2018ರ ಮುಜಫರ್ನಗರದ ರಾಜೇಂದ್ರ ಸೈನಿ ಕೊಲೆ ಪ್ರಕರಣದಲ್ಲಿ ಇಬ್ಬರು ಅಪರಾಧಿಗಳಿಗೆ ಉತ್ತರ ಪ್ರದೇಶದ ಮುಜಫರ್ನಗರದ ಫಾಸ್ಟ್ ಟ್ರ್ಯಾಕ್ ಕೋರ್ಟ್ ಗಲ್ಲು ಶಿಕ್ಷೆ ವಿಧಿಸಿದೆ. ಹಾಗೆಯೇ ಈ ಪ್ರಕರಣವನ್ನು ನ್ಯಾಯಾಲಯವು “ಅಪರೂಪದಲ್ಲೇ ಅಪರೂಪದ ಪ್ರಕರಣ” ಎಂದು ಪರಿಗಣಿಸಿದೆ.
ಮುಜಫರ್ನಗರದ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ (ಫಾಸ್ಟ್ ಟ್ರ್ಯಾಕ್ ಕೋರ್ಟ್-3) ರವಿ ಕುಮಾರ್ ದಿವಾಕರ್ ಅವರು ಈ ತೀರ್ಪು ಪ್ರಕಟಿಸಿದ್ದಾರೆ. “ಆರೋಪಿಗಳು ದೇಹವಿಲ್ಲ ಎಂದರೆ ಪ್ರಕರಣ ಸಾಬೀತುಪಡಿಸಲು ಸಾಧ್ಯವಿಲ್ಲ ಎಂದು ನಂಬಿರುವಂತಿದೆ. ಆದರೆ ಸತ್ಯವು ಅಂತಿಮವಾಗಿ ಬೆಳಕಿಗೆ ಬರುತ್ತದೆ” ಎಂದು ಹೇಳಿದ್ದಾರೆ.
ಇದನ್ನೂ ಓದಿ: 9 ಪೊಲೀಸರಿಗೆ ಗಲ್ಲು ಶಿಕ್ಷೆ: ಸಾತಾಂಕುಳಂ ತೀರ್ಪು ಕಲಿಸುತ್ತಿರುವ ಪಾಠಗಳೇನು?
ಮುಖ್ಯ ಆರೋಪಿಯಾಗಿದ್ದ ವೀರಸೈನ್ ಎಂಬಾತ ತನ್ನ ಪತ್ನಿಯೊಂದಿಗೆ ರಾಜೇಂದ್ರ ಸೈನಿ ಅಕ್ರಮ ಸಂಬಂಧ ಹೊಂದಿದ್ದಾನೆ ಎಂಬ ಸಂಶಯದಲ್ಲಿ 2018ರ ಜೂನ್ 4ರಂದು ಗಜೇಂದ್ರ ಅಲಿಯಾಸ್ ಗೀಲು ಮತ್ತು ರಾಮ್ ಕಿರಣ್ ಅಲಿಯಾಸ್ ಸಾವನ್ ಎಂಬವರ ಜತೆ ಸೇರಿ ರಾಜೇಂದ್ರನ ಹತ್ಯೆ ಮಾಡಿದ್ದಾನೆ.
ಕೊಲೆಯ ಬಳಿಕ ಗುರುತು ಸಿಗದಂತೆ ಮಾಡಲು, ಸಾಕ್ಷ್ಯವನ್ನು ನಾಶಪಡಿಸಲು ಶವವನ್ನು ಮಿರಾಪುರ್ ಪೊಲೀಸ್ ಠಾಣಾ ವ್ಯಾಪ್ತಿಯ ಖೇಡಿ ಸಿರಾಯ್ ಗ್ರಾಮದ ಕಾಡಿನಲ್ಲಿ ಸುಟ್ಟುಹಾಕಿದ್ದರು. 2018ರ ಜೂನ್ 5ರಂದು ರಾಜೇಂದ್ರನ ಅರ್ಧ ಸುಟ್ಟ ದೇಹ ಪತ್ತೆಯಾಗಿತ್ತು. ಡಿಎನ್ಎ ವರದಿ ಮತ್ತು ವಿಧಿವಿಜ್ಞಾನ ಪ್ರಯೋಗಾಲಯದ (FSL) ಸಾಕ್ಷ್ಯಗಳು ಆರೋಪಿಗಳ ಅಪರಾಧವನ್ನು ಸಾಬೀತುಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿವೆ.
ಈ ಪ್ರಕರಣದ ಮುಖ್ಯ ಸಂಚುಗಾರ ವೀರಸೈನ್ ವಿಚಾರಣೆಯ ಅವಧಿಯಲ್ಲೇ ಈತ ಮೃತಪಟ್ಟಿದ್ದಾನೆ. ಇದೀಗ ಇಬ್ಬರು ಅಪರಾಧಿಗಳಾದ ಗಜೇಂದ್ರ ಮತ್ತು ರಾಮ್ ಕಿರಣ್ಗೆ ನ್ಯಾಯಾಲಯ ಮರಣದಂಡನೆ ವಿಧಿಸಿದೆ. ಹಾಗೆಯೇ ಇಬ್ಬರಿಗೂ ತಲಾ ₹1 ಲಕ್ಷ ದಂಡ ವಿಧಿಸಲಾಗಿದೆ.
ಈ ಪ್ರಕರಣವನ್ನು ನ್ಯಾಯಾಲಯವು “ಅಪರೂಪದಲ್ಲೇ ಅಪರೂಪದ ಪ್ರಕರಣ” ಎಂದು ಕರೆದಿದ್ದು, ಅಪರಾಧ ಎಸಗುವ ಮುನ್ನ ವ್ಯಕ್ತಿಯಲ್ಲಿ ಕಾನೂನಿನ ಭಯವಿರಬೇಕು ಎಂದು ನ್ಯಾಯಾಧೀಶರು ಹೇಳಿದ್ದಾರೆ.
