ರಾಜ್ಯದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯಲ್ಲಿ ಬೆಂಗಳೂರಿಗರಿಗೆ ಭಾರೀ ಆಘಾತ ಎದುರಾಗಿದೆ. ASDDO ಅಡಿಯಲ್ಲಿ ಅಳಿಸಿ ಹೋಗಲಿರುವ ಮತಗಳಲ್ಲಿ ಬೃಹತ್ ಸಂಖ್ಯೆಯ ಮತಗಳು ಬೆಂಗಳೂರಿನವೇ ಆಗಿವೆ ಎಂದು ದತ್ತಾಂಶ ವಿಶ್ಲೇಷಣಾ ವರದಿಗಳು ಹೇಳಿವೆ.
ಕರ್ನಾಟಕದಲ್ಲಿ ಒಟ್ಟು 5.54 ಕೋಟಿ ನೋಂದಾಯಿತ ಮತದಾರರಿದ್ದಾರೆ. ಈ ಪೈಕಿ ಸುಮಾರು ಒಂದು ಕೋಟಿ ಮತದಾರರು ಬೆಂಗಳೂರಿನಲ್ಲೇ ಇದ್ದಾರೆ. ಎಸ್‌ಐಆರ್‌ನಲ್ಲಿ ರಾಜ್ಯಾದ್ಯಂತ ಒಟ್ಟು 84 ಲಕ್ಷ ಮತದಾರರನ್ನು ASDDO ವರ್ಗದಲ್ಲಿ ಗುರುತಿಸಲಾಗಿದೆ. ಇವರಲ್ಲಿ ಸುಮಾರು 36.75 ಲಕ್ಷ ಮತದಾರರು ಬೆಂಗಳೂರಿನವರೇ ಆಗಿದ್ದಾರೆ ಎಂಬುದು ಗಮನಾರ್ಹವೂ, ಆಘಾತಕಾರಿಯೂ ಆಗಿದೆ.
ASDDO ವರ್ಗದಲ್ಲಿ, ಗೈರುಹಾಜರಾದವರು (Absent), ಬೇರೆಡೆಗೆ ಸ್ಥಳಾಂತರಗೊಂಡವರು (Shifted), ಮೃತಪಟ್ಟವರು (Dead), ನಕಲಿ ಹೆಸರು ಹೊಂದಿರುವವರು (Duplicate) ಹಾಗೂ ಇತರ ತಾಂತ್ರಿಕ ಕಾರಣಗಳಿಂದ ಕೈಬಿಡಲಾದವರು (Others) ಸೇರಿರುತ್ತಾರೆ. ಮುಂಬರುವ ಆಗಸ್ಟ್ 17 ರಂದು ಪ್ರಕಟವಾಗಲಿರುವ ಕರಡು ಮತದಾರರ ಪಟ್ಟಿಯಿಂದ ಈ ವರ್ಗದಡಿ ಬರೋಬ್ಬರಿ 84 ಲಕ್ಷ ಮತದಾರರನ್ನು ಹೊರಹಾಕುವ ಸಾಧ್ಯಗಳಿವೆ.
ರಾಜ್ಯದ ಒಟ್ಟು 84 ಲಕ್ಷ ASDDO ಮತದಾರರ ಪೈಕಿ 36.75 ಲಕ್ಷ ಮತದಾರರು ಬೆಂಗಳೂರಿನವರೇ ಆಗಿದ್ದಾರೆ. ಅಂದರೆ, ರಾಜ್ಯದ ಒಟ್ಟು ಪ್ರಕರಣಗಳಲ್ಲಿ 46.7%ರಷ್ಟು ASDDO ಪ್ರಕರಣಗಳು ಬೆಂಗಳೂರಿನಲ್ಲಿಯೇ ದಾಖಲಾಗಿವೆ. ಈ ಪೈಕಿ, ಬೆಂಗಳೂರು ನಗರ ಕ್ಷೇತ್ರದಲ್ಲಿ 13.55 ಲಕ್ಷ, ದಕ್ಷಿಣದಲ್ಲಿ 9.35 ಲಕ್ಷ, ಉತ್ತರದಲ್ಲಿ 9 ಲಕ್ಷ ಹಾಗೂ ಕೇಂದ್ರ ಕ್ಷೇತ್ರದಲ್ಲಿ 7.40 ಲಕ್ಷ ಮತದಾರರ ಹೆಸರುಗಳು ಅಳಿಸಿಹೋಗುವ ಅಪಾಯಗಳಿವೆ.
ಮುಖ್ಯವಾಗಿ, ಬೆಂಗಳೂರಿನಲ್ಲಿ ASDDO ವರ್ಗದಲ್ಲಿ ಇಷ್ಟೊಂದು ಪ್ರಕರಣಗಳು ದಾಖಲಾಗಲು ಪ್ರಮುಖ ಕಾರಣ; 2002ರ ಹಳೆಯ ಮತದಾರರ ದಾಖಲೆಗಳು ಪತ್ತೆಯಾಗದೇ ಇರುವುದು ಎನ್ನಲಾಗಿದೆ. ವಿಶೇಷವಾಗಿ, 2008ರಲ್ಲಿ ನಡೆದ ವಿಧಾನಸಭಾ ಕ್ಷೇತ್ರಗಳ ಪುನರ್‌ವಿಂಗಡಣೆಯಿಂದಾಗಿ ಮತಗಟ್ಟೆಗಳು ಮತ್ತು ಕ್ಷೇತ್ರಗಳ ಗಡಿಗಳು ಬದಲಾಗಿವೆ. ಹೀಗಾಗಿ ತಾಂತ್ರಿಕವಾಗಿ ಹಳೆಯ ದತ್ತಾಂಶಗಳನ್ನು ಪ್ರಸ್ತುತ ಮಾಹಿತಿಯೊಂದಿಗೆ ಮ್ಯಾಪ್ ಮಾಡಲು ಬಿಎಲ್‌ಒಗಳಿಗೆ ಕಷ್ಟವಾಗಿದೆ. ಜೊತೆಗೆ, ಮಹದೇವಪುರ ಸೇರಿದಂತೆ ಹಲವು ಕ್ಷೇತ್ರಗಳ ಕೆಲವು ಬೂತ್‌ಗಳಲ್ಲಿನ 2002ರ ಮತಪಟ್ಟಿಯ ವಿವರವನ್ನು ಚುನಾವಣಾ ಆಯೋಗವು ವೆಬ್‌ಸೈಡ್‌ನಲ್ಲಿಯೂ, ಬಿಎಲ್‌ಒಗಳಿಗೂ ಒದಗಿಸಿಲ್ಲ ಎಂದು ಹೇಳಲಾಗಿದೆ. ಆಯೋಗದ ಎಡವಟ್ಟಿನಿಂದ ಈಗ ಭಾರೀ ಪ್ರಮಾಣದ ಮತದಾರರು ತಮ್ಮ ಹೆಸರುಗಳನ್ನು ಕಳೆದುಕೊಳ್ಳುವ ಅಪಾಯವಿದೆ.
ಇದಲ್ಲದೆ, ತಾಂತ್ರಿಕ ವ್ಯತ್ಯಾಸ ಹಾಗೂ ಮ್ಯಾಪಿಂಗ್ ದೋಷಗಳ ಕಾರಣದಿಂದಾಗಿ ರಾಜ್ಯಾದ್ಯಂತ ಒಟ್ಟು 2 ಕೋಟಿ ಮತದಾರರ ಹೆಸರುಗಳನ್ನು ಆಯೋಗವು ಅಳಿಸಿ ಹಾಕುವ ಅಪಾಯವಿದೆ.
