ದೇಶಾದ್ಯಂತ ವೈದ್ಯಕೀಯ ಪ್ರವೇಶ ಪರೀಕ್ಷೆಯ ರದ್ದತಿಗೆ ಕಾರಣವಾದ ನೀಟ್-ಯುಜಿ ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣದಲ್ಲಿ ತನಿಖೆ ನಡೆಸುತ್ತಿರುವ ಸಿಬಿಐ, ಹಲವರನ್ನು ಬಂಧಿಸಿದೆ. ಹೆಚ್ಚಿನ ಬಂಧನಗಳು ಮಹಾರಾಷ್ಟ್ರದಲ್ಲಿ ನಡೆದಿವೆ. ಬಂಧಿತರಲ್ಲಿ ‘ಮನಿಷಾ’ ಎಂಬ ಒಂದೇ ಹೆಸರನ್ನು ಹೊಂದಿರುವ ಮೂವರು ಮಹಿಳೆಯರಿದ್ದಾರೆ. ನೀಟ್ ಹಗರಣದಲ್ಲಿ ಈ ಮೂವರ ಪಾತ್ರ ಪ್ರಮುಖವಾಗಿದೆ ಎಂದು ಆರೋಪಿಸಲಾಗಿದೆ.
ಈ ಮೂವರಲ್ಲಿ ಮೊದಲನೆಯವರು, 46 ವರ್ಷದ ಬ್ಯೂಟಿಷಿಯನ್ ಮನಿಷಾ ವಾಗ್ಮರೆ. ಇವರನ್ನು ಮೇ 14 ರಂದು ಬಂಧಿಸಲಾಯಿತು. ಈಕೆ ವಿದ್ಯಾರ್ಥಿಗಳನ್ನು ಮತ್ತೊಬ್ಬ ಆರೋಪಿ ಮನಿಷಾ ಮಾಂಧರೆ ಜೊತೆ ಸಂಪರ್ಕಿಸುತ್ತಿದ್ದರು ಎಂದು ಸಿಬಿಐ ತಿಳಿಸಿದೆ. ಈ ಮನಿಷಾ ಮಾಂಧರೆ ಅವರು ಪುಣೆಯ ಮಾಡರ್ನ್ ಜೂನಿಯರ್ ಕಾಲೇಜ್ ಆಫ್ ಸೈನ್ಸ್, ಆರ್ಟ್ಸ್ ಅಂಡ್ ಕಾಮರ್ಸ್‌ನಲ್ಲಿ ಹಿರಿಯ ಜೀವಶಾಸ್ತ್ರ (ಬಯಾಲಜಿ) ಶಿಕ್ಷಕಿಯಾಗಿದ್ದರು. ಈಕೆಯನ್ನು ನೀಟ್ ಪರೀಕ್ಷೆ ನಡೆಸುವ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯು (NTA) ವಿಷಯ ತಜ್ಞೆ ಎಂದು ಹೆಸರಿಸಿತ್ತು.
ಮನಿಷಾ ವಾಗ್ಮರೆ ಮತ್ತು ಮನಿಷಾ ಮಾಂಧರೆ – ಇಬ್ಬರೂ ಪುಣೆಯ ಒಂದೇ ಹೌಸಿಂಗ್ ಸೊಸೈಟಿಯಲ್ಲಿ ವಾಸಿಸುತ್ತಿದ್ದರು. ಮನಿಷಾ ವಾಗ್ಮರೆ ಅವರು ಮತ್ತೊಬ್ಬ ಆರೋಪಿ ಧನಂಜಯ್ ಲೋಖಂಡೆ ಎಂಬಾತನಿಗೆ ಪ್ರಶ್ನೆ ಪತ್ರಿಕೆಯನ್ನು ಪೂರೈಸಿದ್ದರು ಎಂಬ ಆರೋಪವಿದೆ.
