಟನಾ ಜವಾಬ್ದಾರಿ ಹೊಂದಿರುವ ನಾಯಕರ ಹೆಸರುಗಳೂ ಪಟ್ಟಿಯಲ್ಲಿವೆ. ಬಸ್ತಿ ಕ್ಷೇತ್ರದ ಮಾಜಿ ಸಂಸದ ಹರೀಶ್ ದ್ವಿವೇದಿ ಅವರೂ ಪಟ್ಟಿಯಲ್ಲಿದ್ದು, ಅವರು ಸದ್ಯ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾಗಿ ಬಿಹಾರ ಮತ್ತು ಕರ್ನಾಟಕದ ಜವಾಬ್ದಾರಿ ಹೊತ್ತಿದ್ದಾರೆ. 2024ರ ಲೋಕಸಭಾ ಚುನಾವಣೆಯಲ್ಲಿ ಅವರು ಬಸ್ತಿ ಕ್ಷೇತ್ರದಲ್ಲಿ ಸೋಲುಂಡಿದ್ದರು. 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಜಾತಿ ಮತ್ತು ಪ್ರಾದೇಶಿಕ ಸಮೀಕರಣಗಳನ್ನು ಗಮನದಲ್ಲಿಟ್ಟುಕೊಂಡು ಅಭ್ಯರ್ಥಿಗಳ ಆಯ್ಕೆ ನಡೆಯುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.
ಈ ನಡುವೆ ಸ್ಮೃತಿ ಇರಾನಿ ಹೆಸರು ವಿಶೇಷ ಗಮನ ಸೆಳೆಯುತ್ತಿದೆ. 2014ರಲ್ಲಿ ಅಮೇಥಿಯಿಂದ ಲೋಕಸಭಾ ಚುನಾವಣೆಗೆ ಸ್ಪರ್ಧಿಸಿ ರಾಷ್ಟ್ರಮಟ್ಟದಲ್ಲಿ ಗಮನ ಸೆಳೆದಿದ್ದ ಇರಾನಿ, 2019ರಲ್ಲಿ ಅದೇ ಕ್ಷೇತ್ರದಿಂದ ರಾಹುಲ್ ಗಾಂಧಿ ಅವರನ್ನು ಸೋಲಿಸಿದ್ದರು. 2024ರಲ್ಲಿ ಅಮೇಥಿಯಲ್ಲಿ ಸೋತ ಬಳಿಕ ಅವರು ಲೋಕಸಭೆಯಲ್ಲಿ ಇರಲಿಲ್ಲ. ಇದೀಗ ಬಿಜೆಪಿ ರಾಷ್ಟ್ರೀಯ ಸಂಘಟನೆಯಲ್ಲಿ ಪ್ರಮುಖ ಜವಾಬ್ದಾರಿಗಳನ್ನು ಹೊಂದಿರುವ ಸಂದರ್ಭದಲ್ಲಿ ಅವರ ಹೆಸರು ಮತ್ತೆ ರಾಜ್ಯಸಭಾ ಅಭ್ಯರ್ಥಿಗಳ ಸಂಭಾವ್ಯ ಪಟ್ಟಿಯಲ್ಲಿ ಕಾಣಿಸಿಕೊಂಡಿದೆ.
ರಾಜ್ಯಸಭಾ ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿಯಲ್ಲಿ ರಾಜವೀರ್ ಸಿಂಗ್ ‘ರಾಜು ಭಯ್ಯಾ’, ಬಿ.ಎಲ್. ವರ್ಮಾ, ಹಿರಿಯ ಜಾಟ್ ನಾಯಕರಾದ ಸಂಜೀವ್ ಬಲ್ಯಾನ್ ಮತ್ತು ಸತ್ಯಪಾಲ್ ಸಿಂಗ್ ಹಾಗೂ ಮಾಜಿ ಸಂಸದ ಬೃಜ್ ಲಾಲ್ ಅವರ ಹೆಸರೂ ಇದೆ. ಸದ್ಯ ಉತ್ತರ ಪ್ರದೇಶದ 10 ಸ್ಥಾನಗಳಲ್ಲಿ ಎಂಟು ಬಿಜೆಪಿ, ಒಂದು ಸಮಾಜವಾದಿ ಪಕ್ಷ ಹಾಗೂ ಒಂದು ಬಹುಜನ ಸಮಾಜ ಪಕ್ಷದ ಬಳಿ ಇದೆ.
