ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಅವರಂತಹ ದಿಗ್ಗಜರ ಬಳಿಕ ಭಾರತ ಟೆಸ್ಟ್ ತಂಡದಲ್ಲಿ ಅವರ ಸ್ಥಾನವನ್ನು ಯಾರು ತುಂಬಲಿದ್ದಾರೆ ಎಂಬ ಪ್ರಶ್ನೆಗೆ ಉತ್ತರವಾಗಿ 21 ವರ್ಷದ ಆಂಧ್ರದ ಯುವ ಬ್ಯಾಟರ್ ಶೇಖ್ ರಶೀದ್ ರೂಪುಗೊಳ್ಳುತ್ತಿದ್ದಾರೆ. ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿಯಲು ಸಜ್ಜಾಗುತ್ತಿರುವ ಈ ಭರವಸೆಯ ಆಟಗಾರನ ಮೇಲೆ ಆಯ್ಕೆಗಾರರು ತೀವ್ರ ನಿಗಾ ಇರಿಸಿದ್ದಾರೆ.
ಬೆಂಗಳೂರಿನ ಬಿಸಿಸಿಐ ಉತ್ಕೃಷ್ಟತಾ ಕೇಂದ್ರದಲ್ಲಿ (CoE) ನೆಟ್ ಅಭ್ಯಾಸ ನಡೆಸುತ್ತಿದ್ದಾಗ ಶೇಖ್ ರಶೀದ್ ಅವರ ಪಕ್ಕೆಲುಬಿಗೆ ಚೆಂಡು ಬಲವಾಗಿ ಬಡಿಯಿತು. ನೋವಿನಿಂದಾಗಿ ಕಳೆಗುಂದಿದ ಅವರು, ಸ್ವಲ್ಪ ಹೊತ್ತು ವಿಶ್ರಾಂತಿ ಪಡೆದು ಐಸ್ ಪ್ಯಾಕ್ ಇಟ್ಟುಕೊಂಡರು. ಆದರೆ ಛಲ ಬಿಡದ ಅವರು, ಮರಳಿ ನೆಟ್ಸ್‌ಗೆ ಬಂದು ತಮಗೆ ಪೆಟ್ಟು ನೀಡಿದ್ದ ಅದೇ ರೀತಿಯ ಎಸೆತವನ್ನು ಹಾಕುವಂತೆ ಥ್ರೋಡೌನ್ ಸ್ಪೆಷಲಿಸ್ಟ್‌ಗೆ ಕೇಳಿದರು. ಮುಂದಿನ 30 ನಿಮಿಷಗಳ ಕಾಲ ಅದೇ ಎಸೆತಗಳನ್ನು ಎದುರಿಸಿ ಅತ್ಯುತ್ತಮ ಬ್ಯಾಕ್-ಫುಟ್ ಕವರ್ ಡ್ರೈವ್‌ಗಳನ್ನು ಅಭ್ಯಾಸ ಮಾಡಿದರು.
ರಶೀದ್ ಇಂಗ್ಲೆಂಡ್‌ನ ದಿಗ್ಗಜ ಬ್ಯಾಟರ್ ಜೋ ರೂಟ್ ಅವರ ದೊಡ್ಡ ಅಭಿಮಾನಿ. ರೂಟ್ ಅವರ ವಿಡಿಯೊಗಳನ್ನು ನಿರಂತರವಾಗಿ ವೀಕ್ಷಿಸುವ ರಶೀದ್, ರೂಟ್ ಧರಿಸುವ ’66’ ಸಂಖ್ಯೆಯ ಟಿ-ಶರ್ಟ್ ಅನ್ನು ತಾವೂ ಧರಿಸುತ್ತಾರೆ. “ನಾನು ರೂಟ್ ಅವರ ಸಾಕಷ್ಟು ವಿಡಿಯೊಗಳನ್ನು ನೋಡುತ್ತೇನೆ. ಅವರ ಬ್ಯಾಕ್-ಫುಟ್ ಪಂಚ್ ಕವರ್ ಡ್ರೈವ್ ಎಂದರೆ ನನಗೆ ಅಚ್ಚುಮೆಚ್ಚು. ಅವರ ಬ್ಯಾಟಿಂಗ್‌ನಿಂದ ನಾನು ಬಹಳಷ್ಟು ಕಲಿಯುತ್ತೇನೆ. ವಿವಿಧ ಪರಿಸ್ಥಿತಿಗಳಲ್ಲಿ ಅವರು ಇನಿಂಗ್ಸ್ ಕಟ್ಟುವ ರೀತಿಯನ್ನು ಅವರಿಂದ ಕಲಿಯಲು ಬಯಸುತ್ತೇನೆ” ಎಂದು ರಶೀದ್ ‘ದಿ ಇಂಡಿಯನ್ ಎಕ್ಸ್‌ಪ್ರೆಸ್’ಗೆ ತಿಳಿಸಿದ್ದಾರೆ.
