ಉತ್ತರ ಪ್ರದೇಶದಲ್ಲಿ ಮುಂದಿನ ವರ್ಷದ ಫೆಬ್ರವರಿ-ಮಾರ್ಚ್‌ನಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದೆ. ಚುನಾವಣೆಗೆ ಕೆಲವೇ ತಿಂಗಳುಗಷ್ಟೇ ಬಾಕಿ ಇರುವ ಸಮಯದಲ್ಲಿ, ಕೇವಲ 2 ಶಾಸಕರನ್ನು ಮಾತ್ರವೇ ಹೊಂದಿರುವ ಕಾಂಗ್ರೆಸ್, ಈ ಬಾರಿ ತನ್ನ ನೆಲೆಯನ್ನು ಮರಳಿ ವಿಸ್ತರಿಸಿಕೊಳ್ಳಲು ಮುಂದಾಗಿದೆ. ಸಂಘಟನೆಯಲ್ಲಿ ನಾನಾ ರೀತಿಯ ಬದಲಾವಣೆಗಳನ್ನು ಮಾಡುತ್ತಿದೆ. ಪಕ್ಷದ ಹೈಕಮಾಂಡ್‌, ರಾಜ್ಯ ನಾಯಕತ್ವದಲ್ಲಿ ಸಾಮಾಜಿಕ ಸಮೀಕರಣಗಳನ್ನು ಮರುಹೊಂದಿಸುತ್ತಿದೆ. ತನ್ನ ರಾಜ್ಯಾಧ್ಯಕ್ಷರಾಗಿ ಶಾಸಕಿ ಆರಾಧನಾ ಮಿಶ್ರಾ ಮೋನಾ ಮತ್ತು ಕಾರ್ಯಾಧ್ಯಕ್ಷರಾಗಿ ಸಹಾರನ್‌ಪುರ ಲೋಕಸಭಾ ಕ್ಷೇತ್ರದ ಪ್ರಭಾವಿ ಸಂಸದ ಇಮ್ರಾನ್ ಮಸೂದ್ ಅವರನ್ನು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ನೇಮಿಸಿದ್ದಾರೆ. ಈ ಪ್ರಮುಖ ನೇಮಕಗಳು ಉತ್ತರ ಪ್ರದೇಶದ ಹಳೆಯ ಬ್ರಾಹ್ಮಣ-ಮುಸ್ಲಿಂ ಮತಬ್ಯಾಂಕ್ ಸಮೀಕರಣವನ್ನು ಮರುರೂಪಿಸುವ ತಂತ್ರವೆಂದು ಹೇಳಲಾಗುತ್ತಿದೆ.
ಸುಮಾರು 15 ವರ್ಷಗಳ ಸುದೀರ್ಘ ವಿರಾಮದ ನಂತರ ಕಾಂಗ್ರೆಸ್ ಮತ್ತೆ ಬ್ರಾಹ್ಮಣ ಮಹಿಳೆಯೊಬ್ಬರಿಗೆ ರಾಜ್ಯದ ಚುಕ್ಕಾಣಿ ನೀಡಿದೆ. ಈ ಹಿಂದೆ 2007 ರಿಂದ 2012 ರವರೆಗೆ ರೀಟಾ ಬಹುಗುಣ ಜೋಶಿ ಅವರು ಕಾಂಗ್ರೆಸ್ ರಾಜ್ಯ ಅಧ್ಯಕ್ಷೆಯಾಗಿ ಕಾರ್ಯನಿರ್ವಹಿಸಿದ್ದರು. ಇದೀಗ, ರಾಜ್ಯದಲ್ಲಿ ಪಕ್ಷವು ಕುಸಿದಿರುವ ಸಮಯದಲ್ಲಿ ನೂತನ ಅಧ್ಯಕ್ಷೆಯಾಗಿ ಆಯ್ಕೆಯಾಗಿರುವ ಆರಾಧನಾ ಮಿಶ್ರಾ ಅವರಿಗೆ ಹೊಣೆಗಾರಿಕೆ ಮತ್ತು ಪಾತ್ರ ಅತ್ಯಂತ ಮಹತ್ವದ್ದಾಗಿದೆ.