This video cannot be played in your browser. Open the video directly
ಉತ್ತರ ಪ್ರದೇಶದ 10 ರಾಜ್ಯಸಭಾ ಸ್ಥಾನಗಳಿಗೆ ಶಾಸಕರು ಪ್ರಮಾಣಾನುಗತ ಪ್ರಾತಿನಿಧ್ಯ ಮತ್ತು ಸಿಂಗಲ್ ಟ್ರಾನ್ಸ್ಫರಬಲ್ ವೋಟ್ ಪದ್ಧತಿಯ ಮೂಲಕ ಸದಸ್ಯರನ್ನು ಆಯ್ಕೆ ಮಾಡಲಿದ್ದಾರೆ. ಪ್ರಸ್ತುತ ವಿಧಾನಸಭೆಯ ಪರಿಣಾಮಕಾರಿ ಸದಸ್ಯರ ಸಂಖ್ಯೆ 397 ಆಗಿದ್ದು, ಒಂದು ಸ್ಥಾನ ಗೆಲ್ಲಲು ಮೊದಲ ಪ್ರಾಶಸ್ತ್ಯದ ಸುಮಾರು 37 ಮತಗಳ ಅಗತ್ಯವಿದೆ.
ಇದನ್ನೂ ಓದಿ: ಯುಪಿ ಚುನಾವಣೆ: ಎಸ್ಪಿ ಜೊತೆ ಮೈತ್ರಿಗೆ ವಿಳಂಬ ಬೇಡ, ರಾಹುಲ್ಗೆ ಕಾಂಗ್ರೆಸ್ ಸಂಸದರ ಒತ್ತಾಯ
ಉತ್ತರ ಪ್ರದೇಶ ವಿಧಾನಸಭೆಯಲ್ಲಿ ಬಿಜೆಪಿಗೆ 256 ಶಾಸಕರಿದ್ದು, ಎನ್ಡಿಎ ಮಿತ್ರಪಕ್ಷಗಳನ್ನು ಸೇರಿಸಿದರೆ ಸಂಖ್ಯೆ 289ಕ್ಕೆ ತಲುಪುತ್ತದೆ. ಈ ಸಂಖ್ಯಾಬಲದಿಂದ ಎನ್ಡಿಎಗೆ ಏಳು ಸ್ಥಾನಗಳ ಗೆಲುವಿಗೆ ಅಗತ್ಯವಾದ ಮತಗಳಿವೆ. ಎಂಟನೇ ಸ್ಥಾನಕ್ಕಾಗಿ ಹೆಚ್ಚುವರಿ ಮತಗಳ ಅಗತ್ಯವಿದ್ದು, ಅಭ್ಯರ್ಥಿಗಳ ಆಯ್ಕೆ, ಎರಡನೇ ಪ್ರಾಶಸ್ತ್ಯದ ಮತಗಳು ಹಾಗೂ ಸಂಭವನೀಯ ಅಡ್ಡಮತದಾನ ಪ್ರಮುಖವಾಗಬಹುದು. ಸಮಾಜವಾದಿ ಪಕ್ಷದ 101 ಮತ್ತು ಕಾಂಗ್ರೆಸ್ನ ಇಬ್ಬರು ಶಾಸಕರು ಸೇರಿ ವಿರೋಧ ಪಕ್ಷದ ಬಲ 103ರಷ್ಟಿದೆ.
ಈ ಚುನಾವಣೆಯಲ್ಲಿ ಬಿಜೆಪಿ ತನ್ನ ಹಾಲಿ ರಾಜ್ಯಸಭಾ ಸ್ಥಾನಗಳನ್ನು ಉಳಿಸಿಕೊಳ್ಳುವುದಷ್ಟೇ ಅಲ್ಲದೆ ಹೆಚ್ಚುವರಿ ಸ್ಥಾನ ಪಡೆಯಲು ಪ್ರಯತ್ನಿಸುವ ಸಾಧ್ಯತೆ ಇದೆ. 2027ರ ವಿಧಾನಸಭಾ ಚುನಾವಣೆಗೆ ಮುನ್ನ ನಡೆಯುತ್ತಿರುವ ಈ ರಾಜ್ಯಸಭಾ ಚುನಾವಣೆ ಪಕ್ಷಗಳ ಜಾತಿ, ಪ್ರಾದೇಶಿಕ ಹಾಗೂ ಸಂಘಟನಾ ಸಮೀಕರಣಗಳಿಗೂ ಮಹತ್ವದ್ದಾಗಿದೆ.
