ಪಟ್ಟಣದ ಹೊರವಲಯದ ರೆಡ್ಡಿಕೆರೆಗೆ ಹಳೆ ಕಟ್ಟಡಗಳ ತ್ಯಾಜ್ಯ ಮತ್ತು ಇತರೆ ಕಸವನ್ನು ಕೆರೆಯಾಂಗಣಕ್ಕೆ ಸುರಿಯಲಾಗುತ್ತಿರುವುದರಿಂದ ಜಲಮೂಲ ಕಲುಷಿತಗೊಳ್ಳುತ್ತಿದೆ.
ಸ್ಥಳೀಯರು ಕೆರೆಯನ್ನು ಸಂರಕ್ಷಿಸಿ, ಈ ರೀತಿ ತ್ಯಾಜ್ಯ ತಂದು ಹಾಕುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರು ಹಾಗೂ ಪರಿಸರಪ್ರೇಮಿಗಳು ಆಗ್ರಹಿಸಿದ್ದಾರೆ.
ಪಟ್ಟಣದ ಹೊರವಲಯದ ರೆಡ್ಡಿಕೆರೆಗೆ ಹಳೆ ಕಟ್ಟಡಗಳ ಅವಶೇಷ, ಕಸ. ತ್ಯಾಜ್ಯ ಸುರಿದಿದ್ದು, ಕೆರೆ ಅಂಗಳ ಅಕ್ಷರಶಃ ಕಸ, ಕಟ್ಟಡಗಳ ಕಲ್ಲು, ಮಣ್ಣಿನ ತಾಣವಾಗಿ ಪರಿಣಮಿಸಿದೆ.
ಗೂಳೂರು, ಮಾರ್ಗಾನುಕುಂಟೆ, ತಿಮ್ಮಂಪಲ್ಲಿ, ಗೊರ್ತಪಲ್ಲಿ, ಬಿಳ್ಳೂರು ಆಂಧ್ರಪ್ರದೇಶದ ಕದಿರಿ ಕಡೆಗೆ ಸಂಪರ್ಕಿಸುವ ರಸ್ತೆಯಲ್ಲಿ ಕೆರೆ ಇದ್ದು, ಕೆರೆ ಕಟ್ಟೆ ಇಕ್ಕೆಲಗಳಲ್ಲೂ ತ್ಯಾಜ್ಯದ ರಾಶಿ ರಾರಾಜಿಸುತ್ತಿದೆ.
ರಾತ್ರಿ ವೇಳೆ ಪಟ್ಟಣದ ಸಾರ್ವಜನಿಕರು, ನಾಗರಿಕರು, ಹೋಟೆಲ್, ಕೋಳಿ, ಕುರಿ ಮಾಂಸದಂಗಡಿ ತ್ಯಾಜ್ಯ, ಬೀದಿಬದಿ ಅಂಗಡಿ ಹಾಗೂ ಸಲೂನ್ ಕಸ ಮತ್ತು ಹಳೆ ಮನೆ ಕಟ್ಟಡದ ಅವಶೇಷಗಳನ್ನು ಕೆರೆ ಒಡಲಿಗೆ ತುಂಬಿಸುತ್ತಿದ್ದಾರೆ. ಜೊತೆಗೆ ಸತ್ತ ನಾಯಿ, ಹಸು ಮೃತದೇಹವನ್ನು ಕೆರೆಗೆ ಹಾಕುತ್ತಿದ್ದು, ಇದರಿಂದ ದುರ್ವಾಸನೆ ಬೀರುತ್ತಿದೆ. ಹಾಗಾಗಿ ರಸ್ತೆಯಲ್ಲಿ ಓಡಾಡುವವರು ಹಾಗೂ ವಾಹನ ಸವಾರರು ಮೂಗು ಮುಚ್ಚಿಕೊಂಡು ಓಡಾಡುವಂತಾಗಿದೆ.
ಕೆರೆಗೆ ತ್ಯಾಜ್ಯ ಸುರಿದು ಕೆರೆ ಮುಚ್ಚುವ ಹಂತದಲ್ಲಿದ್ದರೂ, ಸಂಬಂಧಪಟ್ಟ ಅಧಿಕಾರಿಗಳು ಜಾಣಮೌನ ವಹಿಸಿದ್ದಾರೆಂದು ಸಾರ್ವಜನಿಕರು ಆರೋಪಿಸಿದ್ದಾರೆ.
ಪಟ್ಟಣದ ಹೊರವಲಯದ ರೆಡ್ಡಿಕೆರೆ ಮತ್ತು ಕಟ್ಟೆ ಮೇಲೆ ಕಸ, ಕಟ್ಟಡ ಅವಶೇಷಗಳು ಹಾಕಿದರೆ ಕಾನೂನು ಕ್ರಮ ತೆಗೆದುಕೊಳ್ಳಲಾಗುವುದು. ಕಟ್ಟಡಗಳ ಅವಶೇಷಗಳನ್ನು ಕೆರೆಗೆ ಹಾಕಿದವರ ಬಗ್ಗೆ ಪರಿಶೀಲಿಸಲಾಗುವುದು. ಕೆರೆ, ಕುಂಟೆ, ಕಾಲುವೆಗಳಲ್ಲಿ ಸಾರ್ವಜನಿಕರು ತ್ಯಾಜ್ಯ ಹಾಕಬಾರದು.
ಇದನ್ನು ಓದಿದ್ದೀರಾ..?ಕೋಲಾರ | ಕಾಂಗ್ರೆಸ್ಸಿಗರನ್ನು ತುಂಡು ಮಾಡಿ ಅರಬ್ಬಿ ಸಮುದ್ರಕ್ಕೆ ಎಸೆಯುವ ಹೇಳಿಕೆ: ನಗರ ಪೊಲೀಸ್ ಠಾಣೆಯಲ್ಲಿ 3 ದೂರು ಸಲ್ಲಿಕೆ
ಈ ಹಿಂದೆ ರೆಡ್ಡಿಕೆರೆ ಬಳಿ ಕೊರೆಸಿದ್ದ ಕೊಳವೆಬಾವಿಯಿಂದ ಪಟ್ಟಣಕ್ಕೆ ಕುಡಿಯುವ ನೀರು ಸರಬರಾಜು ಆಗುತ್ತಿದೆ. ಆದರೆ, ಇದೀಗ ಕೆರೆ ತ್ಯಾಜ್ಯದಿಂದ ಕೂಡಿದೆ. ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳು ಗಮನಹರಿಸಿ ಕಸ ಸುರಿಯದಂತೆ ಸೂಕ್ತ ಕ್ರಮ ಕೈಗೊಳ್ಳಬೇಕು.



