ಉತ್ತರ ಪ್ರದೇಶದಲ್ಲಿ 2027ರ ವಿಧಾನಸಭಾ ಚುನಾವಣೆಗೆ ಮುನ್ನ ನಡೆದ 11 ವಿಧಾನ ಪರಿಷತ್ (ಎಂಎಲ್‌ಸಿ) ಸ್ಥಾನಗಳ ಚುನಾವಣೆಯಲ್ಲಿ ಆಡಳಿತಾರೂಢ ಭಾರತೀಯ ಜನತಾ ಪಾರ್ಟಿಗೆ (ಬಿಜೆಪಿ) ಸಮಾಜವಾದಿ ಪಕ್ಷ (ಎಸ್‌ಪಿ) ತೀವ್ರ ಪೈಪೋಟಿ ನೀಡಿದೆ. ಪದವೀಧರ ಮತ್ತು ಶಿಕ್ಷಕರ ಕ್ಷೇತ್ರಗಳಿಗೆ ನಡೆದ ಚುನಾವಣೆಯಲ್ಲಿ ಬಿಜೆಪಿ 6 ಸ್ಥಾನಗಳನ್ನು ಗೆದ್ದರೆ, ಅಖಿಲೇಶ್ ಯಾದವ್ ನೇತೃತ್ವದ ಎಸ್‌ಪಿ ಬರೋಬ್ಬರಿ 5 ಸ್ಥಾನಗಳನ್ನು ಗೆದ್ದು ತನ್ನ ರಾಜಕೀಯ ಬಲವನ್ನು ಗಣನೀಯವಾಗಿ ಹೆಚ್ಚಿಸಿಕೊಂಡಿದೆ.
ಒಟ್ಟು 11 ಸ್ಥಾನಗಳ ಪೈಕಿ 6 ಶಿಕ್ಷಕರ ಮತ್ತು 5 ಪದವೀಧರ ಕ್ಷೇತ್ರಗಳಿದ್ದವು. 2020ರ ಚುನಾವಣೆಯಲ್ಲಿ ಕೇವಲ 3 ಸ್ಥಾನಗಳಿಗೆ ತೃಪ್ತಿಪಟ್ಟಿದ್ದ ಎಸ್‌ಪಿ, ಈ ಬಾರಿ 5 ಕ್ಷೇತ್ರಗಳನ್ನು ತನ್ನದಾಗಿಸಿಕೊಳ್ಳುವ ಮೂಲಕ ಆಡಳಿತಾರೂಢ ಬಿಜೆಪಿಯ ನಿದ್ದೆಗೆಡಿಸಿದೆ. ಬಿಜೆಪಿ ಕಳೆದ ಬಾರಿಯಂತೆ ಈ ಬಾರಿಯೂ 6 ಸ್ಥಾನಗಳನ್ನು ಉಳಿಸಿಕೊಂಡಿದ್ದರೂ, ತನ್ನ ಭದ್ರಕೋಟೆಗಳಲ್ಲಿ ಅನುಭವಿಸಿದ ಹೀನಾಯ ಸೋಲು ಆಡಳಿತ ಪಕ್ಷಕ್ಕೆ ಸ್ಪಷ್ಟ ಎಚ್ಚರಿಕೆಯ ಗಂಟೆಯಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರ ಲೋಕಸಭಾ ಕ್ಷೇತ್ರವಾದ ವಾರಾಣಸಿಯಲ್ಲಿ ಸಮಾಜವಾದಿ ಪಕ್ಷವು ಅತ್ಯದ್ಭುತ ಸಾಧನೆ ಮಾಡಿದೆ. ವಾರಾಣಸಿ ಪದವೀಧರ ಕ್ಷೇತ್ರದಲ್ಲಿ ಎಸ್‌ಪಿಯ ಆಶುತೋಷ್ ಸಿನ್ಹಾ ಅವರು ಬಿಜೆಪಿಯ ಕೇದಾರನಾಥ್ ಸಿಂಗ್ ವಿರುದ್ಧ ಭರ್ಜರಿ ಜಯ ಸಾಧಿಸಿದ್ದಾರೆ. ಅದೇ ರೀತಿ ವಾರಾಣಸಿ ಶಿಕ್ಷಕರ ಕ್ಷೇತ್ರದಲ್ಲೂ ಎಸ್‌ಪಿಯ ಲಾಲ್ ಬಿಹಾರಿ ಯಾದವ್ ಅವರು ಬಿಜೆಪಿಯ ಪ್ರಮೋದ್ ಮಿಶ್ರಾ ಅವರನ್ನು 4,898 ಮತಗಳಿಂದ ಸೋಲಿಸಿ, ಕಮಲದ ಕೋಟೆಯಲ್ಲಿ ‘ಸೈಕಲ್’ ಪಾರುಪತ್ಯ ಮೆರೆದಿದ್ದಾರೆ.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ಪ್ರತಿನಿಧಿಸುವ ರಾಜಧಾನಿ ಲಕ್ನೋದಲ್ಲಿಯೂ ಎಸ್‌ಪಿ ದೊಡ್ಡ ಗೆಲುವು ದಾಖಲಿಸಿದೆ. ಲಖನೌ ಪದವೀಧರ ಕ್ಷೇತ್ರದಲ್ಲಿ ಎಸ್‌ಪಿ ಅಭ್ಯರ್ಥಿ ಕಾಂತಿ ಸಿಂಗ್ ಅವರು ಬಿಜೆಪಿಯ ಅವನೀಶ್ ಕುಮಾರ್ ಸಿಂಗ್ ಅವರನ್ನು ಬರೋಬ್ಬರಿ 17,225 ಮತಗಳ ಅಂತರದಿಂದ ಮಣಿಸಿದ್ದಾರೆ. 2020ರಲ್ಲಿ ಇದೇ ಎದುರಾಳಿಯ ವಿರುದ್ಧ ಸೋತಿದ್ದ ಕಾಂತಿ ಸಿಂಗ್, ಈ ಬಾರಿ ಭರ್ಜರಿ ಬಹುಮತದೊಂದಿಗೆ ಸೇಡು ತೀರಿಸಿಕೊಂಡಿರುವುದು ಎಸ್‌ಪಿ ಪಾಳೆಯದಲ್ಲಿ ಸಂಚಲನ ಮೂಡಿಸಿದೆ.
ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರ ತವರು ಕ್ಷೇತ್ರವಾದ ಗೋರಖ್‌ಪುರದಲ್ಲಿ ಬಿಜೆಪಿ ತೀವ್ರ ಮುಖಭಂಗದಿಂದ ಕೂದಲೆಳೆಯ ಅಂತರದಲ್ಲಿ ಪಾರಾಗಿದೆ.
ಗೋರಖ್‌ಪುರ-ಫೈಜಾಬಾದ್ ಶಿಕ್ಷಕರ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿ ಧ್ರುವ ತ್ರಿಪಾಠಿ ಅವರು ಪಕ್ಷೇತರ ಅಭ್ಯರ್ಥಿ ರಾಜೀವ್ ಯಾದವ್ ವಿರುದ್ಧ ಕೇವಲ 307 ಮತಗಳ ಅಲ್ಪ ಅಂತರದಿಂದ ಗೆಲುವು ಸಾಧಿಸಿದ್ದಾರೆ. ಈ ತೀವ್ರ ಪೈಪೋಟಿಯು ತಳಮಟ್ಟದಲ್ಲಿ ಆಡಳಿತ ವಿರೋಧಿ ಅಲೆ ಇರುವುದನ್ನು ಮತ್ತು ಎಸ್‌ಪಿ ಪರವಾದ ಒಲವನ್ನು ಸ್ಪಷ್ಟವಾಗಿ ಸೂಚಿಸುತ್ತದೆ.
