ಯುದ್ಧವೆಂದರೆ, ಭೀಕರತೆ ಅಷ್ಟೇ ಅಲ್ಲ, ಅದು ಮುಗ್ಧ ಮನಸ್ಸುಗಳ ಕಲ್ಪನೆಯನ್ನೇ ದಹಿಸಿಬಿಡುತ್ತದೆ ಎನ್ನುವುದಕ್ಕೆ ಗಾಜಾದ ಈ ವಿಡಿಯೋವೆ ಸಾಕ್ಷಿ. ಗಾಜಾದ ನಿರಾಶ್ರಿತರ ಶಿಬಿರವೊಂದರಲ್ಲಿ ಐವರು ಮಕ್ಕಳು ಸೇರಿ ಗೊಂಬೆಯೊಂದರ ಅಂತ್ಯಸಂಸ್ಕಾರದ ಮೆರವಣಿಗೆ ನಡೆಸುತ್ತಿರುವ ದೃಶ್ಯ ಜಗತ್ತಿನ ಕಣ್ಣುಗಳನ್ನು ತೇವಗೊಳಿಸಿದೆ. ಆಡಿ ನಲಿಯಬೇಕಾದ ವಯಸ್ಸಿನಲ್ಲಿ ಈ ಮಕ್ಕಳು ಸಾವನ್ನು ಸಂಭ್ರಮಿಸುವ ಆಟವನ್ನಾಗಿ ಮಾಡಿಕೊಂಡಿರುವುದು ಅಲ್ಲಿನ ಯುದ್ಧದ ಕರಾಳತೆಗೆ ಹಿಡಿದ ಕನ್ನಡಿ.
ಸಾಮಾನ್ಯವಾಗಿ ಮಕ್ಕಳು ಗೊಂಬೆಗಳ ಜೊತೆ ಕಳೆವ ಸಮಯವೇ ಬೇರೆ. ಗೊಂಬೆಗಳನ್ನೇ ತಮ್ಮ ಸಂಗಾತಿಯನ್ನಾಗಿಸಿಕೊಂಡು ಅವುಗಳನ್ನು ಮುದ್ದಾಡಿಕೊಂಡು ತಮ್ಮದೇ ಲೋಕದಲ್ಲಿ ಕಳೆದು ಹೋಗುತ್ತಾರೆ. ಆದರೆ ಗಾಜಾದ ಈ ಮಕ್ಕಳು ಗೊಂಬೆಯನ್ನು ಸ್ಟ್ರೆಚರ್ ಮೇಲೆ ಮಲಗಿಸಿ, ಅದನ್ನು ಹೆಗಲ ಮೇಲೆ ಹೊತ್ತು ಸಾಗುತ್ತಿರುವ ದೃಶ್ಯ ನೋಡಿದರೆ, ನಿಜಕ್ಕೂ ಮನಸ್ಸು ಭಾರ ಅನ್ನಿಸದೇ ಇರುವುದಿಲ್ಲ. ಅಲ್ಲಿರುವುದು ಪುಟ್ಟ ಕೈಗಳು, ಪುಟ್ಟ ಮನಸ್ಸುಗಳು ಮತ್ತು ಮೌನ ಮಾತ್ರ. ತಮಗಿಷ್ಟವಾದ ಆಟಿಕೆಗಳ ಬದಲಿಗೆ ಅಂತ್ಯಸಂಸ್ಕಾರದ ದೃಶ್ಯಗಳನ್ನು ಮಕ್ಕಳು ನಕಲು ಮಾಡುತ್ತಿರುವುದು, ಅವರು ಪ್ರತಿದಿನ ನೋಡುತ್ತಿರುವ ಸಾವು-ನೋವಿನ ತೀವ್ರತೆಯನ್ನು ಎತ್ತಿ ತೋರಿಸುತ್ತಿದೆ. ಅವರ ಪಾಲಿಗೆ ಸಾವು ಎಂಬುದು ಕಲ್ಪನೆಯಲ್ಲ, ಅದು ದಿನನಿತ್ಯದ ಬದುಕಿನ ಭಾಗವಾಗಿಬಿಟ್ಟಿದೆ.