ರಾಜ್ಯಸಭಾ ಸಂಸದ ಪ್ರಮೋದ್ ತಿವಾರಿ ಅವರ ಪುತ್ರಿಯಾಗಿರುವ ಆರಾಧನಾ ಮಿಶ್ರಾ, ಪ್ರತಾಪ್‌ಗಢ ಜಿಲ್ಲೆಯ ರಾಂಪುರ್ ಖಾಸ್ ಕ್ಷೇತ್ರದಿಂದ ಸತತ ಮೂರು ಬಾರಿ (2014, 2017 ಮತ್ತು 2022) ಶಾಸಕಿಯಾಗಿ ಆಯ್ಕೆಯಾಗಿದ್ದು, ತಮ್ಮದೇ ರಾಜಕೀಯ ನೆಲೆ ಕಂಡುಕೊಂಡಿದ್ದಾರೆ. ರಾಜಕೀಯ ಹಿನ್ನೆಲೆಯ ಕುಟುಂಬದಿಂದ ಬಂದಿದ್ದರೂ, ಅವರು ಪಂಚಾಯತ್ ಬ್ಲಾಕ್ ಮಟ್ಟದಿಂದ ರಾಜಕೀಯ ರಂಗಪ್ರವೇಶ ಮಾಡಿ ತಳಮಟ್ಟದ ಸಂಘಟನೆಯ ಅನುಭವ ಹೊಂದಿದ್ದಾರೆ. ಜೊತೆಗೆ, ಪ್ರಿಯಾಂಕಾ ಗಾಂಧಿ ಅವರ ನಿಕಟವರ್ತಿಯಾಗಿ ‘ಲಡ್ಕಿ ಹೂಂ, ಲಡ್ ಸಕ್ತಿ ಹೂಂ’ ಅಭಿಯಾನದಲ್ಲಿ ಸಕ್ರಿಯರಾಗಿಯೂ ಅವರು ತೊಡಗಿಸಿಕೊಂಡಿದ್ದರು. ಅವರು ಪಕ್ಷದ ಮಹಿಳಾ ಮತ್ತು ಬ್ರಾಹ್ಮಣ ಮುಖವಾಗಿ, ಈ ಎರಡೂ ಸಮುದಾಯಗಳ ಬೆಂಬಲವನ್ನು ಪಕ್ಷಕ್ಕೆ ತರುವ ಭರವಸ ಮೂಡಿಸಿದ್ದಾರೆ.
ಇನ್ನೊಂದೆಡೆ, ಪಶ್ಚಿಮ ಉತ್ತರ ಪ್ರದೇಶದ ಪ್ರಭಾವಿ ಮುಸ್ಲಿಂ ನಾಯಕ, ಸಹಾರನ್‌ಪುರದ ಸಂಸದ ಇಮ್ರಾನ್ ಮಸೂದ್ ಅವರನ್ನು ಕಾರ್ಯಾಧ್ಯಕ್ಷರನ್ನಾಗಿ ನೇಮಿಸಿರುವುದು ಮುಸ್ಲಿಂ ಮತದಾರರನ್ನು ಸೆಳೆಯುವ ಕಾಂಗ್ರೆಸ್‌ನ ಪ್ರಮುಖ ಹೆಜ್ಜೆಯಾಗಿದೆ. 2014ರ ಲೋಕಸಭಾ ಚುನಾವಣೆಯ ಪ್ರಚಾರದ ವೇಳೆ ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ನೀಡಿದ್ದ ವಿವಾದಾತ್ಮಕ ಹೇಳಿಕೆಯಿಂದ ರಾಷ್ಟ್ರಮಟ್ಟದ ಗಮನ ಸೆಳೆದಿದ್ದ ಇಮ್ರಾನ್ ಮಸೂದ್, ನಂತರದ ದಿನಗಳಲ್ಲಿ ಸಮಾಜವಾದಿ ಪಕ್ಷ ಸೇರಿದ್ದರು. ಆಬಳಿಕ, ಮತ್ತೆ ಕಾಂಗ್ರೆಸ್ಗೆ ಮರಳಿದ್ದರು. 2024ರ ಲೋಕಸಭಾ ಚುನಾವಣೆಯಲ್ಲಿ ಸಹಾರನ್‌ಪುರ ಕ್ಷೇತ್ರದಲ್ಲಿ ಭಾರೀ ಗೆಲುವು ಸಾಧಿಸಿದ್ದರು. ಪಶ್ಚಿಮ ಉತ್ತರ ಪ್ರದೇಶದ ಮುಸ್ಲಿಂ ಸಮುದಾಯದಲ್ಲಿ ಹೆಚ್ಚು ಪ್ರಭಾವ ಹೊಂದಿರುವ ಮಸೂದ್ ಅವರ ನೇಮಕವು ಕಾಂಗ್ರೆಸ್ಗೆ ಹೊಸ ಶಕ್ತಿ ತುಂಬುವ ನಿರೀಕ್ಷೆಯಿದೆ.