ಪದವೀಧರ ಕ್ಷೇತ್ರಗಳ 5 ಸೀಟುಗಳ ಪೈಕಿ ಸಮಾಜವಾದಿ ಪಕ್ಷವು ಮೂರರಲ್ಲಿ (ವಾರಾಣಸಿ, ಲಖನೌ, ಅಲಹಾಬಾದ್-ಝಾನ್ಸಿ) ಜಯಭೇರಿ ಬಾರಿಸಿದೆ. ಅಲಹಾಬಾದ್-ಝಾನ್ಸಿ ಕ್ಷೇತ್ರದಲ್ಲಿ ಎಸ್‌ಪಿಯ ಮಾನ್ ಸಿಂಗ್ ಯಾದವ್ ಅವರು ಬಿಜೆಪಿಯ ಅಶೋಕ್ ಕುಮಾರ್ ರಾಥೋಡ್ ಅವರನ್ನು 27,663 ಮತಗಳ ಬೃಹತ್ ಅಂತರದಿಂದ ಸೋಲಿಸಿ ತಮ್ಮ ಪ್ರಾಬಲ್ಯ ಮೆರೆದಿದ್ದಾರೆ. ಇತ್ತ ಬಿಜೆಪಿ ಕೇವಲ ಮೀರತ್ ಮತ್ತು ಆಗ್ರಾ ಪದವೀಧರ ಕ್ಷೇತ್ರಗಳ ಗೆಲುವಿಗೆ ಮಾತ್ರ ತೃಪ್ತಿಪಡಬೇಕಾಯಿತು.
ಇನ್ನು ಶಿಕ್ಷಕರ ಕ್ಷೇತ್ರಗಳ 6 ಸೀಟುಗಳ ಪೈಕಿ ಬಿಜೆಪಿ ನಾಲ್ಕರಲ್ಲಿ (ಲಖನೌ, ಮೀರತ್, ಬರೇಲಿ-ಮೊರಾದಾಬಾದ್, ಗೋರಖ್‌ಪುರ) ಗೆದ್ದರೆ, ಎಸ್‌ಪಿ ಆಗ್ರಾ ಮತ್ತು ವಾರಾಣಸಿ ಕ್ಷೇತ್ರಗಳನ್ನು ಒಲಿಸಿಕೊಂಡಿದೆ. ಆಗ್ರಾ-ಅಲಿಗಢ ಶಿಕ್ಷಕರ ಕ್ಷೇತ್ರದಲ್ಲಿ ಎಸ್‌ಪಿಯ ಆಕಾಶ್ ಅಗರ್‌ವಾಲ್ ಅವರು ಬಿಜೆಪಿಯ ಹರಿ ಕಿಶೋರ್ ತಿವಾರಿ ಅವರನ್ನು 4,263 ಮತಗಳಿಂದ ಸೋಲಿಸುವ ಮೂಲಕ ಪಶ್ಚಿಮ ಯುಪಿಯಲ್ಲೂ ಬಿಜೆಪಿಗೆ ಆಘಾತ ನೀಡಿದ್ದಾರೆ.
ಈ ಚುನಾವಣಾ ಫಲಿತಾಂಶವು ಮುಂಬರುವ 2027ರ ವಿಧಾನಸಭಾ ಚುನಾವಣೆಗೆ ಸ್ಪಷ್ಟ ದಿಕ್ಸೂಚಿಯಂತಿದೆ. ಕೇವಲ ಒಂದು ಸ್ಥಾನದ ಅಂತರದಿಂದ (6-5) ಎಸ್‌ಪಿ ಹಿಂದಿದ್ದರೂ, ಅದು ತೋರಿದ ಹೋರಾಟದ ಮನೋಭಾವ ಮತ್ತು ವಿಐಪಿ ಕ್ಷೇತ್ರಗಳಲ್ಲಿನ ಗೆಲುವು ಪಕ್ಷದ ಕಾರ್ಯಕರ್ತರಲ್ಲಿ ಹೊಸ ಹುರುಪು ತುಂಬಿದೆ. ನಿರುದ್ಯೋಗ, ಶಿಕ್ಷಕರ ಸಮಸ್ಯೆಗಳನ್ನು ಮುಂದಿಟ್ಟುಕೊಂಡು ಎಸ್‌ಪಿ ಹೆಣೆದ ತಂತ್ರ ಯಶಸ್ವಿಯಾಗಿದ್ದು, ಈ ಫಲಿತಾಂಶವು ಬಿಜೆಪಿಗೆ ಗಂಭೀರವಾದ ಆತ್ಮಾವಲೋಕನದ ಸಂದೇಶವನ್ನು ರವಾನಿಸಿದೆ.
