ಬೀದರ್ ಜಿಲ್ಲೆಯ ಹಲವೆಡೆ ಮಂಗಳವಾರ ಸಂಜೆ ಗುಡುಗು, ಮಿಂಚು, ಬಿರುಗಾಳಿ ಸಹಿತ ಭಾರೀ ಮಳೆಯಾದ ಪರಿಣಾಮ ನಾನಾ ಅವಾಂತರಗಳು ಸೃಷ್ಟಿಯಾಗಿ ಜನಜೀವನ ಅಸ್ತವ್ಯಸ್ತಗೊಂಡಿದೆ.
ಬೀದರ್, ಔರಾದ್‌, ಭಾಲ್ಕಿ, ಕಮಲನಗರ ಸೇರಿದಂತೆ ವಿವಿಧೆಡೆ ಮಂಗಳವಾರ ಸಂಜೆ ಗುಡುಗು, ಬಿರುಗಾಳಿ ಸಹಿತ ಧಾರಾಕಾರ ಮಳೆ ಸುರಿದಿದೆ. ಕೆಲವೆಡೆ ಗಿಡ-ಮರಗಳು ಹಾಗೂ ವಿದ್ಯುತ್ ಕಂಬಗಳು ಧರೆಗುರುಳಿದ್ದು, ಬಿರುಗಾಳಿಗೆ ಮನೆಯ ಮೇಲಿನ ತಗಡಿನ ಶೀಟುಗಳು ಹಾರಿ ಹೋಗಿ ಗೋಡೆಗಳು ಜಖಂಗೊಂಡಿವೆ.
ಔರಾದ್‌ ತಾಲೂಕಿನ ಗಡಿಕುಶನೂರ ಗ್ರಾಮದಲ್ಲಿ ಬಿರುಗಾಳಿಗೆ ಬೃಹತ್ ಗಾತ್ರದ ಮರವೊಂದು ಧರೆಗುರುಳಿದ ಪರಿಣಾಮ ಹುಸೇನ್ ಸಾಬ್ ಚಾಂದಸಬ್ ಎಂಬುವವರಿಗೆ ಸೇರಿದ ಒಂದು ಎತ್ತು ಮೃತಪಟ್ಟಿದೆ. ಕೌಠಾ(ಬಿ), ಮರಖಲ್‌, ಭಾಲ್ಕಿಯಲ್ಲಿ ಮನೆಗಳ ಮೇಲಿನ ತಗಡಿನ ಶೀಟುಗಳು ಹಾರಿಹೋಗಿ ಮಳೆ ನೀರಿನಿಂದ ಮನೆಯಲ್ಲಿರುವ ದವಸ ಧಾನ್ಯ ಸೇರಿದಂತೆ ಮನೆಯಲ್ಲಿರುವ ವಸ್ತುಗಳು ಹಾನಿಯಾದವು.
ಬೇಸಿಗೆ ಬಿಸಿಲಿನ ಧಗೆಯಿಂದ ವಾಹನ ಸವಾರರಿಗೆ ರಕ್ಷಣೆಗಾಗಿ ಬೀದರ್ ನಗರದ ಅಂಬೇಡ್ಕರ್‌ ವೃತ್ತದ ಸಮೀಪದ ಟ್ರಾಫಿಕ್‌ ಸಿಗ್ನಲ್‌ನಲ್ಲಿ ಈಚೆಗೆ ಅಳವಡಿಸಲಾದ ಹಸಿರು ನೆರಳಿನ ಪರದೆಯೊಂದು ಬಿರುಗಾಳಿಗೆ ಹಾರಿದ್ದು, ನೆಲದಲ್ಲಿ ಹೂಳಲಾದ ಕಬ್ಬಿಣದ ಪೈಪ್‌ಗಳು ಕಿತ್ತುಬಂದಿವೆ.
