ಪಾಕಿಸ್ತಾನ ತಂಡದ ನಾಯಕಿ ಫಾತಿಮಾ ಸನಾ ಮಹಿಳಾ ಟಿ20 ವಿಶ್ವಕಪ್ ಇತಿಹಾಸದಲ್ಲೇ ಅತ್ಯಂತ ಗಮನಾರ್ಹ ಆಲ್-ರೌಂಡರ್ ಪ್ರದರ್ಶನ ನೀಡುವ ಮೂಲಕ ದಾಖಲೆ ಪುಟ ಸೇರಿದ್ದಾರೆ. ಒಂದೇ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿ ಹಾಗೂ ಮೂರು ವಿಕೆಟ್ ಕಬಳಿಸಿದ ಟೂರ್ನಿಯ ‘ಮೊದಲ ನಾಯಕಿ’ ಎಂಬ ವಿಶಿಷ್ಟ ಸಾಧನೆಗೆ ಅವರು ಭಾಜನರಾಗಿದ್ದಾರೆ. ಬರ್ಮಿಂಗ್‌ಹ್ಯಾಮ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ರೋಚಕ ಪಂದ್ಯದಲ್ಲಿ ಫಾತಿಮಾ ಅವರ ಈ ವೀರೋಚಿತ ಹೋರಾಟದ ನಡುವೆಯೂ, ಪಾಕಿಸ್ತಾನ ತಂಡ ಎರಡು ವಿಕೆಟ್‌ಗಳ ಅಂತರದ ವೀರೋಚಿತ ಸೋಲು ಕಂಡು ತೀವ್ರ ನಿರಾಸೆ ಅನುಭವಿಸಿತು.
23 ವರ್ಷದ ಫಾತಿಮಾ, ಕೇವಲ 38 ಎಸೆತಗಳಲ್ಲಿ ಅಜೇಯ 55 ರನ್ ಸಿಡಿಸುವುದರ ಜೊತೆಗೆ 16 ರನ್ ನೀಡಿ 3 ವಿಕೆಟ್ (3/16) ಕಬಳಿಸಿದರು. ಈ ಮೂಲಕ ಮಹಿಳಾ ಟಿ20 ವಿಶ್ವಕಪ್ ಪಂದ್ಯವೊಂದರಲ್ಲಿ 50ಕ್ಕೂ ಹೆಚ್ಚು ರನ್ ಹಾಗೂ 3ಕ್ಕೂ ಹೆಚ್ಚು ವಿಕೆಟ್ ಪಡೆದ ಆಟಗಾರ್ತಿಯರ ಗಣ್ಯರ ಪಟ್ಟಿಗೆ ಸೇರ್ಪಡೆಯಾದರು. ಆದರೆ, ಈ ಐತಿಹಾಸಿಕ ಮೈಲಿಗಲ್ಲು ತಲುಪಿದ ಮೊದಲ ನಾಯಕಿ ಎಂಬ ಹೆಗ್ಗಳಿಕೆ ಫಾತಿಮಾ ಅವರದ್ದಾಗಿದೆ.
ಪಂದ್ಯದ ಆರಂಭದಲ್ಲಿ, ಮರಿಜಾನ್ ಕಾಪ್ ಹಾಗೂ ಶಬ್ನಿಮ್ ಇಸ್ಮಾಯಿಲ್ ಅವರ ಮಾರಕ ವೇಗದ ದಾಳಿಗೆ ನಲುಗಿದ ಪಾಕಿಸ್ತಾನ ಕೇವಲ 50 ರನ್‌ಗಳಿಗೆ 8 ವಿಕೆಟ್ ಕಳೆದುಕೊಂಡು ತೀವ್ರ ಸಂಕಷ್ಟಕ್ಕೆ ಸಿಲುಕಿತ್ತು. ಇನಿಂಗ್ಸ್‌ನ ಮೊದಲ ಎಸೆತದಲ್ಲೇ ಕಾಪ್ ವಿಕೆಟ್ ಕಬಳಿಸುವ ಮೂಲಕ ಆಘಾತ ನೀಡಿದ್ದರು.
