2026-27ನೇ ಶೈಕ್ಷಣಿಕ ಸಾಲಿನ 1ನೇ ತರಗತಿ ಪ್ರವೇಶಾತಿಗೆ ಸಂಬಂಧಿಸಿದಂತೆ ಕನಿಷ್ಠ ವಯೋಮಿತಿ ನಿಯಮದಲ್ಲಿ 60 ದಿನಗಳ ಸಡಿಲಿಕೆಯನ್ನು ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ಗುರುವಾರ ಘೋಷಿಸಿದ್ದಾರೆ ಎಂದು ಡೆಕ್ಕನ್ ಹೆರಾಲ್ಡ್ ವರದಿ ಮಾಡಿದೆ.
ವಿಧಾನಸಭೆಯಲ್ಲಿ ಈ ಕುರಿತು ಹೇಳಿಕೆ ನೀಡಿದ ಸಚಿವರು “ಅಸ್ತಿತ್ವದಲ್ಲಿರುವ ನಿಯಮದ ಪ್ರಕಾರ 2026ರ ಜೂನ್ 1ರ ವೇಳೆಗೆ ಮಗುವಿಗೆ ಕಡ್ಡಾಯವಾಗಿ ಆರು ವರ್ಷ ವಯಸ್ಸಾಗಿರಬೇಕು. ಆದರೆ, ಪೋಷಕರು ಎದುರಿಸುತ್ತಿರುವ ಪ್ರಾಯೋಗಿಕ ತೊಂದರೆಗಳನ್ನು ನಿವಾರಿಸುವ ನಿಟ್ಟಿನಲ್ಲಿ ಸರ್ಕಾರವು ತಾತ್ಕಾಲಿಕವಾಗಿ 60 ದಿನಗಳವರೆಗೆ ವಯೋಮಿತಿ ಸಡಿಲಿಕೆಗೆ ಅವಕಾಶ ನೀಡಲು ನಿರ್ಧರಿಸಿದೆ” ಎಂದು ತಿಳಿಸಿದರು.
ಎಲ್ಕೆಜಿ, ಯುಕೆಜಿಗೂ ಅನ್ವಯ
ಈ ಸಡಿಲಿಕೆಯು ಕೇವಲ 1ನೇ ತರಗತಿ ಪ್ರವೇಶಕ್ಕೆ ಮಾತ್ರ ಸೀಮಿತವಾಗಿರದೆ ಎಲ್ಕೆಜಿ ಮತ್ತು ಯುಕೆಜಿ ಹಂತಗಳಿಗೂ ಅನ್ವಯಿಸುತ್ತದೆ ಎಂದು ಸಚಿವ ಮಧು ಬಂಗಾರಪ್ಪ ಮಾಹಿತಿ ನೀಡಿದರು. ಅಲ್ಲದೆ, ಪೂರ್ವ-ಪ್ರಾಥಮಿಕ ತರಗತಿಗಳ (LKG-UKG) ಪ್ರವೇಶಾತಿಯನ್ನು ಸುಗಮಗೊಳಿಸಲು ಪ್ರತ್ಯೇಕ ಕಾಯ್ದೆ ಅಥವಾ ನಿಯಮಾವಳಿಗಳನ್ನು ಜಾರಿಗೆ ತರುವ ಮೂಲಕ ಸ್ಪಷ್ಟ ನಿಯಂತ್ರಣ ಚೌಕಟ್ಟನ್ನು ರೂಪಿಸಲು ಸರ್ಕಾರ ಸಿದ್ಧತೆ ನಡೆಸುತ್ತಿದೆ ಎಂಬ ಸುಳಿವನ್ನು ಅವರು ನೀಡಿದರು.
ಇದನ್ನು ಓದಿದ್ದೀರಾ? ಬದುಕಿನ ಬಜೆಟ್ ಮೀರಿಸಿದ ಕ್ರಿಕೆಟ್ ಬಂಡವಾಳ: ವಾಸ್ತವ ಮರೆಮಾಚುತ್ತಿರುವ ‘ಸಮೂಹ ಸನ್ನಿ’
ಮಕ್ಕಳು ಈಗಾಗಲೇ ಯುಕೆಜಿ ಮುಗಿಸಿದ್ದರೂ, ಆರು ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿದ್ದರೆ ಆನ್ಲೈನ್ ಪ್ರವೇಶ ವ್ಯವಸ್ಥೆಯು ಅವರ ದಾಖಲಾತಿಯನ್ನು ಸ್ವಯಂಚಾಲಿತವಾಗಿ ನಿರ್ಬಂಧಿಸುತ್ತಿತ್ತು. ಇಲಾಖೆಯು ಈ ಹಿಂದೆ ಹಲವು ಸುತ್ತೋಲೆಗಳನ್ನು ಹೊರಡಿಸಿದ್ದರೂ, ಅನೇಕ ಪೋಷಕರು ತಮ್ಮ ಮಕ್ಕಳನ್ನು ಕಡಿಮೆ ವಯಸ್ಸಿನಲ್ಲೇ ಎಲ್ಕೆಜಿ ಮತ್ತು ಯುಕೆಜಿಗೆ ಸೇರಿಸಿದ್ದರು. ಇದರಿಂದಾಗಿ ಈಗ 1ನೇ ತರಗತಿಗೆ ಪ್ರವೇಶ ಪಡೆಯುವ ಹಂತದಲ್ಲಿ ತಾಂತ್ರಿಕ ತೊಡಕುಗಳು ಉಂಟಾಗಿವೆ ಎಂಬುದನ್ನು ಸಚಿವರು ಸದನದಲ್ಲಿ ಒಪ್ಪಿಕೊಂಡರು.
ವಯೋಮಿತಿಯನ್ನು ಆಗಸ್ಟ್ 31ರವರೆಗೆ, ಅಂದರೆ 90 ದಿನಗಳವರೆಗೆ ಸಡಿಲಿಕೆ ಮಾಡಬೇಕು ಎಂದು ಹಲವು ಪೋಷಕರು ಬೇಡಿಕೆ ಇಟ್ಟಿದ್ದರು. ಈ ಬಗ್ಗೆ ಪ್ರತಿಕ್ರಿಯಿಸಿದ ಸಚಿವರು, “ಸರ್ಕಾರವು ಸದ್ಯಕ್ಕೆ ಕೇವಲ 60 ದಿನಗಳ ಸಡಿಲಿಕೆ ನೀಡಲು ಮಾತ್ರ ನಿರ್ಧರಿಸಿದೆ” ಎಂದು ತಿಳಿಸಿದ್ದಾರೆ.
