“ಮಹಿಳೆಯರು ಭಾರತದ ಅತಿದೊಡ್ಡ ಶಕ್ತಿ ಮತ್ತು ಆಸ್ತಿ. ಅವರು ಕೇವಲ ಪುರುಷರೊಂದಿಗಿನ ಸಂಬಂಧಗಳ ಮೂಲಕ ಮಾತ್ರ ಗುರುತಿಸಿಕೊಳ್ಳಬಾರದು. ಬದಲಾಗಿ, ತಮಗಾಗಿ ತಾವು ನಿಲ್ಲುವ ಮೂಲಕ ತಮ್ಮದೇ ಆದ ಸ್ವತಂತ್ರ ಗುರುತನ್ನು ಹೊಂದಿರಬೇಕು” ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಪ್ರತಿಪಾದಿಸಿದ್ದಾರೆ.
ಪುಣೆಯಲ್ಲಿ ಶನಿವಾರ ಆಯೋಜಿಸಲಾಗಿದ್ದ ಯುವಜನ ಸಂಪರ್ಕ ಕಾರ್ಯಕ್ರಮ ‘ಛಾತ್ರೋಂ ಕಿ ಗೂಂಜ್’ ದಲ್ಲಿ ವಿದ್ಯಾರ್ಥಿನಿಯರನ್ನು ಉದ್ದೇಶಿಸಿ ಮಾತನಾಡಿದ ಅವರು, ಮಹಿಳೆಯರು ತಮ್ಮ ಕುಟುಂಬದ ಜವಾಬ್ದಾರಿಗಳ ಆಚೆಗೂ ವೃತ್ತಿಪರರಾಗಿ, ಕ್ರೀಡಾಪಟುಗಳಾಗಿ ಹಾಗೂ ತಮ್ಮದೇ ಆದ ಕನಸುಗಳನ್ನು ಬೆನ್ನತ್ತುವ ಮೂಲಕ ಸ್ವತಂತ್ರರಾಗಿರಬೇಕು ಎಂದು ಕರೆ ನೀಡಿದರು.
ಸಮಾಜದಲ್ಲಿ ಮಹಿಳೆಯರನ್ನು ನೋಡುವ ದೃಷ್ಟಿಕೋನದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ರಾಹುಲ್ ಗಾಂಧಿ, “ಹೆಚ್ಚಿನ ಬಾರಿ ಮಹಿಳೆಯರನ್ನು ಕೇವಲ ಮಗಳು, ಪತ್ನಿ ಅಥವಾ ತಾಯಿ ಎಂಬ ಮೂರು ಪಾತ್ರಗಳಿಗೆ ಸೀಮಿತಗೊಳಿಸಲಾಗುತ್ತದೆ. ಈ ಪಾತ್ರಗಳಲ್ಲಿ ಯಾವುದೇ ತಪ್ಪಿಲ್ಲ. ಆದರೆ ಇದೊಂದೇ ನಿಮ್ಮ ಅಂತಿಮ ಗುರುತಾಗಬಾರದು ಎಂದು ಹೇಳಿದರು.
ಮಹಿಳೆಯರ ಸ್ವಾತಂತ್ರ್ಯದ ಬಗ್ಗೆ ಮಾತನಾಡುವಾಗ ಮನುಸ್ಮೃತಿಯನ್ನು ಉಲ್ಲೇಖಿಸಿದ ಅವರು, “ಮಹಿಳೆ ಎಂದಿಗೂ ಸ್ವತಂತ್ರಳಾಗಿರಬಾರದು ಎಂದು ಅದರಲ್ಲಿ ಹೇಳಲಾಗಿದೆ. ಇದು ನಿಜಕ್ಕೂ ನಾಚಿಕೆಗೇಡಿನ ಸಂಗತಿ. ಮಹಿಳೆಯರು ತಮ್ಮನ್ನು ತಾವು ನಂಬಬೇಕು. ನೀವು ಯಾರಿಗೂ ಸೇರಿದವರಲ್ಲ, ನಿಮ್ಮ ಮೇಲೆ ಕೇವಲ ನಿಮಗೆ ಮಾತ್ರ ಹಕ್ಕಿದೆ” ಎಂದು ಕಿವಿಮಾತು ಹೇಳಿದರು. ತಂದೆ, ಸಹೋದರ, ಪತಿ ಅಥವಾ ಮಕ್ಕಳೊಂದಿಗಿನ ಸಂಬಂಧಗಳು ಇರಲಿ, ಆದರೆ ಆ ಸಂಬಂಧಗಳು ಮಹಿಳೆಯೊಬ್ಬಳ ಸ್ವಾತಂತ್ರ್ಯ ಅಥವಾ ಆಕೆಯ ಅಸ್ತಿತ್ವವನ್ನು ಎಂದಿಗೂ ನಿರ್ಧರಿಸಬಾರದು ಎಂದು ಅವರು ಇದೇ ವೇಳೆ ಸ್ಪಷ್ಟಪಡಿಸಿದರು.
