ದೆಹಲಿಯಲ್ಲಿ ಸಿಜೆಪಿ ಪ್ರತಿಭಟನೆಯನ್ನು ಹತ್ತಿಕ್ಕಲು ದೆಹಲಿ ಪೊಲೀಸರು ಮೊಳೆಗಳು, ಬ್ಯಾರಿಕೇಡ್‌ಗಳು ಹಾಗೂ ಕಬ್ಬಿಣದ ಸರಳುಗಳಿಂದ ಭದ್ರಕೋಟೆಯನ್ನೇ ರಚಿಸಿದ್ದಾರೆ. ಸಿಜೆಪಿಯ ಪ್ರಮುಖ ನಾಯಕರು ಸೇರಿದಂತೆ ಪ್ರತಿಭಟನಾಕಾರರನ್ನು ಮಾರ್ಗಮಧ್ಯೆಯೇ ಬಂಧಿಸುತ್ತಿದ್ದಾರೆ. ಇದೀಗ, ಪ್ರತಿಭಟನೆಯನ್ನು ಸುದ್ದಿ ಮಾಡಲು ಜಂತರ್ ಮಂತರ್‌ಗೆ ತರಳಿರುವ ಮಾಧ್ಯಮ ಸಿಬ್ಬಂದಿಗಳನ್ನೂ ಪೊಲೀಸರು ಮಾನವ ಸರಪಳಿಯನ್ನು ನಿರ್ಮಿಸಿಕೊಂಡು ತಡೆಯುತ್ತಿದ್ದಾರೆ. ವರದಿ ಮಾಡಲು ಅವಕಾಶ ಕೊಡದೆ, ಹಿಮ್ಮೆಟ್ಟುವ ಕೃತ್ಯ ಎಸಗುತ್ತಿದ್ದಾರೆ.
ವರದಿಗಳ ಪ್ರಕಾರ, ಸ್ಥಳದಲ್ಲಿ ಪೊಲೀಸರು ಮತ್ತು ಕೇಂದ್ರೀಯ ಸಶಸ್ತ್ರ ಪೋಲಿಸ್ ಪಡೆ (CAPF) ಸಿಬ್ಬಂದಿ ಸಾಲಾಗಿ ನಿಂತು ಬ್ಯಾರಿಕೇಡ್‌ಗಳ ಮುಂದೆ ಮಾನವ ಸರಪಳಿ ರಚಿಸಿದ್ದು, ಮಾಧ್ಯಮದವರು ಘಟನಾ ಸ್ಥಳಕ್ಕೆ ಹತ್ತಿರ ಹೋಗದಂತೆ ತಡೆಯುತ್ತಿದ್ದಾರೆ.
ತಮ್ಮ ಧೋರಣೆಯನ್ನು ಸಮರ್ಥಿಸಿಕೊಂಡಿರುವ ಪೊಲೀಸರು, ಪ್ರತಿಭಟನಾ ಸ್ಥಳಗಳಲ್ಲಿ ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡುವುದು ತಮ್ಮ ಮೊದಲ ಆದ್ಯತೆಯಾಗಿದೆ. ಪ್ರತಿಭಟನಾಕಾರರೊಂದಿಗೆ ಮಾಧ್ಯಮದವರು ಬೆರೆತು ಗೊಂದಲ ಅಥವಾ ಕಾಲ್ತುಳಿತ ಉಂಟಾಗದಂತೆ ತಡೆಯಲು ಮತ್ತು ಅನಧಿಕೃತವಾಗಿ ಲೈವ್‌ಸ್ಟ್ರೀಮಿಂಗ್ ಅಥವಾ ವೀಡಿಯೋ ಚಿತ್ರೀಕರಣ ಮಾಡುವವರನ್ನು ಗುರುತಿಸಿ ನಿಯಂತ್ರಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಹೇಳಿಕೊಂಡಿದ್ದಾರೆ.
ಸದ್ಯಕ್ಕೆ ಕನ್ನಾಟ್ ಪ್ಲೇಸ್ ಮತ್ತು ಜಂತರ್ ಮಂತರ್ ಪ್ರದೇಶದಾದ್ಯಂತ ಪೋಲಿಸ್ ಭದ್ರಕೋಟೆ ರಚಿಸಿಕೊಂಡಿದ್ದಾರೆ. ಮೆಟ್ರೋ ಮತ್ತು ಸಂಚಾರ ಮಾರ್ಗಗಳಲ್ಲಿ ನಿರ್ಬಂಧಗಳನ್ನು ಹೇರಲಾಗಿದೆ.
