ನಿರಂತರವಾಗಿ ಸುರಿಯುತ್ತಿರುವ ಭಾರಿ ಮಳೆಯಿಂದಾಗಿ ಅಸ್ಸಾಂನಲ್ಲಿ ಪ್ರವಾಹ ಪರಿಸ್ಥಿತಿ ಗಂಭೀರ ಸ್ವರೂಪ ಪಡೆದುಕೊಂಡಿದ್ದು, 1.7 ಲಕ್ಷಕ್ಕೂ ಹೆಚ್ಚು ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ವಿಶೇಷವಾಗಿ ಪೂರ್ವ ಅಸ್ಸಾಂ ಭಾಗದಲ್ಲಿ ಜಲಾವೃತ ಭೀತಿ ಎದುರಾಗಿದ್ದು, ಸೋಮವಾರ ಬೆಳಗಿನ ಜಾವದ ವೇಳೆಗೆ ಐದು ಪ್ರಮುಖ ನದಿಗಳು ಅಪಾಯದ ಮಟ್ಟವನ್ನು ಮೀರಿ ಹರಿಯುತ್ತಿವೆ.
ರಾಜ್ಯದ 12 ಜಿಲ್ಲೆಗಳ ಸುಮಾರು 580 ಹಳ್ಳಿಗಳು ಪ್ರವಾಹದ ನೀರಿಗೆ ಸಿಲುಕಿವೆ. ಶಿವಸಾಗರ ಜಿಲ್ಲೆಯ ನಾಜಿರಾ ನಿವಾಸಿ ಪ್ರದೀಪ್ ಕಲಿತಾ ಎಂಬುವವರು ತಮ್ಮ ಅಳಲು ತೋಡಿಕೊಂಡಿದ್ದು, “ರಾತ್ರೋರಾತ್ರಿ ಎದೆಯ ಮಟ್ಟಕ್ಕೆ ನೀರು ನುಗ್ಗಿದೆ. ಜಾನುವಾರುಗಳು ಕೊಚ್ಚಿಹೋಗಿದ್ದು, ಇಡೀ ಕುಟುಂಬ ಸದ್ಯ ಮನೆಯ ಮೇಲ್ಛಾವಣಿಯ ಮೇಲೆ ಆಶ್ರಯ ಪಡೆದಿದೆ” ಎಂದು ಪರಿಸ್ಥಿತಿಯ ಭೀಕರತೆಯನ್ನು ವಿವರಿಸಿದ್ದಾರೆ.
ಪ್ರವಾಹ ಪೀಡಿತ ಪ್ರದೇಶಗಳಲ್ಲಿ ಕಾರ್ಯಾಚರಣೆ ನಡೆಸಲು ರಾಷ್ಟ್ರೀಯ ವಿಪತ್ತು ಸ್ಪಂದನಾ ಪಡೆಯ (NDRF) ಒಟ್ಟು 8 ತಂಡಗಳನ್ನು 34 ಬೋಟ್‌ಗಳೊಂದಿಗೆ ಶಿವಸಾಗರ, ಚರಾಯ್ದಿಯೋ ಮತ್ತು ಜೋರ್ಹತ್ ಜಿಲ್ಲೆಗಳಲ್ಲಿ ನಿಯೋಜಿಸಲಾಗಿದೆ. ಪರಿಸ್ಥಿತಿ ಮತ್ತಷ್ಟು ಕೈಮೀರಿದರೆ ತಕ್ಷಣವೇ ರಕ್ಷಣಾ ಕಾರ್ಯಕ್ಕೆ ಧಾವಿಸಲು ಸಿದ್ಧರಿರುವಂತೆ ಭಾರತೀಯ ಸೇನೆ ಮತ್ತು ವಾಯುಪಡೆಗೆ (IAF) ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಸೂಚನೆ ನೀಡಿದ್ದಾರೆ.
ಅಸ್ಸಾಂ ವಿಪತ್ತು ನಿರ್ವಹಣಾ ಪ್ರಾಧಿಕಾರದ (ASDMA) ವರದಿಯ ಪ್ರಕಾರ, ಶಿವಸಾಗರದಲ್ಲಿ ದಿಖೋವ್ ನದಿಯು ಅಪಾಯದ ಮಟ್ಟಕ್ಕಿಂತ 2.10 ಮೀಟರ್ ಎತ್ತರದಲ್ಲಿ ಹರಿಯುತ್ತಿದ್ದು, ‘ಅತಿ ತೀವ್ರ ಪ್ರವಾಹ ಪರಿಸ್ಥಿತಿ’ ನಿರ್ಮಾಣವಾಗಿದೆ. ಇದರೊಂದಿಗೆ ಧನ್ಸಿರಿ, ಬುರ್ಹಿದಿಹಿಂಗ್, ದಿಸಾಂಗ್ ಮತ್ತು ಬ್ರಹ್ಮಪುತ್ರ ನದಿಗಳು ಸಹ ಉಕ್ಕಿ ಹರಿಯುತ್ತಿವೆ. ನದಿ ತೀರದ ಏರಿಗಳು ಒಡೆಯದಂತೆ ತಡೆಯಲು ಮರಳು ಮೂಟೆಗಳನ್ನು ಜೋಡಿಸುವ ತುರ್ತು ಕಾಮಗಾರಿಗಳು ನಡೆಯುತ್ತಿವೆ.
ಭಾರಿ ಪ್ರವಾಹದ ಬಿಸಿ ರೈಲ್ವೆ ಸೇವೆಗೂ ತಟ್ಟಿದೆ. ಶಿವಸಾಗರ ಜಿಲ್ಲೆಯ ಸಿಮಲಗುರಿ ವಲಯದಲ್ಲಿ ರೈಲ್ವೆ ಹಳಿಗಳು ಸಂಪೂರ್ಣವಾಗಿ ಜಲಾವೃತಗೊಂಡಿವೆ. ಮುನ್ನೆಚ್ಚರಿಕಾ ಕ್ರಮವಾಗಿ ಈ ಮಾರ್ಗದಲ್ಲಿ ಚಲಿಸುವ 2 ರೈಲುಗಳನ್ನು ರದ್ದುಗೊಳಿಸಲಾಗಿದ್ದು, 6 ರೈಲುಗಳ ಮಾರ್ಗ ಬದಲಾವಣೆ ಮಾಡಲಾಗಿದೆ ಹಾಗೂ 10 ರೈಲುಗಳ ಸಂಚಾರವನ್ನು ಅರ್ಧಕ್ಕೇ ಕಡಿತಗೊಳಿಸಲಾಗಿದೆ. ಇಡೀ ರಾಜ್ಯದಲ್ಲಿ ರಕ್ಷಣಾ ಕಾರ್ಯಾಚರಣೆ ಯುದ್ಧೋಪಾದಿಯಲ್ಲಿ ಸಾಗಿದೆ.