ಬೀದರ್-ಹುಮನಾಬಾದ್‌ ಹೆದ್ದಾರಿಯಲ್ಲಿ ಕೋಳಾರ ಸಮೀಪದಲ್ಲಿ ಅಳವಡಿಸಲಾದ ಸ್ವಾಗತ ಕಮಾನ್ ನೆಲಕ್ಕುರುಳಿದೆ. ಅಣದೂರ ರಸ್ತೆಯಲ್ಲಿ ವಿದ್ಯುತ್ ಟಿಸಿಯೊಂದಿಗೆ ಗಾಳಿಯ ರಭಸಕ್ಕೆ ನೆಲಕ್ಕುರುಳಿತು, ಬೃಹತ್ ಆಕಾರದ ಮರಗಳು ರಸ್ತೆ ಮೇಲೆ ಉರುಳಿದಕ್ಕೆ ಕೆಲವೊತ್ತು ವಾಹನ ಸಂಚಾರಕ್ಕೆ ಅಡ್ಡಿಯಾಯಿತು.
ಮನೆ ಗೋಡೆ ಕುಸಿತ : ಮಕ್ಕಳಿಗೆ ಗಂಭೀರ ಗಾಯ
ಬೀದರ್ ತಾಲೂಕಿನ ಕಮಠಣಾ ಗ್ರಾಮದ ಮಾಂಗ್‌ ಗಾರುಡಿ (ಅಲೆಮಾರಿ) ಸಮುದಾಯದ ಕಾಲೋನಿಯಲ್ಲಿ ಭಾರಿ ಮಳೆ, ಬಿರುಗಾಳಿಗೆ ಮನೆಯ ಗೋಡೆ ಕುಸಿದು ಮೂರು ಕುಟುಂಬಗಳ ನಾಲ್ಕೈದು ಪುಟ್ಟಮಕ್ಕಳಿಗೆ, ಪೋಷಕರಿಗೆ, ವೃದ್ಧರಿಗೆ ಗಾಯಗಳಾಗಿವೆ. ಸಾಮಾಜಿಕ ಕಾರ್ಯಕರ್ತೆ ಲಕ್ಷ್ಮೀ ಬಾವಗೆ ಹಾಗೂ ಸ್ಥಳೀಯರು ಕೂಡಲೇ ಅಂಬುಲೆನ್ಸ್‌ ಮುಖಾಂತರ ಬೀದರ್ ಬ್ರಿಮ್ಸ್‌ ಆಸ್ಪತ್ರೆಗೆ ಕೊಂಡೊಯ್ದು ಚಿಕಿತ್ಸೆ ಕೊಡಿಸಿದ್ದಾರೆ.
ಬೀದರ್ ತಹಸೀಲ್ದಾರ್‌ ರವೀಂದ್ರ ದಾಮಾ ಅವರು ಕಮಠಣಾದ ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ ಎನ್ನಲಾಗಿದೆ. ಪುಟ್ಟ ಮಕ್ಕಳ ಹಾಗೂ ಅವರ ಪೋಷಕರ ತಲೆ, ಕೈಕಾಲಿಗೆ ಪೆಟ್ಟಾಗಿದ್ದು, ಚಿಕಿತ್ಸೆ ನೀಡಲಾಗಿದೆ ಎಂದು ತಿಳಿದುಬಂದಿದೆ.
ಇದನ್ನೂ ಓದಿ : ಬೀದರ್ | ಬಿಸಿಲಿನ ಧಗೆಯ ನಡುವೆ ಮಳೆಯ ಸಿಂಚನ
ಕ್ರಿಕೆಟ್ ಆಡುವಾಗ ಬಿರುಗಾಳಿ, ಮಳೆ ಆರಂಭವಾದ ಹಿನ್ನೆಲೆ ಮರದ ಕೆಳಗೆ ಆಶ್ರಯ ಪಡೆದಿದ್ದ ವೇಳೆ ಸಿಡಿಲು ಅಪ್ಪಳಿಸಿದ ಪರಿಣಾಮ ದೂರದಲ್ಲಿದ್ದ ಯುವಕನೊಬ್ಬ ಹಾರಿ ಬಿದ್ದು, ಗಂಭೀರ ಗಾಯಗೊಂಡ ಘಟನೆ ಭಾಲ್ಕಿ ಪಟ್ಟಣದಲ್ಲಿ ನಡೆದಿರುವುದು ತಿಳಿದುಬಂದಿದೆ, ಸದ್ಯ ಬ್ರಿಮ್ಸ್‌ನಲ್ಲಿ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