ಭಾನುವಾರ ಬೆಂಗಳೂರಿನ ಬಿಸಿಸಿಐ ಉತ್ಕೃಷ್ಟತಾ ಕೇಂದ್ರದಲ್ಲಿ ನಡೆಯಲಿರುವ ದುಲೀಪ್ ಟ್ರೋಫಿ ಸೆಮಿಫೈನಲ್ ಪಂದ್ಯದಲ್ಲಿ ದಕ್ಷಿಣ ವಲಯವು ಉತ್ತರ ವಲಯವನ್ನು ಎದುರಿಸಲಿದೆ. ಹೊಸ ಋತುವಿನ ಆರಂಭದಲ್ಲಿರುವ ರಶೀದ್‌ಗೆ ಇದೊಂದು ಮಹತ್ವದ ಪಂದ್ಯವಾಗಿದೆ. ದೇವದತ್ ಪಡಿಕ್ಕಲ್ ಸದ್ಯಕ್ಕೆ 3ನೇ ಕ್ರಮಾಂಕವನ್ನು ಭದ್ರಪಡಿಸಿಕೊಂಡಿದ್ದರೂ, ಭವಿಷ್ಯದ ಟೆಸ್ಟ್ ತಂಡಕ್ಕೆ ಸಜ್ಜಾಗುತ್ತಿರುವ ಆಟಗಾರರ ಪಟ್ಟಿಯಲ್ಲಿ ರಶೀದ್ ಕೂಡ ಇದ್ದಾರೆ. ಅವರ ಬಾಲ್ಯದ ಕೋಚ್ ಎನ್.ಎಸ್. ಗಣೇಶ್ ಅವರು ಕಳೆದ ಏಳು ವರ್ಷಗಳಿಂದ ರಶೀದ್‌ಗೆ ಒಂದೇ ಮಾತನ್ನು ಹೇಳುತ್ತಿದ್ದಾರೆ: “ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ನಂತರ, ದೀರ್ಘಾವಧಿಯಲ್ಲಿ ಅವರ ಸ್ಥಾನವನ್ನು ನೀನೇ ತುಂಬಬೇಕು.”
2022ರ ಅಂಡರ್-19 ವಿಶ್ವಕಪ್ ಗೆದ್ದ ಭಾರತ ತಂಡದ ಭಾಗವಾಗಿದ್ದ ರಶೀದ್, ಕಳೆದ ರಣಜಿ ಋತುವಿನಲ್ಲಿ ಆಂಧ್ರ ಪರ ಅದ್ಭುತ ಪ್ರದರ್ಶನ ನೀಡಿದರು. ಆಡಿದ 8 ಪಂದ್ಯಗಳಲ್ಲಿ 89.57ರ ಸರಾಸರಿಯಲ್ಲಿ 627 ರನ್ ಕಲೆಹಾಕಿದರು. ಇದರಲ್ಲಿ ಮೂರು ಶತಕ ಮತ್ತು ಎರಡು ಅರ್ಧಶತಕಗಳು ಸೇರಿವೆ. ಈ ಅಮೋಘ ಪ್ರದರ್ಶನದ ನೆರವಿನಿಂದ ಅವರು ಇತ್ತೀಚೆಗೆ ಶ್ರೀಲಂಕಾ ಪ್ರವಾಸ ಕೈಗೊಂಡಿದ್ದ ‘ಭಾರತ ಎ’ ತಂಡದಲ್ಲಿ ಸ್ಥಾನ ಪಡೆದಿದ್ದರು.
ಶ್ರೀಲಂಕಾ ‘ಎ’ ವಿರುದ್ಧದ ಪಂದ್ಯಗಳಲ್ಲಿ ಅವರು ಕ್ರಮವಾಗಿ 63, 20 ಮತ್ತು 45 ರನ್ ಗಳಿಸಿದ್ದರು. ಆದರೆ ಕೇವಲ ಈ ಅಂಕಿ-ಅಂಶಗಳು ಮಾತ್ರ ಸಾಲದು ಎಂಬ ಅರಿವು ಅವರಿಗಿದೆ. “ಭಾರತದಲ್ಲಿ ಅವಕಾಶ ಪಡೆಯುವುದು ಸುಲಭವಲ್ಲ. ಅವಕಾಶ ಸಿಕ್ಕಾಗ ಅದನ್ನು ಜವಾಬ್ದಾರಿಯಿಂದ ಬಳಸಿಕೊಳ್ಳಬೇಕು. ಟೆಸ್ಟ್ ಕ್ಯಾಪ್ ಪಡೆಯುವುದು ನನ್ನ ಗುರಿ. ಆದರೆ ನಾನು ಹತಾಶನಾಗುವುದಿಲ್ಲ. ಅಂಡರ್-19 ನಿಂದ ರಣಜಿಗೆ, ಇದೀಗ ಭಾರತ ‘ಎ’ ತಂಡಕ್ಕೆ ಬಂದಿದ್ದೇನೆ. ಮುಂದಿನ ಹಂತಕ್ಕೆ ಹೋಗಲು ನಾನು ಬ್ಯಾಟರ್ ಆಗಿ ಇನ್ನಷ್ಟು ವಿಕಸನಗೊಳ್ಳಬೇಕು” ಎನ್ನುತ್ತಾರೆ ರಶೀದ್.