ಬಾಲ್ಯವನ್ನು ಕಸಿದ ಯುದ್ಧ:
ಯುನಿಸೆಫ್ (UNICEF) ವರದಿ ಹೇಳುವ ಪ್ರಕಾರ, ಗಾಜಾದ ಮಕ್ಕಳು ಕೇವಲ ಬಾಂಬ್ ದಾಳಿಯಿಂದ ಅಷ್ಟೇ ಅಲ್ಲದೆ, ತೀವ್ರ ಅಪೌಷ್ಟಿಕತೆ ಮತ್ತು ಮಾನಸಿಕ ಆಘಾತದಿಂದ ನಲುಗುತ್ತಿದ್ದಾರೆ. ಬದುಕಲು ಅಗತ್ಯವಿರುವ ಮೂಲಭೂತ ವ್ಯವಸ್ಥೆಗಳೇ ಧ್ವಂಸಗೊಂಡಿರುವುದರಿಂದ, ಅಲ್ಲಿನ ಮಕ್ಕಳ ಮಾನಸಿಕ ಆರೋಗ್ಯ ತೀವ್ರವಾಗಿ ಹದಗೆಟ್ಟಿದೆ. ಶಾಲೆಗಳ ಮೇಲೆ ನಡೆಯುತ್ತಿರುವ ನಿರಂತರ ದಾಳಿಗಳು ಮಕ್ಕಳ ಶಿಕ್ಷಣವನ್ನು ಕಿತ್ತುಕೊಂಡಿವೆ. ಹಸಿವು ಮತ್ತು ಪೌಷ್ಟಿಕಾಂಶದ ಕೊರತೆಯಿಂದಾಗಿ ಇಡೀ ತಲೆಮಾರು ಜೀವಮಾನವಿಡಿ ಸಾಲು ಸಾಲು ಆರೋಗ್ಯ ಸಮಸ್ಯೆಗಳನ್ನು ಎದುರಿಸುವ ಭೀತಿ ಎದುರಿಸುತ್ತಿದೆ. ಮಕ್ಕಳು ಬಾಲ್ಯದಲ್ಲಿ ಆನಂದಿಸಬೇಕಾದ ಎಲ್ಲಾ ಘಳಿಗೆಗಳನ್ನು ಯುದ್ಧ ನುಂಗಿದೆ. ಮಕ್ಕಳು ಬಾಲ್ಯವನ್ನು ಅನುಭವಿಸದೇ, ಯುದ್ಧದ ಕರಾಳತೆಯನ್ನು ಅನುಭವಿಸುವಂತಾಗಿದೆ ಎನ್ನುವುದಕ್ಕೆ ಇದೊಂದು ಸಾಕ್ಷಿ.
ಇದನ್ನೂ ಓದಿ : Good Friday | ಶುಭವೆನಿತು ಶುಭ ಶುಕ್ರವಾರದಲ್ಲಿ?
ಬೆಚ್ಚಿ ಬೀಳಿಸಿದ ಅಂಕಿ ಅಂಶ
ಅಂಕಿ ಅಂಶಗಳ ಪ್ರಕಾರ, ಅಕ್ಟೋಬರ್ 7, 2023ರಿಂದ ಜನವರಿ 5, 2025ರ ನಡುವೆ ಸುಮಾರು 42,200 ಮಹಿಳೆಯರು, ಮಕ್ಕಳು ಮತ್ತು ವೃದ್ಧರು ಯುದ್ಧಕ್ಕೆ ಬಲಿಯಾಗಿದ್ದಾರೆ. ಇದು ಒಟ್ಟು ಸಾವುಗಳ ಶೇ.56ರಷ್ಟಾಗಿದೆ. ಇತ್ತೀಚಿನ ಸಂಶೋಧನೆಯೊಂದು ಗಾಜಾದಲ್ಲಿ ಜನರ ಸರಾಸರಿ ಜೀವಿತಾವಧಿ ಶೇ.47ರಷ್ಟು ಕುಸಿದಿದೆ ಎಂದು ತಿಳಿಸಿದೆ. ಕದನ ವಿರಾಮ ಜಾರಿಯಲ್ಲಿದ್ದರೂ ಸಹ, ಯುದ್ಧ ಅಲ್ಲಿನ ಮಕ್ಕಳ ಮನಸ್ಸಿನಲ್ಲಿ ಬಿತ್ತಿರುವ ಸಾವಿನ ಭಯ ಮತ್ತು ನೋವು ದಶಕಗಳ ಕಾಲ ಮಾಯದ ಗಾಯವಾಗಿ ಉಳಿಯುವ ಎಲ್ಲಾ ಸಾಧ್ಯತೆಗಳನ್ನು ಚಿತ್ರಿಸುತ್ತಿವೆ ಎನ್ನುವುದರಲ್ಲಿ ಅನುಮಾನವಿಲ್ಲ.
