ವಿಶ್ವದ ತೈಲ ಮತ್ತು ಅನಿಲ ಪೂರೈಕೆಯ ಪ್ರಮುಖ ಮಾರ್ಗ ಹೊರ್ಮುಜ್ ಜಲಸಂಧಿಯಲ್ಲಿ ಇರಾನ್ ತನ್ನ ನಿಯಂತ್ರಣವನ್ನು ಬಿಗಿಗೊಳಿಸಿದೆ. ಅಮೆರಿಕ ಮತ್ತು ಇರಾನ್ ನಡುವೆ ಸಹಿ ಹಾಕಲಾದ ‘ಇಸ್ಲಾಮಾಬಾದ್ ಒಪ್ಪಂದ’ದ ಬೆನ್ನಲ್ಲೇ, ಇರಾನ್‌ನ ನೂತನ ‘ಪರ್ಷಿಯನ್ ಗಲ್ಫ್ ಸ್ಟ್ರೈಟ್ ಅಥಾರಿಟಿ’ (PGSA) ಜಲಸಂಧಿಯಲ್ಲಿ ಸಂಚರಿಸುವ ಎಲ್ಲಾ ಹಡಗುಗಳಿಗೆ ಕಠಿಣ ನಿಯಮಾವಳಿಗಳನ್ನು ಜಾರಿಗೆ ತಂದಿದೆ.
ಅಮೆರಿಕ-ಇರಾನ್ ಒಪ್ಪಂದದ ಭಾಗವಾಗಿ, ಮುಂದಿನ 60 ದಿನಗಳವರೆಗೆ ಯಾವುದೇ ಸಂಚಾರ ಅಥವಾ ಭದ್ರತಾ ಶುಲ್ಕಗಳನ್ನು ವಿಧಿಸಲಾಗುವುದಿಲ್ಲ. ಈ ವೆಚ್ಚವನ್ನು ಇರಾನ್ ಸರ್ಕಾರವೇ ಭರಿಸಲಿದೆ. ಆದರೆ, 60 ದಿನಗಳ ನಂತರ ಇರಾನ್ ಶುಲ್ಕಗಳನ್ನು ಜಾರಿಗೆ ತರುವ ಸುಳಿವು ನೀಡಿದೆ. ಇದು ಭವಿಷ್ಯದಲ್ಲಿ ಹೊಸ ಸಂಘರ್ಷಕ್ಕೆ ಎಡೆಮಾಡಿಕೊಡಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ.
ಹಡಗುಗಳು ಹೊರ್ಮುಜ್ ಜಲಸಂಧಿಯನ್ನು ಪ್ರವೇಶಿಸುವ ಅಥವಾ ನಿರ್ಗಮಿಸುವ ಕನಿಷ್ಠ 48 ಗಂಟೆಗಳ ಮುಂಚಿತವಾಗಿ PGSA.ir ವೆಬ್‌ಸೈಟ್ ಮೂಲಕ ನೋಂದಣಿ ಮಾಡಿಕೊಳ್ಳುವುದು ಕಡ್ಡಾಯವಾಗಿದೆ. ಈ ಪ್ರಕ್ರಿಯೆಯಲ್ಲಿ ಹಡಗಿನ ಹೆಸರು, ಧ್ವಜ, ಇಂಧನ ಸಾಮರ್ಥ್ಯ, ಸರಕುಗಳ ಮೌಲ್ಯ, ಸಿಬ್ಬಂದಿಯ ಮಾಹಿತಿ ಮತ್ತು ವಿಮಾ ವಿವರಗಳಂತಹ ಸುದೀರ್ಘ ಮಾಹಿತಿ ಸಲ್ಲಿಸಬೇಕಾಗುತ್ತದೆ.
ಈ ಹೊಸ ವ್ಯವಸ್ಥೆಯಲ್ಲಿ, ಅರ್ಜಿ ಸಲ್ಲಿಸುವಾಗ, PGSA ತೆಗೆದುಕೊಳ್ಳುವ ಯಾವುದೇ ನಿರ್ಧಾರ, ವಿಮಾ ಪಾಲಿಸಿಯ ಜಾರಿ ಅಥವಾ ಸಂಚಾರ ನಿಯಮಗಳ ವಿರುದ್ಧ ಭವಿಷ್ಯದಲ್ಲಿ ಯಾವುದೇ ಕಾನೂನು ಹೋರಾಟ ಅಥವಾ ಸವಾಲು ಹಾಕುವುದಿಲ್ಲ ಎಂದು ಮಾಲೀಕರು ಮುಚ್ಚಳಿಕೆ ಬರೆದುಕೊಡಬೇಕು. ಈ ಷರತ್ತು ಅಂತಿಮ ಮತ್ತು ಬದ್ಧವಾಗಿರುತ್ತದೆ ಎಂದು ಪ್ರಾಧಿಕಾರ ತಿಳಿಸಿದೆ.
