ಸಬ್ಸಿಡಿ ಲೋನ್ ಮಾಡಿಸಿಕೊಡುತ್ತೇವೆ ಎಂದು ಆಮಿಷ ತೋರಿಸಿ ಗ್ರಾಹಕರ ಆಧಾರ್, ಫೋಟೋ ಮತ್ತು ಸಹಿ ಬಳಸಿ ಲಕ್ಷಾಂತರ ರೂಪಾಯಿ ವಂಚನೆ ಮಾಡಿದ ಘಟನೆ ಬೆಳಕಿಗೆ ಬಂದಿದೆ. ಹೊಸಕೋಟೆ ಸೇರಿದಂತೆ ವಿವಿಧ ಪ್ರದೇಶಗಳ ಗ್ರಾಹಕರನ್ನು ಮೋಸಗೊಳಿಸಿದ್ದು, ಆರೋಪಿ ಶ್ವೇತಾ ವಿರುದ್ಧ ಹೊಸಕೋಟೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಸಂಘದ ಹೆಸರಿನಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಆರೋಪಿ ಶ್ವೇತಾ, ಮೊದಲು ಗ್ರಾಹಕರಿಗೆ ಬ್ಯಾಂಕ್ ಖಾತೆ ತೆರೆಯಿಸಿ ಪ್ರತಿ ಗ್ರಾಹಕರಿಗೆ 20 ಸಾವಿರ ರೂಪಾಯಿ ಲೋನ್ ಮಂಜೂರು ಮಾಡಿಸುತ್ತಿದ್ದರು. “ಈ 20 ಸಾವಿರವನ್ನು ನಾಲ್ಕು ಕಂತುಗಳಲ್ಲಿ ತೀರಿಸಿದರೆ 1 ಲಕ್ಷ ರೂಪಾಯಿ ಸಬ್ಸಿಡಿ ಲೋನ್ ಮಾಡಿಸಿಕೊಡುತ್ತೇವೆ” ಎಂದು ಆಮಿಷ ತೋರಿಸುತ್ತಿದ್ದರು.
ನಂತರ 1 ಲಕ್ಷ ಲೋನ್‌ಗಾಗಿ ಮತ್ತೆ ಫೋಟೋ ಹಾಗೂ ಆಧಾರ್ ಕಾರ್ಡ್ ಪಡೆದುಕೊಂಡು, ಗ್ರಾಹಕರಿಗೆ ತಿಳಿಸದೆಯೇ ಅವರ ಹೆಸರಿನಲ್ಲಿ ಬ್ಯಾಂಕ್‌ಗಳಲ್ಲಿ ಲೋನ್ ಅರ್ಜಿ ಸಲ್ಲಿಸಿ, ಗ್ರಾಹಕರ ಆಧಾರ್ ಮತ್ತು ಫೋಟೋಗಳನ್ನು ದುರ್ಬಳಕೆ ಮಾಡಿ ಪ್ರತಿ ಗ್ರಾಹಕರ ಹೆಸರಿನಲ್ಲಿಯೇ ಲಕ್ಷಾಂತರ ರೂಪಾಯಿ ಲೋನ್ ಪಡೆಯಲಾಗಿತ್ತು.
ಈ ವಂಚನೆ ಬೆಳಕಿಗೆ ಬಂದಿದ್ದು ಒಬ್ಬ ಗ್ರಾಹಕರಿಗೆ. ಅವರು ಮಕ್ಕಳ ಶಿಕ್ಷಣ ಲೋನ್‌ಗಾಗಿ ಬ್ಯಾಂಕ್‌ಗೆ ಹೋದಾಗ, “ನಿಮ್ಮ ಹೆಸರಿನಲ್ಲಿ ಈಗಾಗಲೇ ಲೋನ್ ಇದೆ. ಹಾಗಾಗಿ ಹೊಸ ಲೋನ್ ಕೊಡಲು ಸಾಧ್ಯವಿಲ್ಲ” ಎಂದು ಬ್ಯಾಂಕ್ ಸಿಬ್ಬಂದಿ ತಿಳಿಸಿದರು. ಆಶ್ಚರ್ಯಚಕಿತರಾದ ಗ್ರಾಹಕರು ದಾಖಲೆಗಳನ್ನು ಪರಿಶೀಲಿಸಿದಾಗ ವಂಚನೆ ನಡೆದಿರುವುದು ಅರಿವಿಗೆ ಬಂದಿದೆ.
ವಂಚನೆ ಬಹಿರಂಗವಾದ ನಂತರ ಮೋಸ ಹೋದ ಗ್ರಾಹಕರು ಆರೋಪಿ ಶ್ವೇತಾ ವಿರುದ್ಧ ಪ್ರತಿಭಟನೆ ನಡೆಸಿದರು. ಗ್ರಾಹಕರು ಕರೆ ಮಾಡಿ ವಿಚಾರಿಸಿದಾಗ ಆರೋಪಿ ಧಮಕಿ ಹಾಕುತ್ತಿದ್ದರು ಎಂದು ಆರೋಪಿಸಲಾಗಿದೆ. ಹೊಸಕೋಟೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದ ಈ ಘಟನೆಯ ಬಗ್ಗೆ ದೂರು ದಾಖಲಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಎಚ್ಚರಿಕೆ: ಯಾರಾದರೂ ಸಬ್ಸಿಡಿ ಲೋನ್ ಮಾಡಿಸಿಕೊಡುತ್ತೇವೆ ಎಂದು ಹೇಳಿ ಆಧಾರ್, ಫೋಟೋ ಅಥವಾ ಸಹಿ ಕೇಳಿದರೆ ಎಚ್ಚರಿಕೆಯಿಂದಿರಿ. ಅನುಮಾನ ಬಂದರೆ ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿ.