ಪ್ರಕರಣದಲ್ಲಿ ಬಂಧಿತರಾಗಿರುವ ಮೂರನೇ ‘ಮನಿಷಾ’ ಎಂದರೆ ಪುಣೆಯ ಬುಧವಾರ್ ಪೇಟೆಯಲ್ಲಿರುವ ಶೇಠ್ ಹೀರಾಲಾಲ್ ಸರಾಫ್ ಶಾಲೆಯ ಪ್ರಾಂಶುಪಾಲೆ ಮನಿಷಾ ಹವಾಲ್ದಾರ್. 1992ರಲ್ಲಿ ಭೌತಶಾಸ್ತ್ರ ಶಿಕ್ಷಕಿಯಾಗಿ ಶಾಲೆಗೆ ಸೇರಿದ ಇವರನ್ನು ಎನ್‌ಟಿಎ ಸಂಸ್ಥೆಯು ಮನಿಷಾ ಹವಾಲ್ದಾರ್ ಅವರನ್ನು ವಿಷಯ ತಜ್ಞೆಯಾಗಿ ನೇಮಿಸಿತ್ತು ಮತ್ತು ಈಕೆಗೆ ನೀಟ್ ಭೌತಶಾಸ್ತ್ರದ ಪ್ರಶ್ನೆ ಪತ್ರಿಕೆಗಳನ್ನು ನೋಡುವ ಅವಕಾಶವಿತ್ತು. ಇನ್ನೆರಡು ತಿಂಗಳಿಗಿಂತ ಕಡಿಮೆ ಅವಧಿಯಲ್ಲಿ ನಿವೃತ್ತರಾಗಬೇಕಿತ್ತು. ಸಿಬಿಐ ಇವರನ್ನು ಮೇ 22 ರಂದು ಬಂಧಿಸಿತು. ಈಕೆ ಭೌತಶಾಸ್ತ್ರ ಪತ್ರಿಕೆಯ ಪ್ರಶ್ನೆಗಳನ್ನು ಸೋರಿಕೆ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಈ ಲೇಖನ ಓದಿದ್ದೀರಾ?: ಕನ್ನಡಿಗರೇ ಗಮನಿಸಿ: ನಿಮ್ಮ ಗ್ಯಾರಂಟಿ ಯೋಜನೆ, ಸರ್ಕಾರಿ ಸೌಲಭ್ಯಗಳನ್ನೂ ಕಸಿದುಕೊಳ್ಳುತ್ತದೆ ‘ಎಸ್‌ಐಆರ್’
ಮೇ 3 ರಂದು 22 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಬರೆದಿದ್ದ ನೀಟ್-ಯುಜಿ ಪರೀಕ್ಷೆಯನ್ನು ಎನ್‌ಟಿಎ ಸಂಸ್ಥೆಯು ಮೇ 12 ರಂದು ರದ್ದುಗೊಳಿಸಿತು. ಪರೀಕ್ಷೆಗೆ ಮುಂಚಿತವಾಗಿ ಹರಿದಾಡುತ್ತಿದ್ದ ‘ಗೆಸ್ ಪೇಪರ್ಸ್’ ಮತ್ತು ಅಸಲಿ ಪ್ರಶ್ನೆ ಪತ್ರಿಕೆಯ ನಡುವೆ ಸಾಮ್ಯತೆ ಇರುವುದನ್ನು ಸಂಸ್ಥೆಯು ಖಚಿತಪಡಿಸಿತ್ತು. ಈ ರದ್ದತಿಯು ದೇಶಾದ್ಯಂತ ತೀವ್ರ ಆಕ್ರೋಶವನ್ನು ಹುಟ್ಟುಹಾಕಿತ್ತು. ವಿದ್ಯಾರ್ಥಿಗಳು ತಮ್ಮ ಕಠಿಣ ಪರಿಶ್ರಮವೆಲ್ಲಾ ವ್ಯರ್ಥವಾಯಿತು ಎಂದು ಅಳಲು ತೋಡಿಕೊಂಡಿದ್ದರು. ತದನಂತರ ಇದರ ತನಿಖೆಯನ್ನು ಸಿಬಿಐಗೆ ವಹಿಸಲಾಯಿತು. ಸಿಬಿಐ ಇದುವರೆಗೆ 10 ಆರೋಪಿಗಳನ್ನು ಬಂಧಿಸಿದ್ದು, ಅವರಲ್ಲಿ ಹೆಚ್ಚಿನವರು ಮಹಾರಾಷ್ಟ್ರದವರಾಗಿದ್ದಾರೆ.
