2025ರಲ್ಲಿ ಬಾಂಗ್ಲಾದೇಶ ಮತ್ತು ಪಾಕಿಸ್ತಾನದ ಕರೆನ್ಸಿಗಳ ಪ್ರದರ್ಶನವು ಕಳಪೆಯಾಗಿದೆ. ಅಲ್ಲಿನ ಆರ್ಥಿಕ ಸ್ಥಿತಿ, ಬಿಕ್ಕಟ್ಟು ಎಲ್ಲವೂ ತಿಳಿದಿರುವುದು. ಅದನ್ನೂ ಮೀರಿ ಭಾರತೀಯ ರೂಪಾಯಿಯು 2025ರಲ್ಲಿ ಏಷ್ಯಾದಲ್ಲಿಯೇ ಅತಿ ಕಳಪೆ ಪ್ರದರ್ಶನ ತೋರಿದ ಕರೆನ್ಸಿ ಎನಿಸಿಕೊಂಡಿದೆ.
2025ರಲ್ಲಿ ಅಮೆರಿಕಾ ಡಾಲರ್(ಯುಎಸ್‌ಡಿ) ಎದುರು ಭಾರತೀಯ ರೂಪಾಯಿ ಸುಮಾರು ಶೇ.4.7ರಿಂದ ಶೇ.6ರಷ್ಟು ಮೌಲ್ಯವನ್ನು ಕಳೆದುಕೊಂಡಿದೆ. ವರ್ಷದ ಅಂತ್ಯಕ್ಕೆ 89.88 ರೂಪಾಯಿಗೆ ತಲುಪಿದೆ. ನಡುವೆ 90ರ ಗಡಿಯನ್ನೂ ದಾಟಿತ್ತು.
ಇದನ್ನು ಓದ್ದೀದಿರಾ? ಯುಎಸ್‌ ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿತ: 1947ರಿಂದ 2025ರವರೆಗೆ ನಡೆದಿದ್ದೇನು?
ಮಲೇಷಿಯಾದ ರಿಂಗಿಟ್ (MYR) 2025ರಲ್ಲಿ ಏಷ್ಯಾದ ಅತ್ಯಂತ ಬಲವಾಗಿ ಪ್ರದರ್ಶನ ನೀಡಿದ ಕರೆನ್ಸಿಯಾಗಿದ್ದರೆ, ಜಪಾನಿನ ಯೆನ್ (JPY), ದಕ್ಷಿಣ ಕೊರಿಯಾದ ವೋನ್ (KRW), ಚೈನೀಸ್ ಯುವಾನ್ (CNY), ಇಂಡೋನೇಷಿಯನ್ ರುಪಿಯಾ (IDR) ಡಾಲರ್ ಎದುರು ತನ್ನ ಮೌಲ್ಯವನ್ನು ಕಳೆದುಕೊಂಡಿದೆ.
ಆದರೆ ಶ್ರೀಲಂಕಾ(ಶ್ರೀಲಂಕನ್ ರೂಪಾಯಿ), ಬಾಂಗ್ಲಾದೇಶ(ಟಾಕಾ), ಪಾಕಿಸ್ತಾನದ(ಪಾಕಿಸ್ತಾನಿ ರೂಪಾಯಿ) ಕರೆನ್ಸಿಗಳಿಗೂ ಅಧಿಕ ಮೌಲ್ಯವನ್ನು ಭಾರತೀಯ ರೂಪಾಯಿ ಕಳೆದುಕೊಂಡಿದೆ. ಈಗಾಗಲೇ ನೆರೆಯ ಈ ಮೂರು ದೇಶಗಳು ತೀವ್ರ ಆರ್ಥಿಕ ಬಿಕ್ಕಟ್ಟಿಗೆ ಒಳಗಾಗಿದೆ. ಇದೀಗ ಅಂತಾರಾಷ್ಟ್ರೀಯ, ಏಷ್ಯಾ ಮಾರುಕಟ್ಟೆಯಲ್ಲಿ ಭಾರತೀಯ ರೂಪಾಯಿ ಕಳಪೆ ಪ್ರದರ್ಶನವು ಮುಂದೆ ಭಾರತದ ಸ್ಥಿತಿಯೂ ಪಾಕಿಸ್ತಾನ, ಬಾಂಗ್ಲಾ, ಶ್ರೀಲಂಕಾದಂತಾಗುವ ಆತಂಕ ಸೃಷ್ಟಿಸಿದೆ.
