ಭಾರತದ ಎರಡು ಬಾರಿಯ ಟೆನಿಸ್ Grand Slam ವಿಜೇತ ಕನ್ನಡಿಗ ರೋಹನ್ ಬೋಪಣ್ಣ ಶನಿವಾರ ತಮ್ಮ ನಿವೃತ್ತಿಯನ್ನು ಘೋಷಿಸಿದ್ದಾರೆ. 2017ರ ಫ್ರೆಂಚ್ ಓಪನ್ ಮಿಶ್ರ ಡಬಲ್ಸ್ನಲ್ಲಿ ಗ್ಯಾಬ್ರಿಯೆಲಾ ಡಾಬ್ರೋವ್ಸ್ಕಿ ಜೊತೆಗೂಡಿ ಚೊಚ್ಚಲ ಗ್ರ್ಯಾಂಡ್ ಸ್ಲಾಂ ಪ್ರಶಸ್ತಿ ಗೆದ್ದಿದ್ದ ಬೋಪಣ್ಣ, 2024ರ ಆಸ್ಟ್ರೇಲಿಯನ್ ಓಪನ್ನಲ್ಲಿ ಮ್ಯಾಥ್ಯೂ ಎಬ್ಡೆನ್ ಜೊತೆ ಇತಿಹಾಸ ನಿರ್ಮಿಸಿದ್ದರು.
ಸಾಮಾಜಿಕ ಜಾಲತಾಣದಲ್ಲಿ ಭಾವುಕ ಸಂದೇಶ ಹಂಚಿಕೊಂಡಿರುವ ಬೋಪಣ್ಣ, “ನನ್ನ ಜೀವನಕ್ಕೆ ಅರ್ಥ ನೀಡಿದ ಈ ಆಟಕ್ಕೆ ವಿದಾಯ ಹೇಳುವುದು ಸುಲಭವಲ್ಲ. ಇಪ್ಪತ್ತು ವರ್ಷಗಳ ಅಮೋಘ ಪ್ರವಾಸದ ಬಳಿಕ ಈಗ ಅಧಿಕೃತವಾಗಿ ರಾಕೆಟ್ ಅನ್ನು ಬಿಟ್ಟು ಹೋಗುವ ಸಮಯ ಬಂದಿದೆ.
ಕೊಡಗಿನಲ್ಲಿ ಹುಟ್ಟಿ ಬೆಳೆದ ಬೋಪಣ್ಣ ಅವರು ಭಾರತದ ಟೆನಿಸ್ನ ಪ್ರತಿಷ್ಠಿತ ಮುಖವಾಗಿ, ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ದೇಶದ ಗೌರವವನ್ನು ಎತ್ತಿದರು. “ಭಾರತವನ್ನು ಪ್ರತಿನಿಧಿಸುವುದು ನನ್ನ ಜೀವನದ ಅತ್ಯಂತ ದೊಡ್ಡ ಗೌರವ. ಈಗ ನಾನು ಯುವ ಕ್ರೀಡಾಪಟುಗಳಿಗೆ ಮಾರ್ಗದರ್ಶನ ನೀಡಲು ಬಯಸುತ್ತೇನೆ. ಅವರ ಆರಂಭ ಎಷ್ಟು ಚಿಕ್ಕದಾದರೂ, ಅವರ ಕನಸುಗಳು ದೊಡ್ಡದಾಗಬಹುದು ಎಂಬುದನ್ನು ತೋರಿಸಲು ಇಷ್ಟಪಡುವೆ. ಕೊಡಗಿನಿಂದ ಆರಂಭಿಸಿ ವಿಶ್ವದ ವೇದಿಕೆಯಲ್ಲಿ ಆಡಿದ ಅನುಭವ ನಿಜಕ್ಕೂ ಮರೆಯಲಾಗದ್ದು’ ಎಂದು ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ವಿಶ್ಲೇಷಣೆ | ಜನಪ್ರಿಯ ಆಟಕ್ಕೆ ಮೆರಗು ತಂದವರು; ಭಾರತೀಯ ಮಹಿಳೆಯರ ಕ್ರಿಕೆಟ್ ಯಶೋಗಾಥೆ
“ಸ್ಪರ್ಧೆಯಿಂದ ದೂರ ಸರಿಯುತ್ತಿದ್ದರೂ, ಟೆನಿಸ್ ಜೊತೆಗಿನ ನನ್ನ ಕಥೆ ಮುಗಿದಿಲ್ಲ. ಈ ಆಟ ನನಗೆ ಎಲ್ಲವನ್ನೂ ನೀಡಿತು, ಈಗ ನಾನು ಹಿಂತಿರುಗಿ ಸಣ್ಣ ಪಟ್ಟಣಗಳ ಯುವ ಕನಸುಗಾರರಿಗೆ ಸಹಾಯ ಮಾಡಲು ಬಯಸುತ್ತೇನೆ. ಜೀವನದಲ್ಲಿ ಆರಂಭ ಎಷ್ಟು ಸಣ್ಣದಾದರೂ, ನಂಬಿಕೆ ಮತ್ತು ಶ್ರಮದಿಂದ ದೊಡ್ಡ ಸಾಧನೆ ಸಾಧ್ಯ. ಟೆನಿಸ್ ಮೇಲಿನ ಅವರ ಪ್ರೀತಿ ಯಾವತ್ತೂ ಕಡಿಮೆಯಾಗುವುದಿಲ್ಲ, ಇದು ವಿದಾಯವಲ್ಲ, ಕೃತಜ್ಞತೆ ಹೇಳುವ ಕ್ಷಣ. ನನ್ನನ್ನು ರೂಪಿಸಿದ, ಮಾರ್ಗದರ್ಶಿಸಿದ, ಬೆಂಬಲಿಸಿದ ಮತ್ತು ಪ್ರೀತಿಸಿದ ಎಲ್ಲರಿಗೂ ಧನ್ಯವಾದಗಳು. ನೀವೆಲ್ಲರೂ ಈ ಕಥೆಯ ಭಾಗ, ನನ್ನ ಭಾಗ,” ಎಂದು ಎಕ್ಸ್ನಲ್ಲಿ (ಹಿಂದೆ ಟ್ವಿಟರ್) ಬರೆದುಕೊಂಡಿದ್ದಾರೆ.
ಪ್ಯಾರಿಸ್ ಮಾಸ್ಟರ್ಸ್ 1000 ಟೂರ್ನಿಯಲ್ಲಿ ಅಲೆಕ್ಸಾಂಡರ್ ಬುಬ್ಲಿಕ್ ಜೊತೆ ಆಡಿದ್ದೇ ಬೋಪಣ್ಣ ಅವರ ಕೊನೆಯ ಪಂದ್ಯ. ಕನ್ನಡಿಗರ ಹೆಮ್ಮೆಯಾಗಿ ಹೊರಹೊಮ್ಮಿದ ಬೋಪಣ್ಣ, ಟೆನಿಸ್ ಜಗತ್ತಿಗೆ ಸ್ಫೂರ್ತಿಯಾಗಿದ್ದಾರೆ ಎಂದು ನೆಟ್ಟಿಗರು ಹೇಳಿದ್ದಾರೆ.