ಕಾಂಗ್ರೆಸ್‌ನ ಈ ಹೊಸ ಸಂಘಟನಾ ಮಾದರಿಯು ‘ಇಂಡಿಯಾ’ ಮೈತ್ರಿಕೂಟದ ಮಿತ್ರಪಕ್ಷ ಸಮಾಜವಾದಿ ಪಕ್ಷದ ‘ಪಿಡಿಎ’ (ಪಿಛ್ಡಾ [ಹಿಂದುಳಿದ], ದಲಿತ, ಅಲ್ಪಸಂಖ್ಯಾತ) ರಾಜಕೀಯ ಸೂತ್ರಕ್ಕೂ ಹೊಂದಿಕೊಳ್ಳುವಂತಿದೆ. ಬ್ರಾಹ್ಮಣ ಸಮುದಾಯದ ಆರಾಧನಾ ಮಿಶ್ರಾ ಅಧ್ಯಕ್ಷರಾದರೆ, ಮುಸ್ಲಿಂ ಸಮುದಾಯದ ಇಮ್ರಾನ್ ಮಸೂದ್ ಕಾರ್ಯಾಧ್ಯಕ್ಷರಾಗಿದ್ದಾರೆ. ಇದರ ಜೊತೆಗೆ ಒಬಿಸಿ (ನಿಷಾದ್) ಸಮುದಾಯದ ದೇವೇಂದ್ರ ನಿಷಾದ್ ಮತ್ತು ದಲಿತ ಸಮುದಾಯದ ಆಲೋಕ್ ಪ್ರಸಾದ್ ಅವರನ್ನು ಉಪಾಧ್ಯಕ್ಷರನ್ನಾಗಿ ನೇಮಿಸುವ ಮೂಲಕ ಕಾಂಗ್ರೆಸ್ ಸರ್ವ ಸಮುದಾಯದ ಸಮತೋಲನ ಕಾಯ್ದುಕೊಂಡಿದೆ.
ಈ ಹೊಸ ನಾಯಕತ್ವವು ಉತ್ತರ ಪ್ರದೇಶದ ರಾಜಕೀಯದಲ್ಲಿ ಎರಡೆರಡು ಪ್ರಮುಖ ಸವಾಲುಗಳನ್ನು ಎದುರಿಸಬೇಕಾಗಿದೆ. ಒಂದೆಡೆ, ಬಿಜೆಪಿ ವಿರುದ್ಧ ಕಾಂಗ್ರೆಸ್‌ಅನ್ನು ಪ್ರಬಲ ರಾಜಕೀಯ ಪರ್ಯಾಯವಾಗಿ ರೂಪುಗೊಳಿಸಬೇಕು ಮತ್ತು ಇನ್ನೊಂದೆಡೆ, 2027ರ ವಿಧಾನಸಭಾ ಚುನಾವಣೆಯ ಸೀಟು ಹಂಚಿಕೆ ವಿಚಾರದಲ್ಲಿ ಸಮಾಜವಾದಿ ಪಕ್ಷದೊಂದಿಗೆ ಸೌಹಾರ್ದ ಮಾತುಕತೆಗಳನ್ನು ನಡೆಸಬೇಕಿದೆ.
ಆದಾಗ್ಯೂ, ಇಮ್ರಾನ್ ಮಸೂದ್ ಅವರು ಇತ್ತೀಚೆಗೆ ಸಮಾಜವಾದಿ ಪಕ್ಷದ ಕೆಲವು ನಿಲುವುಗಳನ್ನು ಬಹಿರಂಗವಾಗಿ ವಿಮರ್ಶಿಸುತ್ತಿದ್ದರೆ, ಆರಾಧನಾ ಮಿಶ್ರಾ ಮತ್ತು ಅವರ ತಂದೆ ಪ್ರಮೋದ್ ತಿವಾರಿ ಸಮಾಜವಾದಿ ಪಕ್ಷದ ವರಿಷ್ಠರೊಂದಿಗೆ ಉತ್ತಮ ವೈಯಕ್ತಿಕ ಬಾಂಧವ್ಯ ಹೊಂದಿದ್ದಾರೆ. ಈ ಹೊಸ ಜೋಡಿಯು ರಾಜ್ಯದಲ್ಲಿ ಕಾಂಗ್ರೆಸ್‌ನ ನೆಲೆಯನ್ನು ತಳಮಟ್ಟದಲ್ಲಿ ವಿಸ್ತರಿಸುವುದರ ಜೊತೆಗೆ ಮೈತ್ರಿಕೂಟದ ಒಳಗಿನ ರಾಜಕೀಯ ತಂತ್ರಗಾರಿಕೆಯನ್ನು ನಿಭಾಯಿಸುವ ಗುರುತರ ಜವಾಬ್ದಾರಿಯನ್ನು ಹೊರಬೇಕಿದೆ.
