”ನಮ್ಮ ಮಕ್ಕಳ ಶಿಕ್ಷಣದ ನೈಜ ಪರಿಸ್ಥಿತಿ ಇದು. ಹೀಗಾದರೆ ಭಾರತ ‘ವಿಶ್ವಗುರು’ ಆಗುವುದು ಹೇಗೆ?” ಎಂದು ಪ್ರಶ್ನಿಸಿ, ಪಾಳುಬಿದ್ದ ಹಾಗೂ ಕಸದ ತೊಟ್ಟಿಯಂತಿದ್ದ ಸರ್ಕಾರಿ ಶಾಲೆಯ ವಾಸ್ತವವನ್ನು ವಿಡಿಯೋ ಮಾಡಿ ಜಾಲತಾಣದಲ್ಲಿ ಹಂಚಿಕೊಂಡಿದ್ದ ಯುವ ಹೋರಾಟಗಾರನ ಮೇಲೆ ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ಸರ್ಕಾರ ಎಫ್‌ಐಆರ್ ದಾಖಲಿಸಿದೆ. ಶಾಲೆಗಳ ಮೂಲಸೌಕರ್ಯಗಳನ್ನು ಸರಿಪಡಿಸುವ ಬದಲು, ತಮ್ಮ ವೈಫಲ್ಯಗಳನ್ನು ಬೆತ್ತಲೆ ಮಾಡಿದವರ ಧ್ವನಿ ಅಡಗಿಸಲು ಯುಪಿ ಸರ್ಕಾರ ಮತ್ತು ಪೊಲೀಸ್ ವ್ಯವಸ್ಥೆ ಮುಂದಾಗಿರುವುದು ತೀವ್ರ ಟೀಕೆಗೆ ಗುರಿಯಾಗಿದೆ.
ಯುವಕರ ಸಮಸ್ಯೆಗಳು ಮತ್ತು ಶಿಕ್ಷಣದ ದುಸ್ಥಿತಿಯನ್ನು ಪ್ರಶ್ನಿಸಲು ಪೂರ್ವ ಉತ್ತರ ಪ್ರದೇಶದಲ್ಲಿ ಹಮ್ಮಿಕೊಳ್ಳಲಾಗಿದ್ದ ‘ಜೆನ್-ಝೆಡ್ ಕನೆಕ್ಟ್ ಯಾತ್ರೆ’ಯ ಭಾಗವಾಗಿ, ಆಗಸ್ಟ್ 16 ರಂದು ದೇವರಿಯಾ ಜಿಲ್ಲೆಯ ದಮರ್ ಬಿಸ್ವಾ ಗ್ರಾಮದ ಸರ್ಕಾರಿ ಪ್ರಾಥಮಿಕ ಶಾಲೆಗೆ ಭೇಟಿ ನೀಡಿದ್ದ ರಜತ್ ಸಿಂಗ್ ಎಂಬ ಯುವಕ, ಶಾಲೆಯ ದುಸ್ಥಿತಿಯನ್ನು ಫೇಸ್‌ಬುಕ್ ವಿಡಿಯೋ ಮೂಲಕ ತೆರೆದಿಟ್ಟಿದ್ದರು. ವಿಡಿಯೋದಲ್ಲಿ ಹೆಣ್ಣುಮಕ್ಕಳ ಮುರಿದ ಶೌಚಾಲಯಗಳು, ಬಿರುಕು ಬಿಟ್ಟ ಕಟ್ಟಡ ಮತ್ತು ಆವರಣದ ತುಂಬಾ ಬಿದ್ದಿದ್ದ ಕಸದ ರಾಶಿ ಸ್ಪಷ್ಟವಾಗಿ ಸೆರೆಯಾಗಿತ್ತು.
ಶಾಲೆಯ ಕಳಪೆ ಸ್ಥಿತಿಯನ್ನು ಕಂಡು ನಾಚಿಕೆಪಟ್ಟು ಸರಿಪಡಿಸಬೇಕಿದ್ದ ಶಿಕ್ಷಣ ಇಲಾಖೆ, ಸತ್ಯವನ್ನು ಮುಚ್ಚಿಹಾಕುವ ಯತ್ನವಾಗಿ ಗೌರಿಬಜಾರ್‌ನ ಕ್ಷೇತ್ರ ಶಿಕ್ಷಣಾಧಿಕಾರಿ (ಬಿಇಒ) ವಿನಯ್ ಶೀಲ್ ಮಿಶ್ರಾ ಅವರ ಮೂಲಕ ದೂರು ನೀಡಿಸಿದೆ. ಇದರ ಆಧಾರದ ಮೇಲೆ, ಪೊಲೀಸರು ರಜತ್ ಸಿಂಗ್ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 329(4) (ಅಕ್ರಮ ಗೃಹ ಪ್ರವೇಶ) ಮತ್ತು 353(2) (ಸುಳ್ಳು ಮಾಹಿತಿ ಹರಡಿ ಸಮುದಾಯಗಳ ನಡುವೆ ದ್ವೇಷ ಬಿತ್ತುವುದು) ಅಡಿಯಲ್ಲಿ ಕ್ರಿಮಿನಲ್ ಪ್ರಕರಣ ದಾಖಲಿಸಿದ್ದಾರೆ. ಒಂದು ಪಾಳುಬಿದ್ದ ಶಾಲೆಯ ದುಸ್ಥಿತಿಯನ್ನು ತೋರಿಸುವುದರಿಂದ ಎರಡು ಸಮುದಾಯಗಳ ನಡುವೆ ಹೇಗೆ ದ್ವೇಷ ಹುಟ್ಟುತ್ತದೆ ಎಂಬ ಬಗ್ಗೆ ಪೊಲೀಸರಾಗಲೀ, ಶಿಕ್ಷಣ ಇಲಾಖೆಯಾಗಲೀ ಯಾವುದೇ ಸ್ಪಷ್ಟನೆ ನೀಡಿಲ್ಲ. ಇದು ಕೇವಲ ದನಿ ಅಡಗಿಸುವ ತಂತ್ರ ಎಂಬುದು ಸ್ಪಷ್ಟವಾಗಿದೆ.
