ಜನರು ಹಂಚಿ ತಿನ್ನಬೇಕೆಂದು ತಿಳಿಸಿದ್ದು ಹಾಗೂ ಸಮಸಮಾಜದ ಕಲ್ಪನೆ ಮೊದಲಿಗೆ ಪ್ರತಿಪಾದಿಸಿದವರಲ್ಲಿ ನಯಸೇನ ಆಚಾರ್ಯರು ಒಬ್ಬರು ಎಂದು ಪ್ರೊ. ಹಾ ಮಾ ನಾಗಾರ್ಜುನ ಅವರು ಅಭಿಪ್ರಾಯಪಟ್ಟರು.
ಜೈನ ಮಿಲನ್(ಸೆಂಟ್ರಲ್ ಬೆಂಗಳೂರು) ಹಾಗೂ ಜಯನಗರದ ಶ್ರೀಚಕ್ರೇಶ್ವರಿ ಮಹಿಳಾ ಸಮಾಜದ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ‘ಜೈನ ಸಾಹಿತ್ಯ ಸಿರಿ’ ಕಾರ್ಯಕ್ರಮದ ತಿಂಗಳ ಉಪನ್ಯಾಸದಲ್ಲಿ ಮಾತನಾಡಿದರು.
“ಜೈನಧರ್ಮಕ್ಕೆ ನಯಸೇನನ ಕಾಲಕ್ಕೆ ಬಂದ ಬಾಹ್ಯ ಆಘಾತಗಳನ್ನು ಎದುರಿಸಲು ಹಾಗೂ ತನ್ನ ಧರ್ಮವನ್ನು ಉಳಿಸಿಕೊಳ್ಳಲು ಅವನು ತನ್ನ ‘ಧರ್ಮಾಮೃತ’ ಕೃತಿಯಲ್ಲಿ ಹೇಳಬೇಕಾದ ಜರೂರು ಇತ್ತು. ಅವರು ಸ್ವಮತದ ಶ್ರೇಷ್ಠತೆ ಹಾಗೂ ತನ್ನ ಕಾಲಘಟ್ಟವಾದ 12ನೇ ಶತಮಾನದಲ್ಲಿ ಬೇರೆ ಮತಗಳು ಹೇಗೆ ವರ್ತಿಸುತ್ತಿದ್ದವು ಎಂಬುದನ್ನು ತನ್ನ ಗ್ರಂಥವಾದ ʼಧರ್ಮಾಮೃತʼದಲ್ಲಿ ಹೇಳುತ್ತಾನೆ. ಲೌಕಿಕವನ್ನು ಜಯಿಸುತ್ತಲೇ ಅಲೌಕಿಕ ಜಗತ್ತಿಗೆ ಸಾಗುವ ಕ್ರಿಯೆಯನ್ನು ನಯಸೇನ ತಿಳಿಸುತ್ತಾನೆ. ಕತೆಗಳನ್ನು ಹೇಳುತ್ತಲೇ ಜನಸಾಮಾನ್ಯರಿಗೆ ಧರ್ಮವನ್ನು ತಿಳಿಸುವ ಪ್ರಯತ್ನ ಮಾಡಿದ್ದಾನೆ. ಜತೆಗೆ ಕಾವ್ಯಗಳನ್ನು ಕೇಳಿಸಿಕೊಂಡರೂ ಸದ್ಗತಿ ಸಿಗುತ್ತದೆಂದು ನಯಸೇನ ತನ್ನ ಗ್ರಂಥದಲ್ಲಿ ತಿಳಿಸುತ್ತಾನೆ” ಎಂದು ಹೇಳಿದರು.
“ಧರ್ಮವನ್ನು ಪ್ರಶ್ನಿಸುವುದಕ್ಕಿಂತ ಪಾಲನೆ ಮಾಡುವುದರಿಂದ ಮಾತ್ರ ಧರ್ಮ ನಮ್ಮದಾಗುತ್ತದೆ. ನಯಸೇನ ದೇಸಿ ನುಡಿಗಟ್ಟನ್ನು ಅತ್ಯಂತ ಸಮರ್ಥವಾಗಿ ಬಳಸಿದ್ದಾನೆ. ಕಥಾಪ್ರಪಂಚಕ್ಕೆ ಮಹತ್ವವಾದ ಕತೆಗಳನ್ನು ಕೊಟ್ಟಂಥವನು ನಯಸೇನ. ಅವನ ಕತೆಗಳು ಮನುಷ್ಯ ಜೀವನ ಪ್ರೀತಿಯನ್ನು ತಿಳಿಸುತ್ತವೆ. ತನ್ನ ಕಾವ್ಯದಲ್ಲಿ ಭೂಮಿಯ ಹದ, ಮಳೆ, ಕೀಟ ಪ್ರಪಂಚವನ್ನು ವಿವರಿಸುತ್ತಾನೆ” ಎಂದು ಡಾ. ಹಾ ಮಾ ನಾಗಾರ್ಜುನ ಪ್ರತಿಪಾದಿಸಿದರು.
ಅಧ್ಯಕ್ಷತೆ ವಹಿಸಿದ್ದ ಕಾರಾಗೃಹ ಇಲಾಖೆಯ ಐಡಿಜಿಪಿ ಜಿನೇಂದ್ರ ಖನಗಾವಿ ಮಾತನಾಡಿ, “ಧಾರ್ಮಿಕ ಸಂಘರ್ಷ ಕಾಲದಲ್ಲಿ ಬಂದ ನಯಸೇನ, ರಾಜಾಶ್ರಯ ಕಳೆದುಕೊಂಡ ಕಾಲದಲ್ಲಿ ಜನಾಶ್ರಯ ಪಡೆಯಲು ಸಾಮಾನ್ಯ ಕತೆಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾನೆ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಇದನ್ನೂ ಓದಿದ್ದೀರಾ? ಗದಗ | ಇವತ್ತಿನ ಸರ್ಕಾರ ಕಾರ್ಪೋರೇಟಗಳ ಉದ್ದಾರಕ್ಕಾಗಿ ಕೆಲಸ ಮಾಡುತ್ತಿದೆ: ಪರಮ ಪೂಜ್ಯ ಪ್ರಭು ಮಹಾಂತ ಸ್ವಾಮಿ
ಸೆಂಟ್ರಲ್ ಜೈನ್ ಮಿಲನ್ ಉಪಾಧ್ಯಕ್ಷೆ ಅರುಣ ಆದಿರಾಜ್ ಹಾಗೂ ಚಕ್ರೇಶ್ವರಿ ಮಹಿಳಾ ಸಮಾಜದ ಅಧ್ಯಕ್ಷೆ ನಾಗಶ್ರೀ ಮುಪ್ಪಾನೆ, ಸಂಚಾಲಕರಾದ ಡಾ.ಪದ್ಮಿನಿ ನಾಗರಾಜು, ಬ್ರಾಹ್ಮಿಲ ಮದನಕುಮಾರ ಇದ್ದರು. ಸೌದಾಮಿನಿ ಅಜಿತ್ ಕಾರ್ಯಕ್ರಮವನ್ನು ನಿರೂಪಣೆ ಮಾಡಿದರು.
