ಬಿಹಾರದ ಮಾಜಿ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಪುತ್ರ ಜನತಾ ದಳ (ಯುನೈಟೆಡ್) ನಾಯಕ ನಿಶಾಂತ್ ಕುಮಾರ್ ಗುರುವಾರ ಬಿಜೆಪಿ ನೇತೃತ್ವದ ರಾಜ್ಯ ಸಚಿವ ಸಂಪುಟದಲ್ಲಿ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ ಸರ್ಕಾರದ ಮೊದಲ ಸಂಪುಟ ವಿಸ್ತರಣೆಯ ಭಾಗವಾಗಿ ನಿಶಾಂತ್ ಸೇರಿ ಒಟ್ಟು 31 ಮಂದಿ ಇತರ ಶಾಸಕರು ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ.
ನಿಶಾಂತ್ ಕುಮಾರ್ ಮಾರ್ಚ್‌ನಲ್ಲಿ ಜೆಡಿಯು ಸೇರಿದ್ದರು. ರಾಂಚಿಯ ಮೆಸ್ರಾದ ಬಿರ್ಲಾ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಲ್ಲಿ ಅಧ್ಯಯನ ಮಾಡಿದ ನಿಶಾಂತ್ ಮಾರ್ಚ್‌ನಲ್ಲಿ ಜೆಡಿಯು ಸೇರುವವರೆಗೂ ರಾಜಕೀಯವಾಗಿ ತೊಡಗಿದವರಲ್ಲ, ಶಾಸಕರೂ ಅಲ್ಲ. ಆದರೆ ಆರು ತಿಂಗಳಲ್ಲೇ ವಿಧಾನಸಭೆಗೆ ಆಯ್ಕೆಯಾಗಿದ್ದಾರೆ. ಈ ಮೂಲಕ ಬಿಹಾರ ಎನ್‌ಡಿಎ ಪರಿವಾರದಲ್ಲಿ ಮತ್ತೊಂದು ಪುತ್ರೋದಯವಾಗಿದೆ!
ಇದನ್ನು ಓದಿದ್ದೀರಾ? ಬಿಹಾರ ರಾಜಕೀಯದಲ್ಲಿ ‘ಪುತ್ರೋದಯ’ – ಕುಟುಂಬ ರಾಜಕಾರಣ ಕೆಸರಿನಲ್ಲಿ ಬಿಜೆಪಿಯ ಮಜ್ಜನ
ಪ್ರಮಾಣ ವಚನ ಸ್ವೀಕಾರ ಸಮಾರಂಭವು ಪಟನಾದ ಗಾಂಧಿ ಮೈದಾನದಲ್ಲಿ ನಡೆಯಿತು. ಈ ಹಿಂದೆ ಹಲವು ಬಾರಿ ಕುಟುಂಬ ರಾಜಕಾರಣ ವಿರುದ್ಧ ಭಾಷಣ ಮಾಡಿರುವ, ವಿಪಕ್ಷಗಳನ್ನು ಟೀಕಿಸಿರುವ ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮತ್ತು ಇತರ ಎನ್‌ಡಿಎ ನಾಯಕರೂ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ನವೆಂಬರ್‌ನಲ್ಲಿ ವಿಧಾನಸಭೆ ಚುನಾವಣೆ ನಡೆದಿದೆ. ಬಿಹಾರದಲ್ಲಿ ಎನ್‌ಡಿಎ ಅಧಿಕಾರವನ್ನು ಉಳಿಸಿಕೊಂಡಿದೆ. ಜೆಡಿಯು 85 ಸ್ಥಾನಗಳನ್ನು ಗೆದ್ದಿದೆ. ಬಿಜೆಪಿ ಸ್ಪರ್ಧಿಸಿದ 101 ಕ್ಷೇತ್ರಗಳಲ್ಲಿ 89 ಸ್ಥಾನಗಳನ್ನು ಗೆದ್ದು ಏಕೈಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ. ಅದಾದ ಬಳಿಕ ನಿತೀಶ್ ಕುಮಾರ್ 10ನೇ ಬಾರಿಗೆ ಮುಖ್ಯಮಂತ್ರಿಯಾದರು. ಆದರೆ ಮಾರ್ಚ್ 16ರಂದು ನಿತೀಶ್ ರಾಜ್ಯಸಭೆಗೆ ಆಯ್ಕೆಯಾಗಿದ್ದು, ಏಪ್ರಿಲ್ 14ರಂದು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಅದರ ಮರುದಿನವೇ ಬಿಜೆಪಿಯ ಚೌಧರಿ ಪ್ರಮಾಣ ವಚನ ಸ್ವೀಕರಿಸಿದರು. ಈ ಮೂಲಕ ರಾಜ್ಯದ ಮೊದಲ ಬಿಜೆಪಿ ಮುಖ್ಯಮಂತ್ರಿಯಾದರು.
ಆದರೆ ನಿತೀಶ್ ಕುಟುಂಬಕ್ಕೆ ಮಣೆ ಹಾಕುವ ಕುಟುಂಬ ರಾಜಕಾರಣವನ್ನೂ ಬಿಜೆಪಿ ನಡೆಸಿದೆ. ಅಷ್ಟಕ್ಕೂ ಬಿಹಾರದಲ್ಲಿ ವಂಶ ರಾಜಕಾರಣ ಈಗ ಆರಂಭವಾಗುತ್ತಿರುವುದಲ್ಲ. ಬಿಜೆಪಿ ಮೈತ್ರಿಯೊಂದಿಗೆ ಚುನಾವಣೆ ಗೆದ್ದು ಸರ್ಕಾರ ರಚನೆಯಾದಾಗಲೇ ಈ ಕುಟುಂಬ ರಾಜಕೀಯದ ಚರ್ಚೆ ನಡೆದಿತ್ತು. ಅದಕ್ಕೆ ಕಾರಣ ನಿತೀಶ್ ಸಂಪುಟದ 26 ಸಚಿವರಲ್ಲಿ 10 ಮಂದಿಗೆ ರಾಜಕೀಯ ಹಿನ್ನೆಲೆ ಇರುವುದು.
