ಗೌತಮ ಬುದ್ಧ ಕೇವಲ ಒಬ್ಬ ವ್ಯಕ್ತಿಯಾಗಿರದೆ ಅಪಾರವಾದ ಜ್ಞಾನ, ಕರುಣೆ ಮತ್ತು ವಿವೇಕದ ಸಾಕಾರಮೂರ್ತಿ ಆಗಿದ್ದರೂ ಎಂದು ಹಿರೇಮಠದ ಪೀಠಾಧಿಪತಿ ಗುರುಬಸವ ಪಟ್ಟದ್ದೇವರು ಹೇಳಿದರು.
ಭಾಲ್ಕಿ ಪಟ್ಟಣದ ಹಿರೇಮಠ ಸಂಸ್ಥಾನದಲ್ಲಿ ಹಮ್ಮಿಕೊಂಡಿದ್ದ 498ನೇ ಮಾಸಿಕ ಶಿವಾನುಭವಗೋಷ್ಠಿ, ಭಗವಾನ್ ಬುದ್ಧ ಜಯಂತಿ ಹಾಗೂ ಶಿವನಾಗಮಯ್ಯ ಸ್ಮರಣೋತ್ಸವ ಕಾರ್ಯಕ್ರಮದ ದಿವ್ಯ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು.
”ಬುದ್ಧರ ಬೋಧನೆಗಳು ಶತಮಾನಗಳಿಂದಲೂ ಮನುಕುಲಕ್ಕೆ ಶಾಂತಿಯ ಮಾರ್ಗದರ್ಶನ ನೀಡುತ್ತಾ ಬಂದಿವೆ. ಬೋಧಗಯಾದಲ್ಲಿನ ಬೋಧಿ ವೃಕ್ಷದ ಕೆಳಗೆ ಜೀವನದ ಪರಮ ಸತ್ಯವನ್ನು ಸಾಕ್ಷಾತ್ಕರಿಸಿಕೊಂಡವರು ಬುದ್ಧ. ಬುದ್ಧ ಎಂಬ ಪದದ ಅರ್ಥವೇ ಜಾಗೃತಗೊಂಡವನು ಅಥವಾ ಅರಿವು ಮೂಡಿದವನು” ಎಂದು ತಿಳಿಸಿದರು.
“ಜೀವನದಲ್ಲಿ ಸಮತೋಲನ, ಸದಾಚಾರ ಮತ್ತು ಬುದ್ಧಿವಂತಿಕೆಯನ್ನು ಅಳವಡಿಸಿಕೊಳ್ಳಲು ಅವರು ಸಮ್ಯಕ್ ದೃಷ್ಟಿ, ಸಂಕಲ್ಪ, ಮಾತು, ಕರ್ಮ, ಜೀವನ, ವ್ಯಾಯಾಮ, ಸ್ಮೃತಿ, ಸಮಾಧಿ ಮಾರ್ಗಗಳನ್ನು ತೋರಿದ್ದರು” ಎಂದು ಹೇಳಿದರು.
ದಿವ್ಯ ಸಮ್ಮುಖ ವಹಿಸಿದ್ದ ಭಂತೇ ಕಶಪ್ ಮಾತನಾಡಿ, ʼಸಾರನಾಥದಲ್ಲಿ ಬುದ್ಧರು ನೀಡಿದ ಅವರ ಮೊದಲ ಬೋಧನೆಯಿಂದ ಹಿಡಿದು, ಜೀವನದ ಕೊನೆಯವರೆಗೂ ಜನರಿಗೆ ಜ್ಞಾನದ ಬೆಳಕನ್ನು ಹರಡಿದ್ದರು. ಅವರ ಬೋಧನೆಗಳು ಸರಳವಾಗಿದ್ದರೂ, ಆಳವಾದ ಅರ್ಥವನ್ನು ಒಳಗೊಂಡಿವೆ. ಇಂದು ನೆಮ್ಮದಿಯಿಂದ ಬದುಕಲು ಪ್ರತಿಯೊಬ್ಬರು ಅವರು ತೋರಿದ ಮಾರ್ಗದಲ್ಲಿ ನಡೆಯುವುದು ತುಂಬಾ ಅತ್ಯಗತ್ಯʼ ಎಂದು ತಿಳಿಸಿದರು.
ಇದನ್ನೂ ಓದಿ : ಬೀದರ್‌ | ವಿಶ್ವ ಕಾರ್ಮಿಕ ದಿನ : ವಿಚಾರಗೋಷ್ಠಿ, ಕಾರ್ಮಿಕರಿಗೆ ಸನ್ಮಾನ
ಭಾರತೀಯ ಬೌದ್ಧ ಮಹಾಸಭಾ ಅಧ್ಯಕ್ಷ ವಿಶ್ವನಾಥ ಮೋರೆ, ವಚನ ಸಾಹಿತ್ಯ ಪರಿಷತ್ ಅಧ್ಯಕ್ಷ ಗುಂಡಪ್ಪ ಸಂಗಮಕರ್, ಎಪಿಎಂಸಿ ಮಾಜಿ ಅಧ್ಯಕ್ಷ ಶಿವಕುಮಾರ ಮೇತ್ರೆ, ಪ್ರಮುಖರಾದ ಕೈಲಾಸ ಭಾವಿಕಟ್ಟೆ, ಡಿ.ಡಿ. ಶಿಂಧೆ, ಮಹಾಂತೇಶ ಗವಾಯಿ, ದೀಪಕ ಠಮಕೆ ಮತ್ತಿತರರಿದ್ದರು.
