ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಇಂದು ಅಲಿ ಸರ್ದಾರ್ ಜಾಫ಼್ರಿ ಅವರ ಉರ್ದು ಕವನದ ಇಂಗ್ಲಿಷ್ ಅನುವಾದವನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಎಚ್‌ ಭಾಗ್ಯ
ಓದದ ಪುಟ
ನಾನೊಂದು ಪುಟ
ಇದರ ಮೇಲೆ ಬರೆದವರು ಯಾರು?
ಇದನ್ನೋದಿದವರು ಯಾರು?
ಒಂದೊಂದು ಮರವೂ ಲೇಖನಿಯೇ
ಒಂದೊಂದು ರೆಂಬೆಯೂ ಲೇಖನಿಯೇ
ಸಮುದ್ರವು ಶಾಯಿ ಕುಡಿಕೆ.
ಅಸಂಖ್ಯ ನದಿಗಳು ಲೀನವಾದ ಬೆಳಕೇ ಶಾಯಿ
ತಂಗಾಳಿಯ ಕೈಗಳು
ಆಕಾಶದ ನೀಲಿಯಿಂದ ಬರೆಯುವುದು.
ನಕ್ಷತ್ರಗಳ ಬೆಳಕು ಬರೆಯುವುದು;
ನೆಲದ ನರ್ತನವು ಬರೆಯುವುದು;
ದಿಗಂತದಿಂದ ಮೇಲೇಳುವ ತಿಳಿಗೆಂಪು ಸೂರ್ಯ
ತನ್ನ ಬಂಗಾರದ ಕಿರಣಗಳಿಂದ ಬರೆಯುವನು;
ಗತಿಸಿದ ಕ್ಷಣಗಳು ತನ್ನ
ಅಲಗಿನಿಂದ ಬರೆಯುವುವು;
ಇತಿಹಾಸವು ತನ್ನ
ಭರ್ಜಿಯಿಂದ ಬರೆಯುವುದು;
ನನ್ನೆಲ್ಲಾ ಮಿತ್ರರು ಬರೆಯುವರು;
ನನ್ನೆಲ್ಲಾ ಶತ್ರುಗಳು ಬರೆಯುವರು;
ನನ್ನ ವೈರಿಗಳ ಒರೆಯೊಳಗೆ ರಕ್ತದ ಕತ್ತಿಯಿದೆ;
ರಾಜಕೀಯದ ದುಷ್ಟ ಅಲಗು ಬರೆಯುವುದು.
ನನ್ನ ಗಾಯಗಳ ಹೂಗಳ ಸುಗಂಧವೀಗ ಅಕ್ಷರಗಳು
ನನ್ನ ಪ್ರೀತಿ ಪಾತ್ರರ ಮುಗುಳು ನಗೆಯೂ ಸಹ
ಮಚ್ಚರದ ಮುಳ್ಳಿನ ಮೊನೆಯು
ಲೇಖನಿಯ ನಾಲಗೆ.
ಆದರೆ ನನ್ನ ಹೃದಯ,ನನ್ನ ಹುಚ್ಚುತನ ಕೂಡಾ ಬರೆಯುವುದು.
ನಾನೊಂದು ಪುಟ:
ಅಪೂರ್ಣತೆಯ ಭಾವದಾಚೆಗೂ
ನಾನೊಂದು ಸಂಪೂರ್ಣ ಕೃತಿ
ನೀನು ಓದಬಲ್ಲೆಯಾದರೆ
ದಯವಿಟ್ಟು ಹೇಳು
ಈ ಕೃತಿಯಲ್ಲೇನಿದೆ ಎಂದು
