ಕರ್ನಾಟಕ ವಿಧಾನಸಭೆಯ ಸಭಾಪತಿ ಯು.ಟಿ. ಖಾದರ್ ಅವರು, ಸಚಿವಾಲಯದ ಸಿಬ್ಬಂದಿಯನ್ನು ಜನಗಣತಿ ಕೆಲಸಕ್ಕೆ ನಿಯೋಜಿಸಲು ನಿರಾಕರಿಸಿದ್ದಾರೆ. ಸಭಾಪತಿಗಳ ʼಸ್ವತಂತ್ರ ಶಾಸಕಾಂಗʼ ವಾದದ ಹಿಂದಿರುವ ಮುಖ್ಯಾಂಶಗಳೇನು ಎನ್ನುವುದರ ಬಗ್ಗೆ ಈಗ ರಾಜ್ಯ ರಾಜಕಾರಣ ಮತ್ತು ಆಡಳಿತ ವಲಯದಲ್ಲಿ ದೊಡ್ಡ ಚರ್ಚೆಯಾಗುತ್ತಿದೆ.
ಭಾರತೀಯ ಸಂವಿಧಾನದ ಪ್ರಕಾರ ಪ್ರಜಾಪ್ರಭುತ್ವದ ಮೂರು ಅಂಗಗಳಾದ ಶಾಸಕಾಂಗ, ಕಾರ್ಯಾಂಗ ಮತ್ತು ನ್ಯಾಯಾಂಗ ಸ್ವತಂತ್ರವಾಗಿ ಕಾರ್ಯನಿರ್ವಹಿಸಬೇಕು. ಸಚಿವಾಲಯದ ಸಿಬ್ಬಂದಿ ನೇರವಾಗಿ ಸಭಾಪತಿಗಳ ಆಡಳಿತಾತ್ಮಕ ನಿಯಂತ್ರಣಕ್ಕೆ ಬರುತ್ತಾರೆಯೇ ಹೊರತು, ಸರ್ಕಾರದ (ಕಾರ್ಯಾಂಗದ) ಸಾಮಾನ್ಯ ಆದೇಶಗಳಿಗೆ ಅಲ್ಲ ಎನ್ನುವುದು ಖಾದರ್ ಅವರ ವಾದ.
ವಿಧಾನಸಭೆ ಮತ್ತು ವಿಧಾನಪರಿಷತ್ ಸಚಿವಾಲಯಗಳು ಸ್ವತಂತ್ರ ಘಟಕಗಳು. ಇಲ್ಲಿನ ಸಿಬ್ಬಂದಿಯನ್ನು ಜನಗಣತಿ, ಚುನಾವಣೆ ಅಥವಾ ಇತರ ನಾಗರಿಕ ಸೇವೆಗಳಿಗೆ ಬಳಸಿಕೊಳ್ಳಬೇಕಾದರೆ ಸಭಾಪತಿಗಳ ಅನುಮತಿ ಕಡ್ಡಾಯ. “ನಾವು ಸರ್ಕಾರದ ಅಡಿಯಲ್ಲಿ ಬರುವ ಇಲಾಖೆಯಲ್ಲ” ಎಂದು ಹೇಳುವ ಮೂಲಕ ಸ್ಪೀಕರ್ ಅವರು ಶಾಸಕಾಂಗದ ಘನತೆ ಮತ್ತು ಸ್ವಾಯತ್ತತೆಯನ್ನು ಎತ್ತಿ ಹಿಡಿಯಲು ಪ್ರಯತ್ನಿಸುತ್ತಿದ್ದಾರೆ.
ಇದನ್ನೂ ಓದಿ : ಬಾಗಲಕೋಟೆ ಉಪ ಚುನಾವಣೆ | ಕಾಂಗ್ರೆಸ್‌ಗೆ ಚರಂತಿಮಠ ಅವರೇ ಸವಾಲು
ಸಚಿವಾಲಯದ ಸಿಬ್ಬಂದಿ ಅಧಿವೇಶನ ನಿರ್ವಹಣೆ, ಸಮಿತಿಗಳ ಸಭೆ ಇತ್ಯಾದಿಗಳನ್ನು ಮಾಡುತ್ತಾರೆ. ಅವರನ್ನು ಹೊರಗಿನ ಕೆಲಸಗಳಿಗೆ ನಿಯೋಜಿಸಿದರೆ ಶಾಸಕಾಂಗದ ದೈನಂದಿನ ಕಲಾಪಗಳಿಗೆ ಮತ್ತು ಶಾಸಕರ ಹಕ್ಕುಗಳಿಗೆ ಧಕ್ಕೆಯಾಗುತ್ತದೆ ಎಂಬುದು ಮತ್ತೊಂದು ಪ್ರಮುಖ ಕಾರಣ.
ಸಭಾಪತಿಗಳ ವಾದದ ಹಿಂದಿನ ಕಾನೂನು ಅಂಶಗಳೇನು?
ಭಾರತೀಯ ಸಂವಿಧಾನದ 187ನೇ ವಿಧಿ ರಾಜ್ಯ ಶಾಸಕಾಂಗಕ್ಕೆ ತನ್ನದೇ ಆದ ಪ್ರತ್ಯೇಕ ಸಚಿವಾಲಯದ ಸಿಬ್ಬಂದಿಯನ್ನು ಹೊಂದುವ ಅಧಿಕಾರ ನೀಡುತ್ತದೆ. ಸಚಿವಾಲಯದ ಮೇಲೆ ಸರ್ಕಾರದ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆಯ (DPAR) ಪೂರ್ಣ ನಿಯಂತ್ರಣ ಇರುವುದಿಲ್ಲ.
ಸಭಾಪತಿಗಳ ಅವರ ಈ ನಿಲುವು “ಶಾಸಕಾಂಗ ಕಾರ್ಯಾಂಗದ ಕೈಗೊಂಬೆಯಲ್ಲ” ಎಂಬ ಸಾಂವಿಧಾನಿಕ ಸಂದೇಶವನ್ನು ಸಾರುವ ಪ್ರಯತ್ನವಾಗಿದೆ ಎನ್ನುವುದು ಇಲ್ಲಿ ಮುಖ್ಯಾಂಶವಾಗಿದೆ. ಇದು ಮುಂಬರುವ ದಿನಗಳಲ್ಲಿ ಸರ್ಕಾರ ಮತ್ತು ಶಾಸಕಾಂಗದ ನಡುವೆ ಆಡಳಿತಾತ್ಮಕ ಅಧಿಕಾರ ಹಂಚಿಕೆಯ ಬಗ್ಗೆ ಹೊಸ ಚರ್ಚೆಯನ್ನು ಹುಟ್ಟುಹಾಕಬಹುದು ಎನ್ನುವ ವಿಶ್ಲೇಷಣೆಯೂ ಕೇಳಿ ಬರುತ್ತಿದೆ.