ಇದನ್ನು ಓದಿದ್ದೀರಾ? ಫಿಫಾ 2026: ಆಕರ್ಷಕ ಗೋಲು ಬಾರಿಸಿದರೂ ರೆಫರಿಗಳು ಅದನ್ನು ತಿರಸ್ಕರಿಸುವುದೇಕೆ?
ಆದರೆ, ಕಠಿಣ ಪಿಚ್‌ನಲ್ಲಿ ಶರಣಾಗಲು ಒಪ್ಪದ ನಾಯಕಿ ಫಾತಿಮಾ, ಟೂಬಾ ಹಸನ್ ಅವರೊಂದಿಗೆ ಸೇರಿ 9ನೇ ವಿಕೆಟ್‌ಗೆ 71 ರನ್‌ಗಳ ಅಮೂಲ್ಯ ಜೊತೆಯಾಟವಾಡಿದರು. ಇದು ಮಹಿಳಾ ಟಿ20 ವಿಶ್ವಕಪ್ ಇತಿಹಾಸದಲ್ಲಿ 9ನೇ ವಿಕೆಟ್‌ಗೆ ದಾಖಲಾದ ಅತ್ಯಧಿಕ ಜೊತೆಯಾಟವಾಗಿದೆ. ಈ ಹೋರಾಟದ ನೆರವಿನಿಂದ ಪಾಕಿಸ್ತಾನ 126 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಕಲೆಹಾಕಿತು. ಅಂತಿಮ ಓವರ್‌ನಲ್ಲಿ ನಾಡಿನ್ ಡಿ ಕ್ಲರ್ಕ್ ಬೌಲಿಂಗ್‌ನಲ್ಲಿ ಭರ್ಜರಿ ಎರಡು ಸಿಕ್ಸರ್ ಸಿಡಿಸಿದ ಫಾತಿಮಾ ತಮ್ಮ ಅರ್ಧಶತಕ ಪೂರೈಸಿದರು.
“ನಮ್ಮ ಸಾಮರ್ಥ್ಯದ ಬಗ್ಗೆ ನಮಗೆ ಅರಿವಿತ್ತು. ಟೂಬಾ ಅವರಿಗೂ ಆ ಸಾಮರ್ಥ್ಯವಿದೆ. ಹೀಗಾಗಿ ಪಂದ್ಯವನ್ನು ಕೊನೆಯವರೆಗೂ ಕೊಂಡೊಯ್ಯಲು ಮತ್ತು ನಮ್ಮ ಯೋಜನೆಗಳನ್ನು ಕಾರ್ಯಗತಗೊಳಿಸಲು ನಾವು ಪ್ರಯತ್ನಿಸಿದೆವು” ಎಂದು ಫಾತಿಮಾ ಹೇಳಿದ್ದಾರೆ.
ಮಹಿಳಾ ಟಿ20 ವಿಶ್ವಕಪ್ ಪಂದ್ಯದಲ್ಲಿ 50 ಕ್ಕೂ ಹೆಚ್ಚು ರನ್ ಹಾಗೂ 3 ಕ್ಕೂ ಹೆಚ್ಚು ವಿಕೆಟ್ ಸಾಧನೆ ಮಾಡಿದವರು:
ಹೇಲಿ ಮ್ಯಾಥ್ಯೂಸ್ (62 ರನ್ ಮತ್ತು 3 ವಿಕೆಟ್): ಶ್ರೀಲಂಕಾ ವಿರುದ್ಧ, ಗ್ರಾಸ್ ಐಲೆಟ್, 2018
ಸುನೆ ಲೂಸ್ (61ರನ್ ಮತ್ತು 3 ವಿಕೆಟ್): ಥಾಯ್ಲೆಂಡ್ ವಿರುದ್ಧ, ಕ್ಯಾನ್‌ಬೆರಾ, 2020
ಶಫಾಲಿ ವರ್ಮಾ (55 ರನ್ ಮತ್ತು 3 ವಿಕೆಟ್): ನೆದರ್ಲೆಂಡ್ಸ್ ವಿರುದ್ಧ, ಲೀಡ್ಸ್, 2026
