ಪಶ್ಚಿಮ ಏಷ್ಯಾದಲ್ಲಿ ಅಮೆರಿಕ-ಇರಾನ್ ನಡುವೆ ಸಂಘರ್ಷ ಆರಂಭವಾದ ಎರಡು ತಿಂಗಳ ನಂತರ, ಮೊದಲ ಬಾರಿಗೆ ದ್ರವೀಕೃತ ನೈಸರ್ಗಿಕ ಅನಿಲ (LNG) ಹೊತ್ತ ಹಡಗೊಂದು ಪರ್ಷಿಯನ್ ಕೊಲ್ಲಿಯನ್ನು ತೊರೆದು ಹಾರ್ಮುಜ್ ಜಲಸಂಧಿಯ ಮೂಲಕ ಹೊರಬಂದಿದೆ. ಇದು ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಮೂಡಿದ್ದ ಪೂರೈಕೆಯ ಆತಂಕವನ್ನು ಕೊಂಚ ಮಟ್ಟಿಗೆ ಶಮನ ಮಾಡಿದೆ. ಈ ಹಡಗು ಚೀನಾದತ್ತ ಹೊರಟಿದೆ.
‘ಮುಬಾರಜ್’ (Mubaraz) ಹೆಸರಿನ ಹಡಗು, ಮಾರ್ಚ್ ತಿಂಗಳ ಆರಂಭದಲ್ಲಿ ಸಂಯುಕ್ತ ಅರಬ್ ಸಂಸ್ಥಾನದ ಅಬುಧಾಬಿ ನ್ಯಾಷನಲ್ ಆಯಿಲ್ ಕಂ. (Adnoc) ಗೆ ಸೇರಿದ ದಾಸ್ ಐಲ್ಯಾಂಡ್ ಘಟಕದಿಂದ ಅನಿಲವನ್ನು ತುಂಬಿಕೊಂಡಿತ್ತು. ಹಡಗಿನ ಚಲನೆ ಕುರಿತು ಟ್ರ್ಯಾಕಿಂಗ್ ಡೇಟಾಗಳಿಂದ ಮಾಹಿತಿ ಲಭ್ಯವಾಗಿದ್ದು, ಪ್ರಸ್ತುತ ಇದು ಭಾರತದ ದಕ್ಷಿಣ ಭಾಗದ ತುದಿಯಲ್ಲಿ ಚಲಿಸುತ್ತಿದೆ.
ಮಾರ್ಚ್ 31ರ ಸುಮಾರಿಗೆ ಸಿಗ್ನಲ್ ನೀಡುವುದನ್ನು ನಿಲ್ಲಿಸಿದ್ದ ಈ ಹಡಗು, ಏಪ್ರಿಲ್ 27ರಂದು ಭಾರತದ ಪಶ್ಚಿಮ ಭಾಗದಲ್ಲಿ ಮತ್ತೆ ಕಾಣಿಸಿಕೊಂಡಿದೆ. ಡೇಟಾಗಳ ಪ್ರಕಾರ, ಮುಬಾರಜ್ ಹಡಗು ಚೀನಾದ ಒಂದು ಟರ್ಮಿನಲ್ ಕಡೆಗೆ ಚಲಿಸುತ್ತಿದ್ದು, ಮೇ 15ರ ಸುಮಾರಿಗೆ ಅಲ್ಲಿ ತಲುಪುವ ನಿರೀಕ್ಷೆ ಇದೆ.
ಕಳೆದ ಎರಡು ತಿಂಗಳುಗಳಿಂದ ಇರಾನ್ ಮತ್ತು ಅಮೆರಿಕ ನಡುವೆ ನಡೆದಿರುವ ಪರಸ್ಪರ ದಿಗ್ಬಂಧನಗಳಿಂದಾಗಿ, ಹಾರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸುವ ಹಡಗುಗಳ ಸಂಖ್ಯೆ ಬಹುತೇಕ ಶೂನ್ಯಕ್ಕೆ ಕುಸಿದಿತ್ತು. ಜಗತ್ತಿನ ಒಟ್ಟು ಎಲ್‌ಎನ್‌ಜಿ ಪೂರೈಕೆಯಲ್ಲಿ ಐದನೇ ಒಂದು ಭಾಗದಷ್ಟು ಪಾಲನ್ನು ಹೊಂದಿರುವ ಈ ಜಲಸಂಧಿ ಬಂದ್ ಆಗಿದ್ದರಿಂದ, ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಆತಂಕ ಸೃಷ್ಟಿಯಾಗಿ ಅನಿಲದ ಬೆಲೆ ತೀವ್ರವಾಗಿ ಏರಿಕೆಯಾಗಿತ್ತು. ಈಗ ಮುಬಾರಜ್ ಹಡಗು ಹೊರಬಂದಿರುವುದು, ಈ ವಲಯದಿಂದ ಎಲ್‌ಎನ್‌ಜಿ ರಫ್ತು ಹೆಚ್ಚಾಗುವ ಆಶಯವನ್ನು ಚಿಗುರಿಸಿದೆ.
