ಸರ್ವೋಚ್ಚ ನ್ಯಾಯಾಲಯದ ಮುಖ್ಯ ನ್ಯಾಯಮೂರ್ತಿ ಬಿ. ಆರ್. ಗವಾಯಿ ಅವರ ಮೇಲೆ ವಕೀಲ ಶೂ ಎಸೆದ ಘಟನೆ ಹಿನ್ನಲೆಯಲ್ಲಿ ಪ್ರಗತಿಪರ ಸಂಘಟನೆಗಳು ಕರೆ ನೀಡಿದ್ದ ಚಾಮರಾಜನಗರ ಬಂದ್ ಗೆ, ವಾಣಿಜ್ಯ ಚಟುವಟಿಕೆಗಳು, ಅಂಗಡಿ ಮುಂಗಟ್ಟು ಮುಚ್ಚಿ ಬೆಂಬಲ ನೀಡುವುದರ ಮೂಲಕ ಭಾಗಶಃ ಯಶಸ್ವಿಯಾಯಿತು.
ಚಾಮರಾಜನಗರದ ದೊಡ್ಡ ಅಂಗಡಿ ಬೀದಿ, ಸೋಮವಾರ ಪೇಟೆ ಬೀದಿ, ರಥದ ಬೀದಿ, ತರಕಾರಿ ಮಾರುಕಟ್ಟೆ, ಸಂತೆಮರಳ್ಳಿ ಸರ್ಕಲ್, ಎಲ್ ಐ ಸಿ ವೃತ್ತ, ಬಚ್ಚಪ್ಪ ವೃತ್ತ, ಬಿ ರಾಚಯ್ಯ ಜೋಡಿ ರಸ್ತೆ ಸ್ಥಬ್ದವಾಗಿತ್ತು. ದಿನವಿಡೀ ಗಿಜಿಗುಡುವ ರಸ್ತೆಗಳು ಬಂದ್ ನಿಂದ ಬಿಕೋ ಎನ್ನುವಂತಿತ್ತು.
ಕೆಲವು ಖಾಸಗಿ ಶಾಲೆಗಳು ರಜೆ ನೀಡಿದ್ದು ಹೊರತಾಗಿ ರಾಷ್ಟ್ರೀಕೃತ ಬ್ಯಾಂಕ್, ಮೆಡಿಕಲ್ ಶಾಪ್, ಸರ್ಕಾರಿ ಕಚೇರಿ, ಅಗತ್ಯ ಸೇವೆಗಳು ಸಾರ್ವಜನಿಕರಿಗೆ ಎಂದಿನಂತೆ ಲಭ್ಯವಿತ್ತು. ಭುವನೇಶ್ವರಿ ವೃತ್ತದಲ್ಲಿ ದಲಿತ ಸಂಘಟನೆಗಳು, ಪ್ರಗತಿಪರ ಸಂಘಟನೆಗಳು, ಸಂವಿಧಾನ ಸಂರಕ್ಷಣ ಸಮಿತಿ, ಕಾಂಗ್ರೆಸ್, ಬಿಎಸ್ಪಿ, ಎಸ್ಡಿಪಿಐ ಸೇರಿದಂತೆ ನೂರಾರು ಕಾರ್ಯಕರ್ತರು ಜಮಾಯಿಸಿ ಘೋಷಣೆ ಕೂಗಿದರು.
ಪ್ರತಿಭಟನೆಯನ್ನುದ್ದೇಶಿಸಿ ಮೈಸೂರಿನ ಉರಿಲಿಂಗ ಪೆದ್ದಿ ಮಠದ ಜ್ಞಾನಪ್ರಕಾಶ ಸ್ವಾಮೀಜಿ ಮಾತನಾಡಿ,”ಶೋಷಿತ ಸಮುದಾಯಗಳು, ದಲಿತರು ಬಾಬಾ ಸಾಹೇಬ್ ಅಂಬೇಡ್ಕರ್ ನೀಡಿರುವ ಸಂವಿಧಾನದಲ್ಲಿ ಬದುಕುತ್ತಿರುವವರು. ಸಮಾಜದಲ್ಲಿ ಸ್ಥಾನಮಾನ ಗಳಿಸಿ ಸರಿ ಸಮಾನಾಗಿ ನಿಲ್ಲಲೂ ಸಂವಿಧಾನವೇ ಕಾರಣ. ಇದನ್ನ ಸಹಿಸಲಾಗದ ಮನುವಾದಿಗಳು ನೀಚತನ ಪ್ರದರ್ಶಿಸುತ್ತಿದ್ದಾರೆ. ನ್ಯಾಯಮೂರ್ತಿಗಳು ದಲಿತರೆನ್ನುವ ಕಾರಣಕ್ಕೆ ಮನುವಾದಿ ವಕೀಲ ಶೂ ಎಸೆತಕ್ಕೆ ಮುಂದಾಗಿದ್ದು ದೇಶ ದ್ರೋಹದ ಕೆಲಸವೇ ಸರಿ. ಇಂತಹ ನಾಗಪುರದ ವಿಷ ಜಂತುಗಳಿಗೆ ಬುದ್ಧಿ ಕಲಿಸಬೇಕಿದೆ. ಧರ್ಮದ ಹೆಸರಿನಲ್ಲಿ ಸದಾ ದ್ವೇಷ ಕಾರುವ ಸಂವಿಧಾನ ವಿರೋಧಿಗಳ ಹೆಡೆಮುರಿ ಕಟ್ಟಬೇಕಿದೆ ” ಎಂದರು.