ಫಾತಿಮಾ ಸನಾ (55 ರನ್ ಮತ್ತು 3 ವಿಕೆಟ್): ದಕ್ಷಿಣ ಆಫ್ರಿಕಾ ವಿರುದ್ಧ, ಬರ್ಮಿಂಗ್‌ಹ್ಯಾಮ್, 2026
ಕೊನೆಯವರೆಗೂ ಬಿಡದ ಛಲ
ಬ್ಯಾಟಿಂಗ್ ಬಳಿಕ ಬೌಲಿಂಗ್‌ನಲ್ಲೂ ಮಿಂಚಿದ ಫಾತಿಮಾ 3 ವಿಕೆಟ್ ಕಬಳಿಸಿ ದಕ್ಷಿಣ ಆಫ್ರಿಕಾ ಪಡೆಯನ್ನು ಕಾಡಿದರು. ಪಾಕಿಸ್ತಾನದ ಸ್ಪಿನ್ನರ್‌ಗಳು ಎದುರಾಳಿಯನ್ನು ತೀವ್ರ ಒತ್ತಡಕ್ಕೆ ಸಿಲುಕಿಸಿದರು. ಆದರೆ, ಕೊನೆಯ ಹಂತದಲ್ಲಿ ಒತ್ತಡ ನಿಭಾಯಿಸಿದ ದಕ್ಷಿಣ ಆಫ್ರಿಕಾ, 2 ವಿಕೆಟ್‌ಗಳ ಜಯ ಸಾಧಿಸಿತು. ಇದು ಮಹಿಳಾ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಅತಿ ಕಡಿಮೆ ಅಂತರದ ಗೆಲುವುಗಳಲ್ಲೊಂದಾಗಿದೆ. ಈ ಮೂಲಕ ಪಾಕಿಸ್ತಾನದ ವಿರುದ್ಧ ಆಡಿದ ಎಲ್ಲಾ ನಾಲ್ಕು ವಿಶ್ವಕಪ್ ಪಂದ್ಯಗಳಲ್ಲೂ ದಕ್ಷಿಣ ಆಫ್ರಿಕಾ ಗೆಲುವು ಒಲಿಸಿಕೊಂಡಿದೆ.
ಸೋಲಿನ ಬಗ್ಗೆ ಭಾವುಕರಾಗಿ ಮಾತನಾಡಿದ ಫಾತಿಮಾ, ಪ್ರಮುಖ ಘಟ್ಟದಲ್ಲಿ ತಂಡ ಅವಕಾಶ ಬಳಸಿಕೊಳ್ಳಲು ವಿಫಲವಾಯಿತು ಎಂದರು. “ನಮ್ಮ ಹೋರಾಟ ಮತ್ತು ಪ್ರಯತ್ನ ಅದ್ಭುತವಾಗಿತ್ತು, ಆದರೆ ಪಂದ್ಯವನ್ನು ನಾವು ಗೆಲುವಿನೊಂದಿಗೆ ಮುಕ್ತಾಯಗೊಳಿಸಲು ಸಾಧ್ಯವಾಗಲಿಲ್ಲ,” ಎಂದರು.
ನಾಯಕತ್ವದ ಹೆಚ್ಚುವರಿ ಜವಾಬ್ದಾರಿಯ ಕುರಿತು ಪ್ರತಿಕ್ರಿಯಿಸಿದ ಅವರು, “ನಾನು ಈ ಪಾತ್ರವನ್ನು ಆನಂದಿಸುತ್ತಿದ್ದೇನೆ, ಆದರೆ ನಾವು ಪಂದ್ಯಗಳನ್ನು ಗೆಲ್ಲಬೇಕಿದೆ. ಇನ್ನು ಸಾಗಬೇಕಾದ ಹಾದಿ ಬಹಳಷ್ಟಿದೆ. ಅದರಲ್ಲೂ ಪಂದ್ಯದ ಗತಿ ನಮ್ಮ ವಿರುದ್ಧವಿದ್ದಾಗ ಮೈದಾನದಲ್ಲಿ ನಾವು ಹೆಚ್ಚು ಸಂಯಮದಿಂದ ಇರಬೇಕಿದೆ. ಮುಂದಿನ ಬಾರಿ ಇನ್ನಷ್ಟು ಉತ್ತಮವಾಗಿ ಆಡಲು ಪ್ರಯತ್ನಿಸುತ್ತೇವೆ” ಎಂದು ವಿವರಿಸಿದರು.
