ಇನ್ಮುಂದೆ ಕೆನಡಾ ತನ್ನ ಮಿಲಿಟರಿ ಬಜೆಟ್‌ನ ಶೇ.70ರಷ್ಟನ್ನು ಅಮೆರಿಕದ ರಕ್ಷಣಾ ಕಂಪನಿಗಳಿಗಾಗಿ ಬಳಸಲ್ಲ. ಬದಲಾಗಿ ಈ ಹಣದ ಶೇ.70ರಷ್ಟನ್ನು ಕೆನಡಾದ ಸ್ಥಳೀಯ ರಕ್ಷಣಾ ಕಂಪನಿಗಳಿಗೆ ಹೋಗುವಂತೆ ನೋಡಿಕೊಳ್ಳಲಾಗುತ್ತದೆ ಎಂದು ಪ್ರಧಾನಿ ಮಾರ್ಕ್ ಕಾರ್ನಿ ಹೇಳಿದ್ದಾರೆ.
ಪ್ರಸ್ತುತ ಕೆನಡಾ ತನ್ನ ರಕ್ಷಣಾ ಬಜೆಟ್‌ನಲ್ಲಿ ಸುಮಾರು ಶೇ.70ರಷ್ಟು ಅಮೆರಿಕದ ಕಂಪನಿಗಳಾದ ಲಾಕ್‌ಹೀಡ್ ಮಾರ್ಟಿನ್, ಜನರಲ್ ಡೈನಾಮಿಕ್ಸ್ ಮುಂತಾದವುಗಳಿಗೆ ಕೊಡುತ್ತಿದೆ. ಆದರೆ ಇದೀಗ ಕಾರ್ನಿ ನೇತೃತ್ವದ ಕೆನಡಾ ಸರ್ಕಾರವು ಹೊಸ ರಕ್ಷಣಾ ನೀತಿ ಬದಲಾವಣೆ ಘೋಷಿಸಿದೆ. ಇರಾನ್ ಮತ್ತು ಇಸ್ರೇಲ್-ಅಮೆರಿಕ ಯುದ್ಧಕ್ಕೆ ಸದ್ಯ ತಾತ್ಕಾಲಿಕ ಕದನ ವಿರಾಮ ಘೋಷಣೆಯಾಗಿರುವ ನಡುವೆ ಈ ಬೆಳವಣಿಗೆ ಸಂಭವಿಸಿದೆ.
ಇದನ್ನು ಓದಿದ್ದೀರಾ? ಕೆನಡಾಕ್ಕೆ ಶೇ100 ಸುಂಕ ಎಚ್ಚರಿಕೆ: ಮುಂದುವರೆದ ಟ್ರಂಪ್ ಸರ್ವಾಧಿಕಾರಿ ನಡೆ
ಸಂಪೂರ್ಣ ನಿಷೇಧವಲ್ಲದಿದ್ದರೂ ಕೆನಡಾದಲ್ಲಿ ಭವಿಷ್ಯದ ಹೊಸ ಖರೀದಿಗಳಲ್ಲಿ ಅಮೆರಿಕದ ಪಾಲು ಬಹಳ ಕಡಿಮೆಯಾಗಲಿದೆ. ಹಾಗೆಯೇ ಸದ್ಯ ಕೆನಡಾ ಯುರೋಪ್, ದಕ್ಷಿಣ ಕೊರಿಯಾ ಮುಂತಾದ ಇತರ ದೇಶಗಳೊಂದಿಗೂ ಪಾಲುದಾರಿಕೆ ಹೆಚ್ಚಿಸುತ್ತಿದೆ.
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತೆರಿಗೆ ಹೆಚ್ಚಿಸಿದ ಬಳಿಕ ಕೆನಡಾ-ಅಮೆರಿಕ ಸಂಬಂಧ ಬಿಗಡಾಯಿಸಿದೆ. Buy Canadian (ಬೈ ಕೆನಡಿಯನ್) ಅಭಿಯಾನ ನಡೆಯುತ್ತಿದೆ. ಮುಂದಿನ 10 ವರ್ಷಗಳಲ್ಲಿ $180 ಬಿಲಿಯನ್ ರಕ್ಷಣಾ ಖರೀದಿ + $290 ಬಿಲಿಯನ್ ಸಂಬಂಧಿತ ಹೂಡಿಕೆಗೆ ಕೆನಡಾ ಸರ್ಕಾರ ಯೋಜಿಸಿದೆ.
