ಶಾಲೆಗಳು ತೆರೆಯಬೇಕಾದ ಸ್ಥಳಗಳಲ್ಲಿ ನಮ್ಮನಾಳುವ ಸರ್ಕಾರವೇ ಸಾರಾಯಿ ಅಂಗಡಿಗಳನ್ನು ತೆರೆಯಲು ಅನುಮತಿ ನೀಡುತ್ತಿದೆ. ಇದರಿಂದ ನಮ್ಮ ಸಂಸಾರ ಹಾಳಾಗುತ್ತಿವೆ ಎಂದು ಸಾರಾಯಿ ವಿರೋಧಿ ಹೋರಾಟ ಸಮಿತಿಯ ಮಹಿಳೆಯರು ಸರ್ಕಾರದ ವಿರುದ್ಧ ಪ್ರತಿಭಟನೆ ನಡೆಸಿದರು.
1,000 ಹೊಸ ಮದ್ಯದಂಗಡಿ ತೆರೆಯಲು ಪರವಾನಗಿ ನೀಡುವುದಾಗಿ ಸರ್ಕಾರ ಹೇಳಿದೆ. ಸರ್ಕಾರದ ನಡೆಯನ್ನು ಖಂಡಿಸಿ ಚಿಕ್ಕಮಗಳೂರು ಜಿಲ್ಲೆಯ ಕೊಪ್ಪ ತಾಲೂಕಿನ ಅಗಲಗಂಡಿ ಗ್ರಾಮದ ಮಹಿಳೆಯರು ಅ.19ರಂದು ಪ್ರತಿಭಟನೆ ನಡೆಸಿದ್ದಾರೆ.
“ಸಮೃದ್ಧವಾದ ಮಲೆನಾಡು ಮುಂದೆ ಮಧ್ಯವ್ಯಸನಿಗಳ ಬೀಡಾಗುತ್ತದೆ ಎಂಬ ಆತಂಕ ಇದೆ. ಗ್ರಾಮೀಣ ಬಾಗಗಳಲ್ಲಿ ಸರ್ಕಾರ ಶಾಲೆಗಳನ್ನು ತೆರೆಯಲು ಚಿಂತಿಸಬೇಕೆ ಹೊರತು, ಸಾರಾಯಿ ಅಂಗಡಿ ತೆಗೆಯುವುದನಲ್ಲ. ಇದರಿಂದ ನಮ್ಮ ಮನೆಗಳು ಹಾಳಾಗುತ್ತವೆ” ಎಂದು ಆಕ್ರೊಶ ವ್ಯಕ್ತಪಡಿಸಿದರು.
“ಮಲೆನಾಡಿನ ಸುಂದರ ಈ ಸುಂದರ ಪರಿಸರದಲ್ಲಿ ಹಳ್ಳಿಯ ಜನರಿಗೆ ಬೇಕಾದ ಮೂಲ ಭೂತ ಸೌಕರ್ಯಗಳಾದ ರಸ್ತೆ, ವಿದ್ಯುತ್ ಮನೆಗಳಿಗೆ ಹಕ್ಕು ಪತ್ರ, ಸಾಗುವಳಿ ಜಮೀನಿಗೆ ಹಕ್ಕುಪತ್ರ, ಗ್ರಂಥಾಲಯಗಳು, ಶಾಲೆಗಳು ಹಾಗೂ ಆಸ್ಪತ್ರೆಗಳನ್ನು ತೆರೆಯುವ ಬಗ್ಗೆ ಯೋಜನೆ ರೂಪಿಸಬೇಕು. ಅದನ್ನು ಬಿಟ್ಟು ಇಂತಹ ಸಾರಾಯಿ ಅಂಗಡಿಗಳನ್ನು ತೆರೆಯುವುದರಿಂದ ಯುವಕರು ಮಧ್ಯಪಾನಕಕ್ಕೆ ತುತ್ತಾಗಿ ಜೀವನವನ್ನು ರೂಪಿಸಿಕ್ಕೊಳ್ಳಬೇಕಾದ ಸಮಯದಲ್ಲಿ ತಮ್ಮ ಜೀವನವನ್ನೇ ಅಂತ್ಯಗೊಳಿಸುತ್ತಿದ್ದಾರೆ. ಹಲವು ಜನ ಮಾನಸಿಕ ಅಶ್ವಸ್ಥರಾಗತೊಡಗಿದ್ದಾರೆ” ಎಂದು ಹೇಳಿದರು.