ತಮ್ಮ ವೈಫಲ್ಯಗಳು ಎಲ್ಲಿ ಜಗಜ್ಜಾಹೀರಾಗುತ್ತವೆಯೋ ಎಂಬ ಭಯದಿಂದ, ಯುಪಿ ಸರ್ಕಾರವು ಸರ್ಕಾರಿ ಶಾಲೆಗಳ ಆವರಣಕ್ಕೆ ಯೂಟ್ಯೂಬರ್‌ಗಳು ಮತ್ತು ಸಾರ್ವಜನಿಕರು ಪ್ರವೇಶಿಸಿ ವಿಡಿಯೋ ಮಾಡುವುದನ್ನೇ ನಿಷೇಧಿಸಿದೆ. ಹಾಪುರ್, ಅಯೋಧ್ಯೆ, ಆಗ್ರಾ, ಬಲ್ಲಿಯಾ ಸೇರಿದಂತೆ ಕನಿಷ್ಠ 7 ಜಿಲ್ಲೆಗಳಲ್ಲಿ ಈ ಫರ್ಮಾನು ಹೊರಡಿಸಲಾಗಿದೆ. ‘ಆಪರೇಷನ್ ಕಾಯಕಲ್ಪ’ ಯೋಜನೆಯಡಿ ಶಾಲೆಗಳೆಲ್ಲಾ ಉದ್ಧಾರವಾಗಿವೆ ಎಂದು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಮತ್ತು ಶಿಕ್ಷಣ ಸಚಿವ ಸಂದೀಪ್ ಸಿಂಗ್ ಭಾಷಣ ಮಾಡುತ್ತಿದ್ದಾರೆ. ಆದರೆ ವಾಸ್ತವವನ್ನು ತೋರಿಸಿದವರ ವಿರುದ್ಧ ಸಿಎಂ ಯೋಗಿ, “ಕೆಲವರು ಕೇವಲ ನಕಾರಾತ್ಮಕತೆಯನ್ನು ಹುಡುಕುತ್ತಿದ್ದಾರೆ” ಎಂದು ಟೀಕಿಸುವ ಮೂಲಕ ಸರ್ಕಾರದ ಲೋಪಗಳನ್ನು ಸಮರ್ಥಿಸಿಕೊಂಡಿದ್ದಾರೆ.
ತಮ್ಮ ಮೇಲಿನ ಎಫ್‌ಐಆರ್ ಬಗ್ಗೆ ಕಿಂಚಿತ್ತೂ ಅಂಜದ ರಜತ್ ಸಿಂಗ್, ಈ ಸತ್ಯ ಹೇಳಿದ್ದಕ್ಕಾಗಿ ತಾನು ಜೈಲಿಗೆ ಹೋಗಬೇಕಾದರೂ ಸಿದ್ಧ ಎಂದಿದ್ದಾರೆ. ಎಫ್‌ಐಆರ್ ಹಾಕಿ ಬೆದರಿಸುವ ಬದಲು, ಆಡಳಿತವು ಶೌಚಾಲಯಗಳು ಮತ್ತು ಸೋರುವ ಚಾವಣಿಗಳನ್ನು ಸರಿಪಡಿಸಲು ಅದೇ ಶಕ್ತಿಯನ್ನು ಬಳಸಿದರೆ ಒಳಿತು ಎಂದು ಸರ್ಕಾರಕ್ಕೆ ತಿರುಗೇಟು ನೀಡಿದ್ದಾರೆ. ತಿಂಗಳುಗಟ್ಟಲೆ ಬಿದ್ದಿದ್ದ ಕಸ ಮತ್ತು ಅವಶೇಷಗಳನ್ನು ತಮ್ಮ ವಿಡಿಯೋ ವೈರಲ್ ಆದ ಮೇಲೆಯೇ ರಾತ್ರೋರಾತ್ರಿ ತೆರವುಗೊಳಿಸಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ. ಸರ್ಕಾರ ನಿಜವಾಗಿಯೂ ಶಾಲೆಗಳನ್ನು ಉದ್ಧಾರ ಮಾಡಿದ್ದರೆ, ಸತ್ಯವನ್ನು ತೋರಿಸಲು ಯೂಟ್ಯೂಬರ್‌ಗಳನ್ನು ಶಾಲೆಗಳಿಗೆ ಅವರೇ ಆಹ್ವಾನಿಸಬೇಕಿತ್ತಲ್ಲವೇ ಎಂದು ಪ್ರಶ್ನಿಸಿರುವ ಅವರು, ಮೂಲಸೌಕರ್ಯ ಒದಗಿಸುವಲ್ಲಿ ವಿಫಲವಾಗಿರುವ ಸರ್ಕಾರ ವಾಸ್ತವವನ್ನು ಮುಚ್ಚಿಹಾಕಲು ಸರ್ವಾಧಿಕಾರಿ ಧೋರಣೆ ಪ್ರದರ್ಶಿಸುತ್ತಿದೆ ಎಂದು ಕಿಡಿಕಾರಿದ್ದಾರೆ.
