ದೇವರ ಪ್ರತಿಷ್ಠಾಪನೆಗೊಂಡ 24 ಗಂಟೆಗಳಲ್ಲಿಯೇ ದೇವಿಯ ಕಿರೀಟ ಕಳವಾಗಿರುವ ಘಟನೆ ಮಹಾರಾಷ್ಟ್ರದ ಪುಣೆ ಜಿಲ್ಲೆಯ ತಳೇಗಾಂವ್ ದಾಭಾಡೆ ದೇವಸ್ಥಾನದಲ್ಲಿ ನಡೆದಿದೆ. ದಾಭಾಡೆಯಲ್ಲಿರುವ ಶ್ರೀ ತುಳಜಾಭವಾನಿ ದೇವಾಲಯದಲ್ಲಿ ಘಟನೆ ನಡೆದಿದೆ. ತಳೇಗಾಂವ್ ದಾಭಾಡೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದೇ ದೇವಾಲಯದಲ್ಲಿ ಮೇ 23ರಂದು ಕೂಡ ಕಳ್ಳತನ ನಡೆದಿತ್ತು. ಅಂದು, ದೇವಸ್ಥಾನದಿಂದ 1.3 ಕೆಜಿ ತೂಕದ ಈ ಬೆಳ್ಳಿಯ ಕಿರೀಟವನ್ನು ಕದಿಯಲಾಗಿತ್ತು. ದೇವಸ್ಥಾನದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದ ದೃಶ್ಯಗಳ ಆಧಾರದ ಮೇಲೆ ಪೊಲೀಸರಿಗೆ ಆರೋಪಿಯ ಬಗ್ಗೆ ಸುಳಿವು ಸಿಕ್ಕಿತ್ತು. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದ ಸಿಸಿಟಿವಿ ದೃಶ್ಯಾವಳಿಯಲ್ಲಿ, ವ್ಯಕ್ತಿಯೊಬ್ಬ ಭಕ್ತನ ಸೋಗಿನಲ್ಲಿ ದೇವಸ್ಥಾನದೊಳಗೆ ಪ್ರವೇಶಿಸುವುದು ಕಂಡುಬಂದಿತ್ತು. ಶಂಕಿತ ವ್ಯಕ್ತಿ ತೆಂಗಿನಕಾಯಿಯೊಂದಿಗೆ ಬಂದು ದೇವಿಗೆ ಕುಂಕುಮವನ್ನೂ ಇಟ್ಟಿದ್ದ. ಆದರೆ, ನಂತರ ದೇವಿಯ ಕಿರೀಟವನ್ನು ಕೈಗೆತ್ತಿಕೊಂಡು ಅಲ್ಲಿಂದ ಪರಾರಿಯಾಗಿದ್ದ. ಆ ಪ್ರಕರಣದಲ್ಲಿ ಉತ್ತರ ಪ್ರದೇಶದ ರವಿ ಸೋನಿ (34) ಮತ್ತು ರಮೇಶ್ (36) ಎಂಬ ಇಬ್ಬರನ್ನುಪೊಲೀಸರು ಜೂನ್ 6ರಂದು ಬಂಧಿಸಿದ್ದರು. ಕಿರೀಟವನ್ನು ವಶಕ್ಕೆ ಪಡೆದಿದ್ದರು.
ಬಳಿಕ, ಜೂನ್ 12ರ ಸಂಜೆ ಪೊಲೀಸ್ ಉಪ ಆಯುಕ್ತ (DCP) ಶ್ವೇತಾ ಖೇಡ್ಕರ್ ಮತ್ತು ಹಿರಿಯ ಪೊಲೀಸ್ ನಿರೀಕ್ಷಕ ಕನ್ಹಯ್ಯಾ ಥೋರಟ್ ಅವರ ಸಮ್ಮುಖದಲ್ಲಿ ಕಿರೀಟವನ್ನು ದೇವಿಯ ಮೂರ್ತಿಗೆ ಶಾಸ್ತ್ರೋಕ್ತವಾಗಿ ಮರುಪ್ರತಿಷ್ಠಾಪಿಸಲಾಗಿತ್ತು. ಆದರೆ, ಆ ಸಮಾರಂಭ ಮುಗಿದ ಕೆಲವೇ ಗಂಟೆಗಳಲ್ಲಿ ಕಿರೀಟ ಮತ್ತೆ ಕಳುವಾಗಿದೆ. ಒಂದೇ ತಿಂಗಳ ಅಂತರದಲ್ಲಿಯೇ ಎರಡನೇ ಬಾರಿಗೆ ಕಿರೀಟ ಕಳ್ಳತನವಾಗಿದೆ.
ಈ ಲೇಖನ ಓದಿದ್ದೀರಾ?: ರಾಮಮಂದಿರ ದೇಣಿಗೆ ದುರುಪಯೋಗ: ಬಿಜೆಪಿಯ ಬ್ರಿಜ್ ಭೂಷಣ್ ಆರೋಪಗಳ ಸುತ್ತ
ಘಟನೆ ಬಗ್ಗೆ ಪ್ರತಿಕ್ರಿಯಿಸಿರುವ ಪೊಲೀಸ್ ನಿರೀಕ್ಷಕ ಥೋರಟ್, ಪ್ರಕರಣದ ತನಿಖೆಗೆ ಪೊಲೀಸ್ ತಂಡ ರಚಿಸಲಾಗಿದೆ. ತಂಡವು ಕೆಲವು ಸುಳಿವುಗಳನ್ನು ಕಲೆಹಾಕಿದೆ. ಕಿರೀಟ ಕಳ್ಳತನದಲ್ಲಿ ಭಾಗಿಯಾಗಿರುವ ಕಳ್ಳರನ್ನು ಶೀಘ್ರದಲ್ಲೇ ಬಂಧಿಸಲಾಗುವುದು ಎಂದು ತಿಳಿಸಿದ್ದಾರೆ.