ಇದನ್ನು ಓದಿದ್ದೀರಾ? ಓಮನ್‌ ಬಳಿ 12 ಭಾರತೀಯರಿದ್ದ ಹಡಗಿನ ಮೇಲೆ ಇರಾನ್ ದಾಳಿ; ಎಲ್ಲಾ ಸಿಬ್ಬಂದಿ ಸುರಕ್ಷಿತ
ಆದಾಗ್ಯೂ, ಕೊಲ್ಲಿ ಭಾಗದಲ್ಲಿರುವ ಇತರ ಹಡಗುಗಳು ಇನ್ನು ಅಲ್ಲಿಯೇ ನಿಂತಿರುವ ಲಕ್ಷಣಗಳಿವೆ. ಯುದ್ಧಕ್ಕೂ ಮುನ್ನ, ಪ್ರತಿದಿನ ಸುಮಾರು ಮೂರು ಎಲ್‌ಎನ್‌ಜಿ ತುಂಬಿದ ಹಡಗುಗಳು ಹಾರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸುತ್ತಿದ್ದವು.
ಏಪ್ರಿಲ್ ಆರಂಭದಲ್ಲಿ ಒಂದು ಖಾಲಿ ಎಲ್‌ಎನ್‌ಜಿ ಹಡಗು ಹಾರ್ಮುಜ್ ಜಲಸಂಧಿ ದಾಟಿದ್ದು ಡೇಟಾ ಮೂಲಕ ತಿಳಿದುಬಂದಿತ್ತು. ಆದರೆ, ಇದುವರೆಗೆ ಇಂಧನ ತುಂಬಿದ ಯಾವುದೇ ಹಡಗು ಸಂಚರಿಸಿದ ಬಗ್ಗೆ ಖಚಿತ ಮಾಹಿತಿ ಇರಲಿಲ್ಲ. ಕತಾರ್‌ನ ಎಲ್‌ಎನ್‌ಜಿ ತುಂಬಿದ ಹಲವು ಹಡಗುಗಳು ಜಲಸಂಧಿಯ ಸಮೀಪಕ್ಕೆ ಬಂದರೂ, ಅಮೆರಿಕ ಹಾಗೂ ಇರಾನ್ ನಡುವಿನ ಉದ್ವಿಗ್ನ ಪರಿಸ್ಥಿತಿಯಿಂದ ವಾಪಸ್‌ ತೆರಳಿದ್ದವು.
ಈಗ ಮುಬಾರಜ್ ಹಡಗು ಯಶಸ್ವಿಯಾಗಿ ಚಲನೆ ಮಾಡಿರುವ ಕುರಿತು ಪ್ರತಿಕ್ರಿಯಿಸಿರುವ ಅಡ್ನಾಕ್ ಸಂಸ್ಥೆ, ತನ್ನ ಹಡಗಿನ ಚಲನೆ, ನೆಲೆಸಿರುವ ಸ್ಥಳ ಹಾಗೂ ಮಾರ್ಗದ ಬಗ್ಗೆ ಯಾವುದೇ ಮಾಹಿತಿ ನೀಡಲು ನಿರಾಕರಿಸಿದೆ. ಹಾರ್ಮುಜ್ ದಾಟುವಾಗ ಹಡಗುಗಳು ಶತ್ರುಗಳ ಕಣ್ಗಾವಲಿಗೆ ಒಳಗಾಗದಂತೆ ಟ್ರಾನ್ಸ್‌ಪಾಂಡರ್‌ಗಳನ್ನು ಆಫ್ ಮಾಡುವುದು ಅಥವಾ ಸಿಗ್ನಲ್ ಜಾಮ್ ಮಾಡುವುದು ಸಾಮಾನ್ಯ ತಂತ್ರವಾಗಿದೆ.