ಕೊಳ್ಳೆಗಾಲ ಶಾಸಕ ಎ. ಆರ್. ಕೃಷ್ಣಮೂರ್ತಿ ಮಾತನಾಡಿ, “ಮುಖ್ಯ ನ್ಯಾಯಮೂರ್ತಿಗಳ ಮೇಲೆ ಶೂ ಎಸೆತ ಭಾರತ ದೇಶಕ್ಕೆ ಮಾಡಿದ ಅಪಮಾನ. ದೇಶದ್ರೋಹದ ಕೆಲಸ ಮಾಡಿರುವ ವಕೀಲನನ್ನು ದೇಶದಿಂದಲೇ ಗಡಿಪಾರು ಮಾಡಬೇಕು. ಕಾನೂನು ರೀತ್ಯಾ ಮರಣ ದಂಡನೆ ಶಿಕ್ಷೆಗೆ ಗುರಿಪಡಿಸಬೇಕು” ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಶಾಸಕ ಸಿ. ಪುಟ್ಟರಂಗಶೆಟ್ಟಿ ಮಾತನಾಡಿ, “ಸನಾತನಿಗಳು ಸಂವಿಧಾನದ ಮೇಲಸ್ಟೇ ಅಲ್ಲದೇ, ನ್ಯಾಯಾಂಗದ ಮೇಲೂ ದೌರ್ಜನ್ಯ ಎಸಗುವ ಮೂಲಕ ಕೀಳುಮಟ್ಟಕ್ಕೆ ಇಳಿದಿದ್ದಾರೆ. ಇಂತಹ ದೇಶದ್ರೋಹಿ ರಾಕೇಶ್ ಕಿಶೋರ್ ನನ್ನು ಕೂಡಲೇ ಗಡಿಪಾರು ಮಾಡಬೇಕು, ಅದುವರೆಗೂ ಹೋರಾಟ ಮುಂದುವರಿಯಲಿದೆ” ಎಂದರು.
ಈ ಸುದ್ದಿ ಓದಿದ್ದೀರಾ?ಮೈಸೂರು | ರೈತನ ಮೇಲೆ ದಾಳಿ ನಡೆಸಿದ್ದ ಹುಲಿ ಸೆರೆ
ಪ್ರತಿಭಟನೆಯಲ್ಲಿ ಜಿಲ್ಲಾ ಪಂಚಾಯತ್ ಮಾಜಿ ಉಪಾಧ್ಯಕ್ಷ ಅಯ್ಯನಪುರ ಶಿವಕುಮಾರ್, ಜಿಲ್ಲಾ ಗ್ಯಾರೆಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಪ್ರಾಧಿಕಾರದ ಜಿಲ್ಲಾಧ್ಯಕ್ಷ ಹೆಚ್. ವಿ. ಚಂದ್ರು, ಕಾಡಾ ಅಧ್ಯಕ್ಷ ಪಿ. ಮರಿಸ್ವಾಮಿ, ರಾಮಸಮುದ್ರ ಪುಟ್ಟಸ್ವಾಮಿ, ಪುರುಷೋತ್ತಮ, ಪ್ರಸನ್ನ ಕುಮಾರ್, ಉಮೇಶ್, ಶ್ರೀನಿವಾಸ ನಾಯಕ, ಸಂಘಸೇನಾ, ಅಬ್ರಾರ್ ಅಹಮದ್, ಗಾಳಿಪುರ ಮಹೇಶ್, ಸೋಮನಾಯಕ, ಬಿ.ಕೆ. ರವಿಕುಮಾರ್, ದೊಡ್ಡಿಂದುವಾಡಿ ಸಿದ್ದರಾಜು, ಬಾ. ಮ. ಕೃಷ್ಣಮೂರ್ತಿ, ಎನ್. ನಾಗಯ್ಯ, ಸಿ. ಎಂ. ಶಿವಣ್ಣ, ಬ್ಯಾಡಮೂಡ್ಲು ಬಸವಣ್ಣ, ನಲ್ಲೂರು ಮಹದೇವಸ್ವಾಮಿ, ಮೋಹನ್, ಚಿಕ್ಕ ಮಹಾದೇವ, ಮಧುಸೂದನ ಸೇರಿದಂತೆ ಹಲವರು ಇದ್ದರು.