ಕಾಂಗ್ರೆಸ್ ನೇತೃತ್ವದ ಯುಪಿಎ ಅವಧಿಯಲ್ಲಿ ಆರಂಭಿಕವಾಗಿ ರೂಪಾಯಿ ವಾಸ್ತವವಾಗಿ ಬಲಗೊಂಡಿತ್ತು. ಆದರೆ 2008ರ ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ಸಂದರ್ಭದಲ್ಲಿ ರೂಪಾಯಿ ಮೌಲ್ಯ 48ಕ್ಕೆ ಇಳಿಯಿತು. 2012-2013ರ ಯುಪಿಎ ಎರಡನೇ ಅವಧಿಯ ಅಂತ್ಯದ ವೇಳೆಗೆ, ವಿಶೇಷವಾಗಿ 2013ರಲ್ಲಿ ರೂಪಾಯಿ ಮೌಲ್ಯ ಅತಿ ಹೆಚ್ಚು ಕುಸಿದು 69ಕ್ಕೆ ತಲುಪಿತ್ತು. ಜಾಗತಿಕ, ದೇಶೀಯ ಆರ್ಥಿಕ ಸ್ಥಿತಿಯಿಂದಾಗಿ ಈ ಬದಲಾವಣೆ ಉಂಟಾಗಿತ್ತು.
ಇದನ್ನೇ ಮುಂದಿಟ್ಟುಕೊಂಡು ಮುಂದಿನ ಚುನಾವಣೆಯಲ್ಲಿ ಕಾಂಗ್ರೆಸ್ ವಿರುದ್ಧ ಬಿಜೆಪಿ ಪ್ರಚಾರವನ್ನು ಮಾಡಿತ್ತು. ಪಾಕಿಸ್ತಾನ, ಶ್ರೀಲಂಕಾ ಅಥವಾ ಬಾಂಗ್ಲಾದೇಶದ ಕರೆನ್ಸಿಗಳಿಗಿಂತ ಭಾರತೀಯ ರೂಪಾಯಿ ವೇಗವಾಗಿ ಕುಸಿಯುತ್ತಿದೆ ಎಂದು ಹೇಳಿದ್ದರು. ನಾವು ಗೆದ್ದರೆ ಒಂದು ಡಾಲರ್ ಮೌಲ್ಯವು 15 ರೂಪಾಯಿಗೆ ಬರಲಿದೆ ಎಂದು ಬಿಜೆಪಿ ನಾಯಕರುಗಳು ಭರವಸೆ ನೀಡಿ ಚುನಾವಣೆಯನ್ನೂ ಗೆದ್ದಿದ್ದರು. ಆದರೆ ಇದೀಗ ಭಾರತೀಯ ರೂಪಾಯಿ ಏಷ್ಯಾದಲ್ಲೇ ಏಷ್ಯಾದಲ್ಲಿಯೇ ಅತಿ ಕಳಪೆ ಪ್ರದರ್ಶನ ತೋರಿರುವ ಕರೆನ್ಸಿಯಾಗಿದ್ದು, ವಿಪಕ್ಷಗಳು ಸರ್ಕಾರವನ್ನು ಟೀಕಿಸುತ್ತಿದೆ.
2025ರ ಅಂತ್ಯದ ವೇಳೆಗೆ, ಭಾರತವು ಜಪಾನ್ ಅನ್ನು ಹಿಂದಿಕ್ಕಿ ವಿಶ್ವದ ನಾಲ್ಕನೇ ಅತಿದೊಡ್ಡ ಆರ್ಥಿಕತೆಯಾಗಿ ಹೊರಹೊಮ್ಮಿದೆ. ಆದರೆ ರೂಪಾಯಿ ಮೌಲ್ಯ ಮಾತ್ರ ತೀವ್ರ ಪ್ರಮಾಣದಲ್ಲಿ ಕುಸಿಯುತ್ತಿರುವುದು ಆರ್ಥಿಕತೆ ದೃಷ್ಟಿಯಿಂದ ಉತ್ತಮ ಸೂಚಕವಲ್ಲ. ಈಗಾಗಲೇ ಭಾರತದ ವ್ಯಾಪಾರ ಕೊರತೆಯು(ಆಮದು ಮೌಲ್ಯ ರಫ್ತು ಮೌಲ್ಯಕ್ಕಿಂತ ಹೆಚ್ಚಾಗಿರುವುದು-Trade Deficit) $41.68 ಬಿಲಿಯನ್‌ನಷ್ಟು ಗರಿಷ್ಠ ಮಟ್ಟಕ್ಕೆ ತಲುಪಿದೆ. ಹೀಗಿರುವಾಗ ರೂಪಾಯಿ ದುರ್ಬಲಗೊಂಡಂತೆ ಆಮದು ಮೌಲ್ಯವೂ ಹೆಚ್ಚಾಗಿ ಕೊರತೆ ಇನ್ನಷ್ಟು ಹೆಚ್ಚಾಗಲಿದೆ.