“ಮದ್ಯಪಾನ ಆರೋಗ್ಯಕ್ಕೆ ಹಾನಿಕಾರ ಎನ್ನುತ್ತ ದಿನಸಿ ಅಂಗಡಿಗಳಲ್ಲಿ, ಮನೆಗಳಲ್ಲಿ ಅಕ್ರಮ ಸಾರಾಯಿ ಮಾರಾಟ ಎಗ್ಗಿಲ್ಲದೆ ನಡೆಯುತ್ತಿದೆ. ಇದರಿಂದ ಜನರನ್ನು ಮದ್ಯ ವ್ಯಸನಿಗಳಾಗುವಂತೆ ಪ್ರೇರೆಪಿಸುತ್ತಿದೆ. ಊರಿನ ಜನರ ಮಧ್ಯೆ ದ್ವೇಷದ ವಾತಾವರಣ ಸೃಷ್ಟಿಸುತ್ತಿದೆ. ಇದರಿಂದ ಮನೆ, ಮನಸ್ಸು, ಊರು ಎಲ್ಲವೂ ಕೂಡ ನೆಮ್ಮದಿ ಕಳೆದುಕೊಳ್ಳುವ ಪರಿಸ್ಥಿತಿ ಬಂದಿದೆ. ದುಡಿಯುವ ಜನರು ತಮ್ಮ ಆರೋಗ್ಯವನ್ನು ಹದಗೆಡಿಸಿಕ್ಕೊಳ್ಳುತ್ತಿದ್ದಾರೆ” ಎಂದು ತಿಳಿಸಿದರು.
“ಹಳ್ಳಿಗಳಲ್ಲಿ ಜನರಿಗೆ ಕೈಗೆಟುಕುವ ದರದಲ್ಲಿ ಹಾಗೂ ಅಕ್ರಮ ಮತ್ತು ಸಕ್ರಮ ಯಾವುದೇ ರೀತಿಯಿಂದಲೂ ಮದ್ಯ ಮಾರಾಟ ಮಾಡಬಾರದು. ಹೊಸದಾಗಿ ಎಮ್ಎಸ್ಐಎಲ್(MSIL)ಗಳಿಗೆ ಅನುಮತಿ ನೀಡಬಾರದು. ಇದರಿಂದ ಸರ್ಕಾರ ದುಡಿಯುವ ಜನರ ಪರವಾಗಿದೆ ಎಂದು ಸಾಬೀತು ಪಡಿಸಬೇಕಿದೆ” ಎಂದು ಒತ್ತಾಯಿಸಿದರು.
“ಯುವಜನತೆ ಮದ್ಯಪಾನದತ್ತ ಮುಖಮಾಡದೆ, ನಿಮ್ಮ ನಿಮ್ಮ ತಂದೆ, ತಾಯಿ ಅವರು ಮಾಡಿಟ್ಟ ಅಷ್ಟೋ ಇಷ್ಟೋ ಇರುವ ಜಮೀನನ್ನು ಉಳಿಸಿಕೊಂಡು ಅದರ ಉಳಿವಿಗಾಗಿ ಸರ್ಕಾರದ ಜನವಿರೋಧಿ ಕಾಯ್ದೆ, ಕಾನೂನುಗಳ ವಿರುದ್ಧ ಹೋರಾಡುತ್ತಾ ಸಾಮಾಜಿಕ ಜವಾಬ್ದಾರಿಯನ್ನು ಹೊರಬೇಕಿದೆ. ನಮ್ಮ ಹಳ್ಳಿಯಲ್ಲಿ ಯಾವುದೇ ಕಾರಣಕ್ಕೂ ಅಕ್ರಮವಿರಲಿ, ಸಕ್ರಮವಿರಲಿ ಮದ್ಯ ಮಾರಾಟಕ್ಕೆ ಒಕ್ಕೊರಲ ವಿರೋಧವಿದೆ” ಎಂದರು.
ಪ್ರತಿಭಟನಾ ವಿಷಯ ತಿಳಿದ ತಾಲೂಕಿನ ತಹಶೀಲ್ದಾರ್ ,ಅಬಕಾರಿ ಇಲಾಖೆಯ ಅಧಿಕಾರಿಗಳು ,ಪೊಲೀಸ್ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಮನವಿ ಪತ್ರ ಸ್ವೀಕರಿಸಿದರು. ಈ ವೇಳೆ, ಜನರ ಸಮಸ್ಯೆ ಬಗೆಹರಿಸುತ್ತೇವೆ ಎಂದು ಭರವಸೆ ನೀಡಿದರು.
ಪ್ರಜ್ಞಾವಂತ ನಾಗರಿಕರು, ರೈತಕಾರ್ಮಿಕರು, ಮಹಿಳೆಯರು, ದಲಿತ ಆದಿವಾಸಿಗಳು, ವಿದ್ಯಾರ್ಥಿ ಯುವ ಜನರು ಈ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು.