ಇದನ್ನೂ ಓದಿ: ಬಿಡದಿ ಟೌನ್‌ಶಿಪ್: 7,481ರಿಂದ 9,600 ಎಕರೆ ಸ್ವಾಧೀನಕ್ಕೆ ಸಂಚು; ಜೆಡಿಎಸ್ ದೂರು
ಭದ್ರತಾ ಕಾರಣಗಳಿಂದಾಗಿ ಹಡಗುಗಳು ಲಾರಕ್ ದ್ವೀಪದ ಸಮೀಪವಿರುವ ಇರಾನ್ ಸೂಚಿಸಿದ ನಿರ್ದಿಷ್ಟ ಮಾರ್ಗದಲ್ಲಿ ಮಾತ್ರ ಸಾಗಬೇಕು. ನೀಡಲಾಗುವ ಪರವಾನಗಿಯು ಕೇವಲ 5 ದಿನಗಳವರೆಗೆ ಮಾತ್ರ ಸಿಂಧುವಾಗಿದ್ದು, ಅದು ಒಂದು ಬಾರಿಯ ಸಂಚಾರಕ್ಕೆ ಮಾತ್ರ ಅನ್ವಯಿಸುತ್ತದೆ. ನಿಯಮಗಳನ್ನು ಉಲ್ಲಂಘಿಸಿದರೆ ಅಥವಾ ನಿಗದಿತ ಮಾರ್ಗದಿಂದ ವಿಚಲಿತರಾದರೆ, ಸಂಭವಿಸುವ ಯಾವುದೇ ದುರಂತ ಅಥವಾ ದಂಡಕ್ಕೆ ಹಡಗಿನ ಮಾಲೀಕರೇ ಸಂಪೂರ್ಣ ಹೊಣೆಗಾರರಾಗಿರುತ್ತಾರೆ.
ಮಾರ್ಚ್ ತಿಂಗಳಿನಿಂದ ಸ್ಥಗಿತಗೊಂಡಿದ್ದ ಈ ಮಾರ್ಗದಲ್ಲಿ ಕಳೆದ ಗುರುವಾರ 25 ಹಡಗುಗಳು ಸಂಚರಿಸುವ ಮೂಲಕ ವಾಣಿಜ್ಯ ಚಟುವಟಿಕೆಗಳು ಪುನರಾರಂಭವಾಗಿವೆ. ಜಾಗತಿಕ ಇಂಧನ ಪೂರೈಕೆಯ ಶೇ. 20ರಷ್ಟು ಪಾಲು ಹೊಂದಿರುವ ಈ ಜಲಸಂಧಿಯಲ್ಲಿ ಇರಾನ್ ಜಾರಿಗೆ ತಂದಿರುವ ಈ ಏಕಪಕ್ಷೀಯ ಕ್ರಮಗಳು ಅಂತಾರಾಷ್ಟ್ರೀಯ ಕಡಲ ಕಾನೂನುಗಳಿಗೆ ಸವಾಲಾಗಿ ಪರಿಣಮಿಸಿವೆ. ಹಡಗು ಕಂಪನಿಗಳು ಈ ನಿಯಮಗಳನ್ನು ಅನುಸರಿಸುವ ಅನಿವಾರ್ಯತೆಯಲ್ಲಿವೆಯಾದರೂ, ಇರಾನ್‌ನ ಈ ಕಠಿಣ ಷರತ್ತುಗಳು ‘ಮುಕ್ತ ಸಮುದ್ರಯಾನ’ದ ಸ್ವಾತಂತ್ರ್ಯವನ್ನು ಮಿತಿಗೊಳಿಸುತ್ತಿವೆಯೇ ಎಂಬ ಆತಂಕ ವ್ಯಕ್ತವಾಗಿದೆ.
