ಮಂಗಳೂರು: “ಶೋಭಾ ಕರಂದ್ಲಾಜೆ ಅವರಿಗೆ ಸುಳ್ಳೇ ಬಂಡವಾಳ, ಅದರ ಮೂಲಕವೇ ರಾಜಕಾರಣ ಮಾಡುತ್ತಿದ್ದಾರೆ. ಸುಳ್ಳುಗಳನ್ನು ಹೇಳಿಯೇ ಜನರಿಂದ ಚಪ್ಪಾಳೆ ಗಿಟ್ಟಿಸುವುದೇ ಶೋಭಾ ಅವರಿಗೆ ರೂಢಿಯಾಗಿದೆ. ಎಂದು ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಮಹಿಳಾ ಸಮಿತಿ ಅಧ್ಯಕ್ಷೆ ಎಸ್ ಅಪ್ಪಿ ಮಂಗಳೂರು ಅವರು ವಾಗ್ದಾಳಿ ನಡೆಸಿದರು.
ಮಂಗಳೂರಿನ ಕಾಂಗ್ರೆಸ್ ಭವನದಲ್ಲಿ ನಡೆಸಿದ ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿದ ಅವರು ” ಬಿಜೆಪಿ ನೇತೃತ್ವದ ಕೇಂದ್ರ ಸರಕಾರ ನಿರಂತರ ಬೆಲೆ ಏರಿಕೆ ಮಾಡಿದಾಗ ಶೋಭಾ ಕರಂದ್ಲಾಜೆ ಒಂದು ಮಾತನ್ನೂ ಆಡಿಲ್ಲ. ಈಗ ರಾಜ್ಯ ಸರಕಾರದ ವಿರುದ್ದ ಪ್ರತಿಭಟನೆ ಮಾಡುತ್ತಿದ್ದಾರೆ”. ಹಾಲಿನ ದರದ ಬಗ್ಗೆ ಮಾತನಾಡುವ ಶೋಭಾ ಅವರು ಕೇಂದ್ರ ಸರಕಾರ ಮೊಸರಿಗೆ GST ಹಾಕಿದಾಗ, ಪೆಟ್ರೋಲ್‌ ಬೆಲೆ ಏರಿಸಿದಾಗ ಮಾತನಾಡಲೇ ಇಲ್ಲ. ರಾಜ್ಯ ಸರಕಾರದ ಅಭಿವೃದ್ಧಿ ಕೆಲಸಗಳಿಗೆ ಪ್ರೋತ್ಸಾಹಿಸುವುದನ್ನು ಬಿಟ್ಟು ಸುಖಾ‌ಸುಮ್ಮನೆ ಸುಳ್ಳು ಹೇಳಿ ಜನರಲ್ಲಿ ಕೈ ತಟ್ಟಿಸುವುದು ಸಮಂಜಸವಲ್ಲ” ಎಂದು ಎಸ್ ಅಪ್ಪಿ ಅವರು ಅಭಿಪ್ರಾಯಪಟ್ಟರು.
ಬೆಲೆ ಏರಿಕೆಯ ಸಮರ್ಥನೆ
“ರೈತರ ಸಬಲೀಕರಣಕ್ಕಾಗಿ ಹಾಲಿನ ದರ ಏರಿಸಲಾಗಿದೆ. ಗ್ರಾಮೀಣ ಪ್ರದೇಶಕ್ಕೆ ಸರಕಾರಿ ಬಸ್ ವ್ಯಾಪ್ತಿಯನ್ನು ಹೆಚ್ಚಿಸಲು ಬಸ್ ದರ ಏರಿಸಿದೆ. ಬೆಲೆ ಏರಿಕೆ ಜನರಿಗೆ ತೊಂದರೆ ಆಗಿರಬಹುದು, ಆದರೆ ರೈತರ ಹಿತದೃಷ್ಟಿಯಿಂದ ದರ ಏರಿಸಲಾಗಿದೆ. ಬೇರೆ ರಾಜ್ಯಗಳಿಗೆ ಹೋಲಿಸಿದರೆ ಕರ್ನಾಟಕದಲ್ಲಿ ಹಾಲಿನ ದರ ಕಡಿಮೆ ಇದೆ” ಎಂದು ಎಸ್. ಅಪ್ಪಿ ಪತ್ರಿಕಾ ಎಂದು ಸರ್ಕಾರದ ಬೆಲೆ ಏರಿಕೆಯನ್ನು ಸಮರ್ಥಿಸಿಕೊಂಡರು.
