ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಇಂದು ಬುಡಕಟ್ಟು ಕವಿ ಡಾ.ಜಿತೇಂದ್ರ ವಾಸವ್ ಅವರ (ಇಂಗ್ಲಿಷ್‌ ಕವಿತೆ) ʼನಾನು ಈ ಭೂಮಿಯ ಭ್ರೂಣʼ ಕವಿತೆಯನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಹೆಚ್‌ ಭಾಗ್ಯ.
ನಾನು ಈ ಭೂಮಿಯ ಮೂಲ ಧಾತು,ಭ್ರೂಣ
ನಾನೇ ಸೂರ್ಯ, ಸ್ಪರ್ಶ, ಬಿಸುಪು, ಶಾಶ್ವತತೆ.
ನಾನು , ಭಿಲ್, ಮುಂಡಾ, ಬೋಡೋ, ಸಂತಾಲ್ ಕೂಡಾ.
ನಾನು ಸಹಸ್ರಾರು ವರ್ಷಗಳ ಹಿಂದೆ ಜನಿಸಿದ ಮನುಷ್ಯ
ನೀನು ನನ್ನನ್ನು ಉಜ್ಜೀವಿಸುವೆ,
ಸಂಪೂರ್ಣವಾಗಿ.
ನಾನೇ ಈ ಬುವಿಯ ಮೇಲಣ ಸ್ವರ್ಗ
ನಾನು ಈ ಭೂಮಿಯ ಮೂಲ ಧಾತು, ಭ್ರೂಣ.
ನಾನೇ ಸೂರ್ಯ, ಸ್ಪರ್ಶ, ಬಿಸುಪು, ಶಾಶ್ವತತೆ.
ನಾನು ಸಹ್ಯಾದ್ರಿ, ಸಾತ್ಪುರ, ವಿಂಧ್ಯ, ಅರಾವಲಿ
ನಾನು ಹಿಮಾಲಯದ ಶೃಂಗ
ದಕ್ಷಿಣದ ಸಾಗರದ ಕೊನೆ
ಈಶಾನ್ಯ ಹಸಿರು ವನಸಿರಿಯು ನಾನೇ
ನೀನು ಮರ ಕಡಿದಾಗ, ಬೆಟ್ಟ ಗುಡ್ಡಗಳ ಅಡವಿಟ್ಟಾಗ
ನನ್ನನ್ನು ಹರಾಜು ಹಾಕುವೆ
ನದಿಯನು ಕೊಂದಾಗ ನಾನು ಸಾಯುವೆ
ನಿನ್ನ ಉಸಿರಿನ ಉಸಿರಾಗಿರುವೆ
ನಾನು ಜೀವಾಮೃತ
ನಾನು ಈ ಭೂಮಿಯ ಮೂಲ ಧಾತು, ಭ್ರೂಣ
ನಾನೇ ಸೂರ್ಯ, ಸ್ಪರ್ಶ, ಬಿಸುಪು, ಶಾಶ್ವತತೆ.
ಎಷ್ಟೇ ಆಗಲಿ ನೀನು ನನ್ನ ಸಂತತಿ,
ನನ್ನ ರಕ್ತ.
ಹಪಾಹಪಿ, ಅಧಿಕಾರ ಲಾಲಸೆ ಕವಿದು
ನಿನಗೆ ನಿಜದ ಜಗತ್ತನ್ನು ಮರೆಮಾಚಿದೆ.
ನೀನು ಭೂಮಿಯನು ಭೂಮಿ ಎನುವೆ
ನಾವಿವಳನು ತಾಯಿ ಎನುವೆವು
ನೀನು ನದಿಯನು ನದಿ ಎನುವೆ
ನಮಗಿವಳು ಸೋದರಿ
ಬೆಟ್ಟಗಳು ನಿನಗೆ ಬೆಟ್ಟಗಳು ಮಾತ್ರ
ಅವು ನಮ್ಮನು ಸೋದರ ಎನುವುವು.
ಸೂರ್ಯ ನಮ್ಮ ಅಜ್ಜ
ಚಂದ್ರ ನಮ್ಮ ಸೋದರ ಮಾವ.
ಈ ಸಂಬಂಧಗಳಿಗಾಗಿ
ನಮ್ಮ ನಿನ್ನ ನಡುವೆ ಒಂದು ಗೆರೆ ಎಳೆಯಲು ಅವರು ಹೇಳುವರು.
ಆದರದನು ಕೇಳಲು ನಾನು ಸಿದ್ಧನಿಲ್ಲ
ನನಗೆ ನಂಬಿಕೆ:
ನೀನು ನಿನ್ನಷ್ಟಕ್ಕೆ ಕರಗಿ ಹೋಗುವೆ ಎಂದು
ನಾನು ಹಿಮವನ್ನು ಕರಗಿಸುವ ಶಾಖ
ನಾನು ಈ ಭೂಮಿಯ ಮೂಲ ಧಾತು, ಭ್ರೂಣ
ನಾನೇ ಸೂರ್ಯ, ಸ್ಪರ್ಶ, ಬಿಸುಪು ಶಾಶ್ವತತೆ
