ಪ್ರವಾಸಿಗರ ಆಕರ್ಷಣೆಯಾಗಿದ್ದ ಆಲಮಟ್ಟಿಯ ರಸ್ತೆ ಬದಿಯ ಮರಗಳ ಸಾಲಿನಲ್ಲಿ ಒಣಗಿ, ಅಪಾಯಕಾರಿಯಾಗಿದ್ದ 30ಕ್ಕೂ ಅಧಿಕ ಮರಗಳ ತೆರವು ಕಾರ್ಯಾಚರಣೆ ಬುಧವಾರ ಆರಂಭಗೊಂಡಿದೆ.
ಆಲಮಟ್ಟಿ ಅಣೆಕಟ್ಟು ವೃತ್ತದಿಂದ ಲಾಲ್ ಬಹಾದ್ದೂರ್ ಶಾಸ್ತ್ರಿ ಪುತ್ಥಳಿವರೆಗೆ ಸುಮಾರು ಒಂದು ಕಿ.ಮೀ. ಉದ್ದಕ್ಕೂ ಬೆಳೆದು ನಿಂತಿದ್ದ ಮಳೆ ಮರಗಳು ಆಲಮಟ್ಟಿಗೆ ವಿಶೇಷ ಸಸ್ಯಸಂಪತ್ತಿನ ಮೆರುಗು ನೀಡಿದ್ದವು. ದಟ್ಟ ನೆರಳು ಹಾಗೂ ಹಸಿರು ಸೌಂದರ್ಯದ ಮೂಲಕ ಪ್ರವಾಸಿಗರ ಹೃನ್ಮನ ಸೆಳೆಯುತ್ತಿದ್ದ ಈ ಮರಗಳ ಪೈಕಿ ಹಲವು ಮರಗಳು ನಾನಾ ಕಾರಣಗಳಿಂದ ಒಣಗಿ ನಿಂತಿದ್ದವು.
ಆಲಮಟ್ಟಿಗೆ ಹಸಿರಿನ ಸೊಬಗು ನೀಡುವುದರ ಜತೆಗೆ ವೇಗವಾಗಿ ಬೆಳೆದು ಉತ್ತಮ ನೆರಳು ಒದಗಿಸಲಿ ಎಂಬ ಉದ್ದೇಶದಿಂದ 2000ರಿಂದ 2002ರ ಅವಧಿಯಲ್ಲಿ ಅಂದಿನ ಡಿಎಫ್‌ಒ ಕೆ.ಡಿ. ಉದಪುಡಿ ಅವರ ವಿಶೇಷ ಆಸಕ್ತಿಯಿಂದ ನೂರಾರು ಮಳೆ ಮರಗಳನ್ನು ನೆಡಲಾಗಿತ್ತು. ಕಾಲಕ್ರಮೇಣ ಈ ಮರಗಳು ಬೆಳೆದು ಆಲಮಟ್ಟಿಯ ಸೌಂದರ್ಯ ಹೆಚ್ಚಿಸುವುದರೊಂದಿಗೆ ಪ್ರವಾಸಿಗರಿಗೆ ತಂಪಿನ ನೆರಳನ್ನೂ ನೀಡುತ್ತಿದ್ದವು.
ಆದರೆ, ಇತ್ತೀಚಿನ ದಿನಗಳಲ್ಲಿ ಸುಮಾರು 30ಕ್ಕೂ ಅಧಿಕ ಮರಗಳು ವಿವಿಧ ಕಾರಣಗಳಿಂದ ಒಣಗಿದ್ದವು. ಕೆಲವು ಮರಗಳ ಬೇರುಗಳಿಗೆ ಕಲ್ಲು ತಗುಲಿದ್ದರಿಂದ ಹಾನಿಯಾಗಿದ್ದರೆ, ಇನ್ನೂ ಕೆಲವು ಮರಗಳು ಹುಳುಗಳ ಬಾಧೆಯಿಂದ ದುರ್ಬಲಗೊಂಡಿದ್ದವು. ಒಣಗಿದ ಮರಗಳ ರೆಂಬೆ-ಕೊಂಬೆಗಳು ಮುರಿದು ಬೀಳುತ್ತಿದ್ದ ಪರಿಣಾಮ ಸಾರ್ವಜನಿಕರಿಗೆ ಗಾಯಗಳಾಗುವ ಘಟನೆಗಳೂ ನಡೆದಿದ್ದವು. ಹೀಗಾಗಿ ಅಪಾಯಕಾರಿಯಾಗಿರುವ ಮರಗಳನ್ನು ತೆರವುಗೊಳಿಸುವಂತೆ ಮುದ್ದೇಬಿಹಾಳ ಪ್ರಾದೇಶಿಕ ಅರಣ್ಯ ಇಲಾಖೆಗೆ ಪತ್ರ ಬರೆಯಲಾಗಿತ್ತು ಎಂದು ಆಲಮಟ್ಟಿ ಕೆಬಿಜೆಎನ್‌ಎಲ್ ಅರಣ್ಯ ವಿಭಾಗದ ಆರ್‌ಎಫ್‌ಒ ಮಹೇಶ ಪಾಟೀಲ ತಿಳಿಸಿದರು.
ಅಪಾಯ ತಪ್ಪಿಸಲು ಮುಂಜಾಗ್ರತಾ ಕ್ರಮಎಲ್ಲ ಮರಗಳ ಸಮಗ್ರ ಸಮೀಕ್ಷೆ ನಡೆಸಿ ಒಣಗಿದ, ಹುಳು ತಿಂದ ಹಾಗೂ ಸಾರ್ವಜನಿಕರಿಗೆ ಅಪಾಯ ಉಂಟುಮಾಡುವ ಸಾಧ್ಯತೆಯಿರುವ ಮರಗಳನ್ನು ಗುರುತಿಸಲಾಗಿದೆ. ಅವುಗಳ ತೆರವಿಗೆ ಅಗತ್ಯ ಕ್ರಮ ಕೈಗೊಳ್ಳಲಾಗಿದ್ದು, ಕಾರ್ಯಾಚರಣೆ ವೇಳೆ ಸಾರ್ವಜನಿಕರಿಗೆ ಯಾವುದೇ ತೊಂದರೆಯಾಗದಂತೆ ಮುಂಜಾಗ್ರತಾ ಕ್ರಮಗಳನ್ನು ವಹಿಸಲಾಗಿದೆ. ಇನ್ನೂ ಎರಡು-ಮೂರು ದಿನಗಳ ಕಾಲ ತೆರವು ಕಾರ್ಯಾಚರಣೆ ಮುಂದುವರಿಯಲಿದೆ ಎಂದು ಮುದ್ದೇಬಿಹಾಳ ಪ್ರಾದೇಶಿಕ ಅರಣ್ಯ ವಿಭಾಗದ ಆರ್‌ಎಫ್‌ಒ ಬಸನಗೌಡ ಪಾಟೀಲ ತಿಳಿಸಿದರು.
