ಲಖನೌದಲ್ಲಿ ನಡೆಯುತ್ತಿರುವ ರಣಜಿ ಟ್ರೋಫಿ ಟೂರ್ನಿಯ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಕರ್ನಾಟಕ ತಂಡವು ಎರಡನೇ ದಿನದಂದು ಕೂಡ ಉತ್ತರಾಖಂಡ ವಿರುದ್ಧ ಸಂಪೂರ್ಣ ಪಾರಮ್ಯ ಮೆರೆದಿದೆ. ನಾಯಕ ದೇವದತ್ ಪಡಿಕ್ಕಲ್ ಅವರ ಆಕರ್ಷಕ ದ್ವಿಶತಕ ಹಾಗೂ ಮಧ್ಯಮ ಕ್ರಮಾಂಕದಲ್ಲಿ ರವಿಚಂದ್ರನ್ ಸ್ಮರಣ್ ಅವರ ಸಮಯೋಚಿತ ಶತಕದ ನೆರವಿನಿಂದ ರಾಜ್ಯ ತಂಡವು ಮೊದಲ ಇನಿಂಗ್ಸ್‌ನಲ್ಲಿ ಬೃಹತ್ ಮೊತ್ತದತ್ತ ದಾಪುಗಾಲಿಟ್ಟಿದೆ.
ಎರಡನೇ ದಿನದಾಟದ ಅಂತ್ಯಕ್ಕೆ ಕರ್ನಾಟಕ ತಂಡವು 180 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ ಬರೋಬ್ಬರಿ 689 ರನ್ ಕಲೆಹಾಕುವ ಮೂಲಕ ಎದುರಾಳಿ ಮೇಲೆ ಪ್ರಬಲ ಹಿಡಿತ ಸಾಧಿಸಿದೆ.
ಮೊದಲ ದಿನವೇ ಶತಕ ಸಿಡಿಸಿ ಭದ್ರ ಬುನಾದಿ ಹಾಕಿಕೊಟ್ಟಿದ್ದ ನಾಯಕ ದೇವದತ್ ಪಡಿಕ್ಕಲ್, ಎರಡನೇ ದಿನವೂ ತಮ್ಮ ಬ್ಯಾಟಿಂಗ್ ವೈಭವ ಮುಂದುವರಿಸಿದರು. ಉತ್ತರಾಖಂಡ ಬೌಲರ್‌ಗಳನ್ನು ಕಾಡಿದ ಪಡಿಕ್ಕಲ್, 330 ಎಸೆತಗಳಲ್ಲಿ 29 ಬೌಂಡರಿ ಹಾಗೂ 3 ಸಿಕ್ಸರ್‌ಗಳ ನೆರವಿನಿಂದ 232 ರನ್ ಗಳಿಸಿ ಲಕ್ಷ್ಯ ರಾಯ್ಚಂದಾನಿ ಅವರಿಗೆ ವಿಕೆಟ್ ಒಪ್ಪಿಸಿದರು. ಕೆ.ಎಲ್. ರಾಹುಲ್ (141) ಅವರೊಂದಿಗೆ ಸೇರಿ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದ್ದ ಪಡಿಕ್ಕಲ್, ತಂಡದ ಮೊತ್ತವನ್ನು ಐನ್ನೂರರ ಗಡಿ ಸಮೀಪಿಸಲು ನೆರವಾದರು. ಕರುಣ್ ನಾಯರ್ 60 ರನ್ (105 ಎಸೆತ, 8 ಬೌಂಡರಿ) ಗಳಿಸಿ ಉತ್ತಮ ಜೊತೆ ನೀಡಿದರು.
ಇದನ್ನು ಓದಿದ್ದೀರಾ? ಬ್ಯಾಟ್ ಬೀಸಿದ ‘ಫಿನಿಶರ್’ಗೆ ಕ್ಲೀನ್ ಬೌಲ್ಡ್ ಆದ ಸಂಸದೆ
ಪಡಿಕ್ಕಲ್ ನಿರ್ಗಮನದ ನಂತರ ಜವಾಬ್ದಾರಿ ಹೊತ್ತ ರವಿಚಂದ್ರನ್ ಸ್ಮರಣ್, ಕುಸಿಯದಂತೆ ಇನಿಂಗ್ಸ್ ಕಟ್ಟಿದರು. ತಾಳ್ಮೆಯ ಆಟ ಪ್ರದರ್ಶಿಸಿದ ಸ್ಮರಣ್, ದಿನದಾಟದ ಅಂತ್ಯದವರೆಗೂ ಅಜೇಯರಾಗಿ ಉಳಿದು 191 ಎಸೆತಗಳಲ್ಲಿ 11 ಬೌಂಡರಿಗಳೊಂದಿಗೆ 121 ರನ್ ಗಳಿಸಿದರು. ಇವರಿಗೆ ಉತ್ತಮ ಬೆಂಬಲ ನೀಡಿದ ವಿಕೆಟ್ ಕೀಪರ್ ಕೃತಿಕ್ ಕೃಷ್ಣ 60 ರನ್ (103 ಎಸೆತ) ಗಳಿಸಿ ಔಟಾದರು.
ಶ್ರೇಯಸ್ ಗೋಪಾಲ್ (0) ಶೂನ್ಯ ಸುತ್ತಿದರಾದರೂ, ಕ್ರೀಸ್‌ಗೆ ಬಂದ ವಿದ್ಯಾಧರ್ ಪಾಟೀಲ್ (ಅಜೇಯ 35) ಸ್ಮರಣ್ ಅವರಿಗೆ ಉತ್ತಮ ಜೊತೆ ನೀಡುತ್ತಿದ್ದಾರೆ. ಈ ಜೋಡಿ ಮುರಿಯದ 7ನೇ ವಿಕೆಟ್‌ಗೆ ಈಗಾಗಲೇ ಅರ್ಧಶತಕದ ಜೊತೆಯಾಟವಾಡಿದೆ.
ಉತ್ತರಾಖಂಡ ಪರ ಆದಿತ್ಯ ರಾವತ್ 132 ರನ್ ನೀಡಿ 3 ವಿಕೆಟ್ ಪಡೆದರೆ, ಅಭಯ್ ನೇಗಿ, ಅವನೀಶ್ ಸುಧಾ ಮತ್ತು ಲಕ್ಷ್ಯ ರಾಯ್ಚಂದಾನಿ ತಲಾ ಒಂದೊಂದು ವಿಕೆಟ್ ಹಂಚಿಕೊಂಡರು.
ಸಂಕ್ಷಿಪ್ತ ಸ್ಕೋರ್:
ಕರ್ನಾಟಕ (ಮೊದಲ ಇನಿಂಗ್ಸ್): 180 ಓವರ್‌ಗಳಲ್ಲಿ 6 ವಿಕೆಟ್‌ಗೆ 689 (ದೇವದತ್ ಪಡಿಕ್ಕಲ್ 232, ಕೆ.ಎಲ್. ರಾಹುಲ್ 141, ರವಿಚಂದ್ರನ್ ಸ್ಮರಣ್ ಅಜೇಯ 121, ಕರುಣ್ ನಾಯರ್ 60, ಕೃತಿಕ್ ಕೃಷ್ಣ 60, ವಿದ್ಯಾಧರ್ ಪಾಟೀಲ್ ಅಜೇಯ 35; ಆದಿತ್ಯ ರಾವತ್ 132ಕ್ಕೆ 3, ಅಭಯ್ ನೇಗಿ 99ಕ್ಕೆ 1).
